Read Cibverano Cipsa Cisena Marku 4 Bible Online

Marku 4 - Cibverano Cipsa Cisena bible

Marku 4

¹Yezu atoma pontho kupfundzisa m'mbale mwa gombe. Penepo, wagumanyikana mwinji ukulu wa anthu n'khundu mwace. Iye apakira m'bote, akhala pantsi, mbafedza kutali pang'ono na gombe. Bote ikhakhala nyandza, mbwenye mbumba yonsene ikhakhala pa gombe.

²Iye akhaapfundzisa na misanje pinthu pizinji, mbakhalonga tenepa:

³“Bveserani! Mamuna m'bodzi abuluka kwenda kawaza mbeu.

⁴Mukhawaza iye, mbeu zinango zagwa n'khundu mwa njira. Na tenepo, zabwera mbalame mbamala kuzidzonkhona.

⁵Khundu inango ya mbeu yagwa pa mbuto ya myala, pakhagumanika mataka pang'ono basi. Penepo mbeu yamera na mwansanga thangwi mataka akhadacepa.

⁶Mbwenye na kupisa kwa dzuwa, umera wamala kupya mbuuma na thangwi ya kusowa michici.

⁷Khundu inango ya mbeu yagwa pa minga. Minga yakula, mbeu mbizicimwana kufantsa. Na tenepo, zacimwana kubala misapu.

⁸Mbwenye mbeu inango yagwa pa mataka adidi. Iyo yamera mbikula mbibala misapu makumatatu, makumatanthatu mpaka kufika dzana pa mbeu ibodzi.”

⁹Yezu athimiza na kulonga tenepa: “Ule ana makutu a kubva, mbabve!”

¹⁰Pidasala Iye ekha, anyakupfundza khumi na awiri, pabodzi na anthu anango akhali n'khundu mwace, am'phemba kuti aapange usalonganji nsanje unowu.

¹¹Yezu aatawira tenepa: “Kuli imwe, mwapaswa kudziwa pyakubisala pya Umambo wa Mulungu, mbwenye kuli anthu a kunja pyonsene anapipfundziswa na misanje.

¹²[3]Toera kuti: ‘kuona mbaona, mbakhonda kudzindikira. Kubva mbabva, mbakhonda kupibvesesa. Pontho toera akhonde kuzungunuka kuna Mulungu, Iye mbaalekerera kudawa kwawo.’ ”

¹³Na tenepo, Yezu aabvundza kuti: “Ngakhala imwe nkhabe kuubvesa nsanje uyu, misanje inango munaibvesesa tani?

¹⁴Nyakubzala, asabzala fala ya Mulungu.

¹⁵Mbeu zidagwa m'mbale mwa njira, ndi ale adabva fala, mbwenye na mwansanga asabwera Sathani mbabulusa fala ikhadabzalwa n'kati mwa iwo.

¹⁶Anthu anango alandana na mbeu idagwa pa mataka a myala. Angaibva fala asaitambiriratu na kukomerwa.

¹⁷Mbwenye asakhala n'dzidzi pang'ono, thangwi nkhabe michici. Na tenepo, nyatwa zingaagwera, peno angachingwa na thangwi ya fala ya Mulungu, asaisiyeratu.

¹⁸Anangombo alandana na mbeu idagwa pakati pa minga. Iwo asabva fala ya Mulungu,

¹⁹mbwenye na kukula kwa pinthu pya kunyerezera pya padziko ino, na pya mpfuma, na pinango pizinji pya kusirira, penepyo pisacita kuti fala ya Mulungu ikhonde kufantsa pontho ikhonde kubala misapu.

²⁰Pontho anthu anango alandana na mbeu idagwa pa mataka adidi. Asabva fala ya Mulungu, mbaitawira, mbabala misapu inango makumatatu, inango makumatanthatu, mpaka kufika dzana, pa mbeu ibodzi.”

²¹Yezu athimiza na kuapfundzisa pontho tenepa: “Alipo munthu anagasa nyale mbaigudumira na citundu peno mbaiyikha pantsi pa talimba? Nkhabe citika. Mbwenye asaiyikha pakweca toera imwinikire pyadidi.

²²Thangwi pyonsene pidabisala pinati pioneke. Pontho na pire pyonsene pinacitwa n'cibiso-biso pinati pidziwike.

²³Ana makutu a kubva, mbabve.”

²⁴Yezu athimiza pontho mbalonga tenepa: “Bvesesani mwadidi pire pinabva imwe! Na n'dida ubodzi-bodzi unapimira imwe andzanu, munadza kapimirwambo na n'dida unowu, pontho mbamuthimizirwa pinango.

²⁵Thangwi ule anapyo, anati apaswe pontho pinango. Mbwenye ule adapisowa, anapokoserwa na pire pyene pina iye!”

²⁶Yezu alonga pontho kuti: “Umambo wa Mulungu walandana na mamuna m'bodzi anawaza mbeu m'munda.

²⁷Munthu, na masiku peno na masikati, asagona peno ali m'maso, asacimwana kudziwa kumera na kukula kunacita mbeu.

²⁸Thangwi ndiwo mataka okha ene anapasa misapu. Pakutoma asabuluka masamba, thimize asathumburuka, pakumalisa asabala ngala ya kudzala na mbeu.

²⁹Mbeu zingatokota munthu asazibvuniratu, thangwi wafika n'dzidzi wa kubvuna.”

³⁰Yezu athimiza na kulonga tenepa: “Tinaulandanisa nanji Umambo wa Mulungu? Peno tinausangiza na nsanje wanji?

³¹Walandana na mbeu inacemerwa muxtarda, mbeu ing'ono kakamwe kupiringana mbeu zonsene zinabzaliwa pa mataka.

³²Mbwenye ingabzaliwa isamera mbikula, mbivata kupiringana miti inango. Pontho isakhala na nthawi zikulu kakamwe, mbalame mbazikwanisa kumanga ntsandza mwenemu.”

³³Na tenepo, Yezu akhaapfundzisa fala ya Mulungu na misanje mizinji ninga iyi, ikhakwanisa iwo kubva.

³⁴Nkhabe cikhaapanga Iye mbakhonda kulonga na misanje, mbwenye angakhala ekha ene na anyakupfundza ace, akhaachululira pyonsenene.

³⁵Ntsiku eneyo, mukhadoka dzuwa, Yezu apanga anyakupfundza ace kuti: “Tiwambukeni tiyende ntunda unango wa nyandza.”

³⁶Na tenepo, iwo aisiya mbumba, mbapakira m'bote mukhakhala Yezu mbaenda na Iye. Penepo mabote anango mbakhantowerambo.

³⁷Penepo caoneka conzi cikulu ca mphepo, mabimbi mbakhamenya bote, iyo mbikhatoma dzala na madzi.

³⁸Yezu akhagona pyace n'nduli mwa bote mbakhatsamira nsago. Anyakupfundza ace amulamusa mbampanga tenepa: “Mpfundzisi, imwe nkhabe kutitsalakana kuti tiri kufa?”

³⁹Iye alamuka mbaipwekera mphepo mbalonga kuna nyandza kuti: “Matama! Pfulika” Penepo mphepo yamatama, pontho pyonsene mbapimatamiratu.

⁴⁰Penepo Yezu abvundza anyakupfundza ace kuti: “Thangwi yanji imwe musagopa tenepa? Na lero mudzati kukhala na cikhulupiro?”

⁴¹Iwo akhagopa pikulu pyene mbakhalonga okha-okha tenepa: “Mbani unowu anafikira kubverwa na mphepo na mabimbi ene?”