Read Cibverano Cipsa Cisena Luka 12 Bible Online

Luka 12 - Cibverano Cipsa Cisena bible

Luka 12

¹Pa n'dzidzi unowu ung'ono, pikwi na pikwi pya anthu pyagumanyikana, mpaka kufikira pondana okha-okha. Na tenepo, Yezu, pakutoma apanga anyakupfundza ace kuti: “Cenjerani na ntombwe wa kutupisa mikate wa afarisi. Penepi ndi kubveka kuti: Na uthambi wawo.

²Nkhabe cinthu cidabiswa cinakhonda kudza kaoneka, peno cidabisala mbacikhonda kudza kadziwika.

³Thangwi pyonsene pinalonga imwe n'cibiso-biso pinadza kabveka pakweca. Na pyonsene pinalonga imwe nciwerewere n'nyumba, pinadza kalongwa pa ntsoyi.”

⁴“Yezu athimiza na kulonga kuti: Axamwali anga, Ine ndisakupangani kuti: Lekani kugopa ale anapha manungo, angamala mbacimwana kucita pinango.

⁵Mbwenye Ine, ndinakupangisani ndi ani anafuna imwe kugopa. Gopani ule anacita kuti angamala kupha manungo, ana mphambvu za kuaponya mu infernu. Ande, ndinathimiza na kukupangani kuti: Unowu n'gopeni!

⁶Kodi nkhabe guliswa mbalame zixanu na pikobiri piwiri? Mphapo Mulungu nkhabe ibodzi inaduwala Iye.

⁷Na tsisi yanu ene ya munsolo, yonsene yamala kulengeswa. Lekani kugopa. Imwe musafunika pikulu kakamwe kupiringana mbalame zizinji.

⁸“Yezu alonga pontho kuti: Ule anandicitira umboni pamaso pa anthu, Inembo Mwana wa Munthu, ndinancitirambo umboni pamaso pa anju za Mulungu.

⁹Mbwenye ule anandikhonda pamaso pa anthu, iye anadza kakhondiwambo pamaso pa anju za Mulungu.

¹⁰Onsene ale anandilonga kuipa Ine, Mwana wa Munthu, anadza kalekererwa. Mbwenye ale anaxola Nzimu Wakucena, nkhabe kudza kalekererwa.

¹¹“Mungakwatiwa kwenda n'kati mwa nyumba za kuphemberera peno pamaso pa anyakutonga na pa akulu-akulu a utongi, lekani kunentseka kuti munaatawira tani, peno munalonga tani.

¹²Thangwi pa n'dzidzi unowu, Nzimu Wakucena unakupfundzisani pinafuna imwe kulonga.”

¹³Mamuna m'bodzi akhakhala pakati pa mbumba alonga kuna Yezu kuti: “Mpfundzisi, pangani m'bale wanga kuti ndigawane na iye unthaka udatisiyira baba wathu.”

¹⁴Mbwenye Yezu antawira tenepa: “Mamunawe, mbani adandisankhula kuti ndikhale ntongi wa nseru wanu, peno nyakugawa unthaka wanu?”

¹⁵Na tenepo, Yezu aapanga onsene kuti: “Bveserani. Citani mphole na kuumirwa! Thangwi makhaliro adidi a munthu, hali na kuinjipa kwa pinthu pyace tayu.”

¹⁶Na tenepo, Yezu aapanga nsanje uyu: “Munda wa mamuna m'bodzi m'pfumi wabuluka phoso izinji.

¹⁷Iye atoma kunyerezera mbalonga ekha ene kuti: ‘Ndinacita tani? Ine nkhabe mbuto yakukwanisa kukoya phoso yanga yonsene.’

¹⁸“Na tenepo, iye alonga kuti: ‘Ha! Ndapidziwa pinafuna cita ine. Ndinafudza pyete pyanga pyonsene, mbandimanga pinango pikulu. Mwenemu ndinadza kakoya phoso yanga na pyonsene pina ine.’

¹⁹Ndingamala ndinalonga ndekha ene kuti: ‘Iwe una pyakudya pya kuinjipa m'pyete mwako, pinakwana kuti umale napyo pyaka pizinji. Cincino puma pyako. Dya, mwa pyako, mbutsandzaya!’

