Read Cibverano Cipsa Cisena Mateu 8 Bible Online

Mateu 8 - Cibverano Cipsa Cisena bible

Mateu 8

¹Yezu mukhachita iye pa phiri anthu azinji atoma kuntowera.

²Mamuna m'bodzi wa matanya afendedzera Yezu mban'godamira mbalonga kuti: “Mbuya, mungafuna munandiwangisa.”

³Yezu afuthula nkono wace, an'khuya mbalonga tenepa: “Ndisafuna, iwe waceneswa.” Pa n'dzidzi ubodzi-bodzi mamuna awangiswa matanya ace.

⁴Buluka penepo Yezu ampanga kuti: “Lang'ana, leka kupanga munthu penepi. Ndoko kuna nyantsembe, toera akudinkhe. Ungamala upereke ntsembe ninga mudapilongera Mozesi, toera anthu akudziwe kuti iwe wawangadi.”

⁵Yezu mudapita iye n'cisa ca Kafaranaumi, afendedzerwa na nkulu m'bodzi wa anyankhondo a ku Roma mbam'phemba tenepa:

⁶“Mbuya, nyabasa wanga ali kugona ku nyumba na kuthabuka pikulu kakamwe na nthenda ya mpfutete.”

⁷Yezu ampanga kuti: “Ndinaenda kweneko kamuwangisa.”

⁸Mbwenye nkulu wa anyankhondo antawira tenepa: “Mbuya, ine sine munthu kuti ndikutambireni n'nyumba mwanga. Mbwenye longani fala ibodzi basi, nyabasa wanga anawanga.

⁹Thangwi ine ndiri nawombo atsogoleri anga anabvera ine. Inembo ndisabverwa na anyankhondo anga. Na tenepo, ndisapanga nyankhondo wanga m'bodzi kuti: Ndoko kule, iye asaenda. Unangombo mbandimpanga kuti: Bwera kuno, iye asabwera. Pontho ndisapanga nyabasa wanga kuti: Cita ici, iye asacita.”

¹⁰Yezu na kubva penepyo, adzumatirwa napyo mbalonga kuna anthu akhantowera kuti: “Ndimo mwene ndisakupangani kuti: cipo ndidzati kugumana cikhulupiro ninga ici muno mu Izarayeli.

¹¹Ndinakupangani pontho kuti anabwera anthu azinji a kumabulukira dzuwa na a kumadokero a dzuwa, mbadza kakhala pa thando ya kudya pabodzi pene na Abharaamu, na Izaki, na Djakobo, mu Umambo wa kudzulu.

¹²Mbwenye ana a Umambo, anati aponyiwe kunja, ku cidima. Mwenemu munadza kaoneka kulira na kukukuta mano.”

¹³Buluka penepo, Yezu alonga kuna nkulu wa anyankhondo kuti: “Ndoko ku nyumba, kutawira kwako kunacitika.” Na tenepo, pa n'dzidzi ubodzi-bodzi nyabasa wace awanga.

¹⁴Yezu pidafika iye pa nyumba ya Pedhru, agumana mebzala wace Pedhru mbakhagona, thangwi akhadaferuka.

¹⁵Yezu amphata manja ace, nthenda mbiwanga. Na tenepo, iye alamuka mbatoma kum'phatira basa.

¹⁶Na maulo mwace anthu an'dzesera atenda azinji akhali na mizimu ya kuipa. Mbwenye Yezu na fala yace basi aithamangisa mizimu ya kuipa mbaawangisa atenda onsene.

¹⁷[23]Na tenepo, pyasimbiswa pire pikhadalonga mporofeta Izaya kuti: “Iye ene akwata kuduwala kwathu, na nthenda zathu zonsene.”

¹⁸Yezu na kuona mbumba ya anthu ikhadanzungulira, aapanga anyakutumwa ace kuti aende ntunda unango wa nyandza.

¹⁹Na tenepo, nyakudziwisa m'bodzi wa Mwambo anfendedzera dhuzi mbampanga kuti: “Mpfundzisi, ine ndinakutowerani konsene kunafuna imwe kwenda.”

²⁰Mphapo Yezu antawira tenepa: “Minyenga ina mphako zawo, mbalame za kudzulu zinantsandza zawo, mbwenye Ine, Mwana wa Munthu, nkhabe pa kutsamisa nsolo.”

²¹M'bodzi wa anyakupfundza aphemba Yezu mbalonga kuti: “Mbuya, ndisiyeni pakutoma ndiyende kaikhise baba wanga.”

²²Mbwenye Yezu antawira tenepa: “Iwe nditowere. Aleke anyakufa aikhane okha.”

²³Na tenepo, Yezu akwira m'bote na anyakupfundza ace mbaenda na iwo pabodzi.

²⁴Na mwansanga, caoneka conzi cikulu kakamwe n'nyandza, mabimbi mbakhamenya bote, mbakhafuna kuilowesa. Mbwenye pa n'dzidzi unowu Yezu akhagona pyace.

²⁵Na thangwi eneyo anyakupfundza ace aenda kamulamusa mbakhakhuwa tenepa: “Mbuya, tipulumuseni! Tiri kufa ife!”

²⁶Mbwenye Yezu aabvundza tenepa: “Thangwi yanji imwe musagopa tenepa, anthu a cikhulupiro cing'ono?” Buluka penepo, Yezu alamuka mbamatamisa conzi na mabimbi, pyonsene mbapimatamiratu.

²⁷Anyakupfundza ace na kupiona, adzumatirwa mbalonga kuti: “Mbani unowu anafikira kubverwa na mphepo na mabimbi ene?”

²⁸Yezu afika cisa cinango cinacemerwa Gadala, cinagumanika ntunda unango wa nyandza ya Galileya. Penepo, abwera kuna Iye amuna awiri anyansala akhali na mizimu ya kuipa kubulukira m'masiye, pontho akhali anthu akugopsa kakamwe. Na tenepo, njira ikhadafa thangwi anthu akhagopa kupita nayo.

²⁹Mizimu ya kuipa ikhakhala muna anthu pidaona iyo Yezu, yatoma kukhuwa kuti: “Iwe, Mwana wa Mulungu, usafunanji na ife? Wabwera katithabusa n'dzidzi mbudzati kukwana?”

³⁰Cifupi na penepo, ukhalipo nkumbi ukulu wa nkhumba mbukhasodza.

³¹Na tenepo, madimonyo aphemba kuna Yezu kuti: “Mungatibulusa, tipitiseni pyathu mu nkumbi wa nkhumba.”

³²Yezu aatawira kuti: “Ndokoni!” Iwo abuluka muna anthu mbapita mu nkumbi wa nkhumba. Na tenepo, nkhumba zonsene zanumpha pa nkhomole, mbazilowa n'nyandza.

³³Akumbidzi a nkhumba athawa, aenda mu nzinda mbalonga pyonsene, na pire pidacitika kuna amuna akhali na mizimu ya kuipa.

³⁴Na tenepo, anthu onsene a mu nzinda aenda kalonga na Yezu. Pidamuona iwo am'phemba kuti iye abuluke pa cisa ceneci.