Read Cibverano Cipsa Cisena Mateu 7 Bible Online

Mateu 7 - Cibverano Cipsa Cisena bible

Mateu 7

¹“Lekani kutonga munthu, toera mukhonde kutongwambo na Mulungu.

²Thangwi na matongero anacita imwe, munadza katongwambo sawa-sawa. Pontho na n'dida ubodzi-bodzi unapimira imwe andzanu, munadza kapimirwambo na n'dida unowu.

³Thangwi yanji usalang'ana cirombo cing'ono ciri n'diso mwa m'bale wako, mbukhonda kuona nkhuni iri n'diso mwako?

⁴Usakwanisa tani kupanga m'bale wako kuti: ‘Bwera ndikubuluse cirombo cing'ono ciri n'diso mwako,’ mbukhonda kuona nkhuni iri n'diso mwako?

⁵Nyauthambi! Pakutoma bulusa nkhuni iri n'diso mwako, na tenepo iwe unaona mwadidi toera ubulusembo cirombo ciri n'diso mwa m'bale wako.

⁶Lekani kupasa anambwa pinthu pyakucena! Thangwi iwo anadza kakuzungunukirani mbakulumani. Pontho, lekani kutaya mpfuma zanu muna nkhumba, thangwi izo zinadza kazipwanda.”

⁷“Phembani, munapaswa. Sakani, munapigumana. Gogodzani, munafungulirwa.

⁸Thangwi onsene anaphemba, anapaswa. Anasaka, anapigumana. Pontho ule anagogodza citseko, anafungulirwa.

⁹Mbani pakati panu anapasa mwana wace mwala, angam'phemba nkate?

¹⁰Peno mbampasa nyoka angam'phemba nyama ya m'madzi?

¹¹Lang'anani, imwe ninga anthu a kuipa musakwanisa kupasa ana anu pinthu pyadidi, ndiye tani Baba wanu ali kudzulu, nkhabe bulusa pinthu pyadidi mbapasa ale anam'phemba?

¹²Na tenepo, pyonsene pinafuna imwe kuti mucitirwe na andzanu, acitirenimbo imwe pakutoma. Thangwi ipi ndipyo pinalonga Mwambo wa Mozesi na pinapfundzisa Maporofeta.”

¹³“Pitani na nsuwo ung'ono. Thangwi nsuwo ukulu na njira ikulu pisapitisa ku mbuto ya kutaika. Mbazinji anthu anapita na mwenemu.

¹⁴Mbwenye nsuwo ung'ono na njira yakupata zisafikisa ku mbuto ya upulumuki. Apo anthu ace anaigumana acepa.”

¹⁵“Cenjerani na maporofeta a uthambi! Thangwi ali kudza kuna imwe ninga mabira, mbwenye m'mitima mwawo ndi mibindzi ya ukali.

¹⁶Anthu enewa imwe munaadzindikira na misapu yawo. Pisakwanisika kuti munthu achode mauva pa miti ya minga, peno masambvu pa psepse?

¹⁷Na tenepo, muti onsene wadidi usabala misapu yadidi, muti wa kuipa unabalambo misapu ya kuipa.

¹⁸Pontho, nkhabe kucitika kuti muti wadidi ubale misapu ya kuipa, peno muti wa kuipa ubale misapu yadidi.

¹⁹Muti onsene unakhonda kubala misapu yadidi usagwandiwa mbuponyiwa pa moto.

²⁰Na tenepo, munati muadziwe na misapu yawo.”

²¹“Si onsene tayu analonga ‘Mbuya, Mbuya’ anafuna kupita mu Umambo wa kudzulu, mbwenye ale basi anacita kufuna kwa Baba wanga ali kudzulu.

²²Ntsiku eneyo ingafika, anthu azinji anati alonge kuna Ine kuti: ‘Mbuya, Mbuya! Kodi ife tikhalonga tayu Mphangwa Zadidi na dzina yanu? Tikhabulusa tayu madimonyo na dzina yanu? Tikhacita tayu pirengo pikulu na dzina yanu?’

²³Na tenepo, Ine ndinaapanga pakweca kuti: Nkhabe kukudziwani. Bulukani pano, imwe monsene munacita kuipa!”

²⁴“Anthu onsene anabva mafala anga mbaacita, asalandana na mamuna m'bodzi wa ndzeru adamanga nyumba yace padzulu pa mwala.

²⁵Na tenepo, mulungu abvumba, mikulo mbikuka na madzi, mbicibwera conzi cikulu kudza kamenya nyumba. Mbwenye iyo nkhabe kugwa, thangwi nyumba eneyo yamangwa pa mwala.

²⁶Mbwenye ule anabva mafala anga mbakhonda kuacita, asalandana na mamuna m'bodzi wa kusoweka ndzeru, adamanga nyumba yace pa checa.

²⁷Na tenepo, mulungu abvumba pikulu kakamwe, mikulo mbikuka na madzi, mbicibwera conzi cikulu kudza kamenya nyumba. Iyo yagwa, mbifudzika yonsene.”

²⁸Yezu pidamala iye kulonga mafala awa, anthu onsene adzumatirwa na mapfundzisiro ace.

²⁹Thangwi iye akhapfundzisa na mphambvu za utongi, mbakhonda kupfundzisa ninga anyakudziwisa a Mwambo.