²⁰“Mbwenye Mulungu ampanga tenepa: ‘Dzemwawe! Masiku ano iwe unafa. Mbani mphapo anafuna sala na pyonsene pidasasanyira iwe?’ ”

²¹Yezu amalisira na kulonga tenepa: “Penepi ndipyo pinacitika na ale anasasanya mpfuma yawo toera aphedzeke, mbwenye pamaso pa Mulungu mbacherengi.”

²²Penepo Yezu apanga anyakupfundza ace kuti: “Na tenepo, Ine ndisakupangani kuti: Lekani kunentseka na makhaliro anu pa thangwi ya pinafuna imwe kudya, peno na manungo anu pa thangwi ya pinafuna imwe kubvala.

²³Pinafunika pikulu kakamwe ndi moyo kupiringana cakudya, na manungo kupiringana nguwo.

²⁴Lang'anani makhungubwe. Iwo nkhabe kubzala, nkhabe kubvuna, nkhabe pyete pontho nkhabe pikwa. Mbwenye Mulungu asaapasa cakudya. Imwe musafunika pikulu kakamwe kupiringana mbalame!

²⁵Mbani pakati panu, iye mbapifuna pyace, anakwanisa kuthimizira n'dzidzi ubodzi pa moyo wace?

²⁶Mphapo ngakhala imwe nkhabe kukwanisa kucita cing'ono ici basi, thangwi yanji musanentseka na pinango?

²⁷“Lang'anani kukula kunacita maluwa: Iwo nkhabe kuphata basa pontho nkhabe kucita nguwo. Mbwenye Ine ndisakupangani kuti Salomau, na mbiri yonsene ikhali na iye, acimwana kubvalira ninga pidacita maluwa awa.

²⁸Lang'anani, ngakhala Mulungu asabvazika tenepa maluwa a n'tsanga, anacita kuti lero alipo, mangwana asaponyiwa pa moto, ndiye tani kuna imwe, anthu a cikhulupiro cing'ono?

²⁹Lekani kunentseka na kusaka kuti munadyanji, peno munamwanji.

³⁰Thangwi anasaka penepi ndi ale anakhonda kutawira Mulungu. Mbwenye Baba wanu asadziwa pyonsene pinafuna imwe.

³¹Cakutoma sakani Umambo wa Mulungu, pyonsene ipi munadza kapithimizirwa.”

³²Yezu athimiza na kulonga kuti: “Imwe nkumbi ung'ono, lekani kugopa tayu! Thangwi Baba wanu asakomerwa na kukupasani Umambo wace.

³³Gulisani pyonsene pina imwe mukwate kobiri eneyi muipase anyakucherenga. Citani pikhwama pya kuti nkhabe kusakala, mbamukoya mpfuma yanu kudzulu. Kweneku iyo nkhabe kudza kamala. Thangwi kweneku mambava nkhabe kwanisa kuiba, pontho ucenje nkhabe kwanisa kuidya.

³⁴Thangwi panagumanika mpfuma yanu, penepo ndipo panagumanikambo ntima wanu.”

³⁵“Yezu athimiza pontho na kulonga kuti: Khalani mbamudasasanyira na nyale zanu zakugaka.

³⁶Khalani ninga anyabasa anadikhira mbuya wawo, adaenda ku phwandu ya banja, kuti angabwera mbamenya citseko, iwo anfungulire na mwansanga.

³⁷Mbatsandzaye ale anyabasa anagumanwa mbalang'anira na mbuya wawo pakubwera kwace. Ndinakupangani kuti, iye ene mbuya wawo, anasasanyikambo kuti aaphatire basa. Anaapanga kuti akhale pa thando, iye mbabweresa pyakudya mbaapasira.

³⁸Pontho mbatsandzaye anyabasa anagumanwa mbakhalang'anira, mbuya wawo angabwera pa chiti-chiti peno m'bambakuca!

³⁹Mbwenye kumbukani kuti: Mbidakhala mwanacinthu nyumba asaudziwa n'dzidzi unafuna kufika mbava, mbadasiya tayu kuti mbava aswe nyumba yace.

⁴⁰Na imwembo, khalani akusasanyira, thangwi n'dzidzi unakhonda imwe kudikhira, ndiwo unadza kafika Ine, Mwana wa Munthu.”

