Read Cibverano Cipsa Cisena Marku 13 Bible Online

Marku 13 - Cibverano Cipsa Cisena bible

Marku 13

¹Mukhabuluka Yezu mu Nyumba ya Mulungu, m'bodzi wa anyakupfundza ace ampanga tenepa: “Mpfundzisi, lang'anani kubalika kwa nyumba izi na myala zidamangwa na izo!”

²Mbwenye Yezu atawira tenepa: “Iwe usaziona nyumba zikulu izi? Pano nkhabe mwala ubodzi unafuna sala padzulu pa mwala unango. Pyonsene ipi pinamala kugomolwa.”

³Yezu akhakhala nawa pa phiri ya Mulivera, mbakhalang'ana ku Nyumba ya Mulungu, pa n'dzidzi ukhabvundziwa iye pa khundu na Pedhru, na Tiyago, na Juwau, na Andereya, kuti:

⁴“Pinacitika lini pinthu penepi? Pontho ndi cidzindikiro canji cinafuna kudza kaoneka, toera kupangisa kuti pyonsene ipi piri dhuzi na kufuna kucitika?”

⁵Yezu aapanga tenepa: “Cenjerani! Lekani kunyengezwa na munthu.

⁶Azinji anati abwere na dzina yanga mbalonga kuti: ‘Ndine pano,’ pontho anati anyengeze anthu azinji.

⁷Mphapo lekani kugopa mungabva mbapilongwa pya nkhondo na mabvabva a nkhondo. Pisafunika kuti picitike tenepo, mbwenye si kumala kwa pinthu tayu.

⁸Dziko na dziko inadza kamenyana, pontho umambo na umambo unadza kamenyana. Kunaoneka citeke-teke mu mbuto zizinji pontho na njala. Pinthu penepi ndi kutoma kwa nyatwa.

⁹Imwe musafuna mucenjere, thangwi munadza kaperekwa n'nyumba zakutongera miseru, mbamukwapulwa na michamu n'kati mwa nyumba zawo za kuphemberera. Na thangwi yanga, imwe munati muperekwe pamaso pa atongi na pa amambo, toera mukhale amboni anga.

¹⁰Thangwi pyonsene ipi mbipidzati kucitika, pakutoma pisafunika kuti Mphangwa Zadidi zimwazwe madziko onsene a pantsi pano.

¹¹Mungadza kamangwa mbamuperekwa m'manja mwa anyakutonga, lekani kunentseka kuti munadza kalonganji. N'dzidzi ungafika longani pire basi pinadza kakupangani Mulungu n'dzidzi unowu. Thangwi simwe tayu anadza kafuna kulonga, mbwenye ndi Nzimu Wakucena.

¹²Anthu azinji anadza kapereka abale awo ene toera aphiwe, pontho ababa na amai anadza kacitambo pibodzi-bodzi kuna anawo. Anambo anadza kasandukira ababa awo na amai awo, mbaapha.

¹³Anthu onsene anati akuideni na thangwi ya dzina yanga. Mbwenye ule anapirira mpaka pa kumalisa, anapulumuswa.”

¹⁴[27]Yezu athimiza pontho na kulonga kuti: “Imwe mungadza kaona cinthu cakugopsa cinafudza pya Mulungu. mbacikhala pa mbuto ya kukhondeswa - anaona mafala awa, mbaabvesese - na tenepo, ale anagumanika mu Djudeya mbathawire ku mapiri.

¹⁵Ule anagumanika pa ntsoyi ya nyumba yace, mbaleke kuchita toera kubulusa cinthu cibodzi n'nyumba mwace.

¹⁶Ule anagumanika ku munda, mbaleke bwerera n'nduli toera akhakwate nguwo zace.

¹⁷Ntsiku zenezo zinati zikhale za nyatwa ikulu kuna ale ali na pathupi, na ale anayamwisa!

¹⁸Phemberani kuna Mulungu, kuti nyatwa zenezo zileke kucitika pa n'dzidzi wa khoni.

¹⁹Thangwi ntsiku zenezo zinadza kakhala za nyatwa ikulu kuti cipo idzati kuoneka, kutomera padacita Mulungu dziko mpaka n'dzidzi uno, pontho na lini inadza kaoneka pontho.

²⁰Pontho Mbuya mbadakhonda kuzigwandira ntsiku zenezi, nkhabe m'bodzi akhafuna kupulumuka! Mbwenye na thangwi ya anyakusankhulwa adasankhula Iye, azigwandira ntsiku zenezi.

²¹“Na tenepo, munthu angakupangani kuti: ‘Kirixtu ali pano!’ peno kuti: ‘Uyo ali kule!’ lekani kum'bvera.

²²Thangwi anadza kabulukira akirixtu a uthambi na maporofeta a uthambi kuti anadza kacita pirengo na pinthu pyakudzumisa, toera pingakwanisika, anyengeze na ale ene anyakusankhulwa a Mulungu.

²³Na thangwi eneyo, cenjerani. Ndisakucenjezani pyonsene ipi mbipidzati kucitika.”

²⁴“[28]Mbwenye pa ntsiku zenezo, pakumala kwa nyatwa eneyo ikulu, ‘dzuwa inaswipa, mwezi nkhabe kudza kagakabve,

²⁵nyenyezi za kudzulu zinagwa, pontho mphambvu za kudzulu zinatekenyeka.’

²⁶Na tenepo, anadza kaona Ine, Mwana wa Munthu, mbandikhabwera m'makole na mphambvu zikulu za utongi, pontho na mbiri.

²⁷Penepo, Ine, Mwana wa Munthu ndinadza katuma maanju anga, mbandigumanya anyakusankhulwa anga a makhundu manai a dziko, mpaka kudadhoroma mataka na thambo.”

²⁸“Pfundzani nsanje wa muti wa nsambvu. Mungaona nthawi zace mbazigubudzika, masamba ace mbatoma kuphwikira, imwe musadziwa kuti malimwe ali dhuzi.

²⁹Tenepambo imwe, mungaona mbapicitika pinthu penepi, dziwani kuti ali dhuzi, ali pa nsuwo.

³⁰Ndimo mwene ndisakupangani kuti pinthu pyonsene ipi pinacitika, anthu a midzidzi ino mbadzati kumala.

³¹Kudzulu na pantsi panamala, mbwenye mafala anga nkhabe kudza kamala.

³²“Mbwenye pya thangwi ya ntsiku eneyi peno pya n'dzidzi, nkhabe munthu anapidziwa. Izo anju kudzulu, peno Ine Mwana wa Munthu, nkhabe kupidziwa. Anapidziwa ndi Baba ekha basi.

³³Lang'anirani! Khalani mbamudacenjera! Thangwi imwe nkhabe kupidziwa unafika lini n'dzidzi unowu.

³⁴Pinakhala ninga mamuna m'bodzi adabuluka pa nyumba mbacita ulendo wa kutali. Mbwenye mbadzati kwenda, abulusa ntemo wace, mbagawiza mabasa kuna m'bodzi na m'bodzi, mbapanga nyakuonera pa nsuwo kuti aonere.

³⁵Na tenepo, lang'anirani, thangwi imwe nkhabe kupidziwa kuti anabwera lini mwana cinthu nyumba. Peno na maulo, peno chiti-chiti, peno munalira madzongwe, peno na macibese.

³⁶Kuti iye angabwera na mwansanga, akhonde kukugumanani mbamugona.

³⁷Penepi pinakupangani Ine, ndisapanga anthu onsene kuti: Lang'anirani!”