⁴¹Na tenepo, Pedhru abvundza kuti: “Mbuya, nsanje unowu musapanga ife basi, peno musapangambo anthu onsene?”

⁴²Mbuya atawira tenepa: “Mbani mphapo, nyabasa wakunyindirika na wa ndzeru adaikhwa na mbuya wace kuti aonerere anyabasa andzace, toera kuapasa cakudya n'dzidzi ungakwana?

⁴³Mbatsandzaye nyabasa unowu anagumaniwa mbacita tenepa, pakubwera kwa mbuya wace.

⁴⁴Ndimo mwene ndisakupangani kuti, mbuya wace anadza kan'nyindira kuti aonere mpfuma yace yonsene.

⁴⁵Ndiye tani mphapo nyabasa uyu mbalonga ekha ene kuti: ‘Mbuya wanga ali kudembuka na kubwera,’ mbatoma kumenya anyabasa amuna na akazi, mbadya, mbamwa, mbaledzera pyace.

⁴⁶Penepo, mbuya wace anadza kabwera ntsiku inakhonda iye kun'dikhira, pa n'dzidzi unakhonda iye kudziwa. Iye anamuonesa nyatwa mbamponya m'mbuto ibodzi ene na anyakukhonda kunyindirika.

⁴⁷“Ule nyabasa anadziwa ndi ninji pinafuna mbuya wace, mbwenye mbakhonda kusasanyira kuti acite pinafuna iye, anati aoneswe nyatwa na michamu mizinji.

⁴⁸Mbwenye ule anadodomeka na thangwi yakukhonda kudziwa pinafuna mbuya wace, unowu anaoneswa nyatwa na michamu pang'ono basi. Anapasiwa pizinji anaphembwa pizinji. Ananyindirwa pikulu, anaphembwambo pikulu.

⁴⁹“Yezu athimiza na kulonga kuti: Ine ndabwera kudza kagasa moto pa dziko. Ndi pikhafuna Ine kuti ugake!

⁵⁰Mbwenye ndisatongwa nditambire batixmu ya nyatwa. Na tenepo, ntima wanga nkhabe kukhurudzika, penepi mbapidzati kucitika!

⁵¹Imwe musanyerezera kuti ndabweresa ntendere pa dziko? Nkhabe, sidabweresa ntendere tayu, mbwenye ndabweresa kugawana.

⁵²Thangwi kutomera lero kwenda kutsogolo, mudzi una anthu axanu, anagawana. Atatu anazondana na awiri, awiri anazondana na atatu.

⁵³Baba anadza kazondana na mwana wace wa mamuna, mwana-mamuna anadza kazondana na baba wace. Mai anadza kazondana na mwana wace wankazi, na mwanambo wankazi anadza kazondana na mai wace. Mebzala anadza kazondana na nkwenya wace, nkwenyambo anadza kazondana na mebzala wace.”

⁵⁴Yezu alongambo pontho kuna mbumba kuti: “Imwe mungaona khole mbaikwira kumadokero a dzuwa, musalonga tenepa: ‘Lero mulungu anabvumba,’ iye asabvumbadi.

⁵⁵Mungabva mphepo ya bangwe mbimenya, musalonga tenepa: ‘Lero kuna pisa,’ kunja mbakupisadi.

⁵⁶Imwe anyauthambi! Musadziwa kuchulula pidzindikiro pya kudzulu na pya pantsi. Mphapo ndi thangwi yanji musacimwana kuchulula pidzindikiro pya n'dzidzi uno?

⁵⁷“Yezu athimiza na kulonga tenepa: ‘Thangwi yanji imwe munakhonda dzindikira mwekha ene pinthu pyakulungama?

⁵⁸Ngakhala iwe uli kwenda katongesana na nyamalwa wako ku luwani, saka kusekesana na iye n'njira, toera ndzako akhonde kukukwata kwenda nawe kuna ntongi, iyembo ntongi akupereke kuna nsupai, nsupaimbo mbakufungira n'kaidi.

⁵⁹Ndisakupanga kuti iwe nkhabe kudza kabuluka mwenemu mbudzati kumalisa kulipa mangawa ako onsene.’ ”