Read Cibverano Cipsa Cisena Luka 14 Bible Online

Luka 14 - Cibverano Cipsa Cisena bible

Luka 14

¹Ntsiku inango ya Sabudu, mudapita Yezu n'nyumba mwa nkulu wa afarisi kuti aende kadya, anthu onsene akhamulang'anisa.

²Patsogolo pace pakhakhala na mamuna m'bodzi akhali na nthenda ya kubzimba.

³Penepo, Yezu abvundzisa kuna anyakudziwisa a Mwambo na kuna afarisi kuti: “Kodi mwambo wathu usatawirisa kuwangisa munthu ntsiku ya Sabudu peno nkhabe?”

⁴Mbwenye iwo amatama. Na tenepo, Yezu amphata mamuna manja ace mbamuwangisa, mbampanga kuti ndoko pyako.

⁵Buluka penepo Yezu aabvundza kuti: “Ngakhala m'bodzi wanu ana mwana wace peno ng'ombe yace idagwa mu ncera ntsiku ya Sabudu, nkhabe kwenda kaibulusa na mwansanga?”

⁶Iwo acimwana kuntawira.

⁷Yezu pikhalang'anisa Iye anyaphwandu kusankhula kukhacita iwo mbuto zakutoma pa thando ya kudya, alonga nsanje uyu kuti:

⁸“Ungacemerwa na munthu ku phwandu ya banja, leka kukhala pa mbuto yakutoma. Thangwi panango alipombo unango adacemerwa, munthu wa mbiri kupiringana iwe.

⁹Mphapo, ule adakucemerani pa uwiri wanu funa akupange tenepa: ‘Buluka penepo upase ndzako mbuto.’ Penepo, iwe unakhala na manyadzo, mbuyenda kakhala pa mbuto yakumalisira.

¹⁰Mbwenye iwe ungacemerwa, khala pa mbuto ya kumalisira. Ule adakucemera anabwera kudza kakupanga kuti: ‘Xamwali, bwera kuno kutsogolo.’ Na tenepo, unalemedzeka pikulu pamaso pa onsene adacemerwa pa phwandu.

¹¹Thangwi ule anapikuza, anadza kacepeswa. Ulembo anapicepesa, anadza kakuzwa.”

¹²Buluka penepo, Yezu apanga ule adancemera kuti: “Iwe ungafuna kucita phwandu na masikati, peno na masiku, leka kucemera axamwali ako, peno abale ako, peno a dzindza yako, peno andzako anyakupfuma anakhala na iwe dhuzi pa cisa. Thangwi ntsiku inango, iwo anadza kakucemerambo. Na tenepo, anakubwezera udidi onsene udacita iwe.

¹³Mbwenye iwe ungacita phwandu, cemera anyakucherenga, anyakulamala, anyakuchikama na maboli-boli.

¹⁴Tenepa iwe unadza katsandzaya, thangwi iwo anacimwana kukubwezera pire pidaacitira iwe. Mbwenye, unapaswa muwoni wako pa kulamuka pa kufa kwa anyakulungama.”

¹⁵Munthu m'bodzi akhakhala na iwo pa thando ya kudya, mudabva iye penepi, alonga kuna Yezu kuti: “Mbatsandzaye ale anadza kadya phwandu mu Umambo wa Mulungu.”

¹⁶Mbwenye Yezu alonga kuti: “Mamuna m'bodzi acita phwandu ikulu mbacemeresa anthu azinji.

¹⁷Mudakwana n'dzidzi wa phwandu, atuma nyabasa wace toera aende kapanga ale akhadacemerwa kuti: ‘Bwerani, thangwi pyonsene pyamala kusasanyirwa!’

¹⁸“Mbwenye m'bodzi na m'bodzi atoma kuphemba kulekererwa. Wakutoma alonga tenepa: ‘Ndagula munda wanga, na tenepo ndisafunika ndiyende kauone. Ndisaphemba kuti mundilekerere.’

¹⁹“Unango alonga tenepa: ‘Ndagula ng'ombe khumi zakulima nazo. Funa ndikhazione kuphata kwazo basa. Ndisaphemba kuti mundilekerere.’

²⁰“Unango alonga tenepa: ‘Ndamala kupaswa banja lero. Na thangwi eneyo ndinacimwana kwendako.’

²¹Nyabasa abwerera mbaenda kalonga pyonsene kuna mbuya wace. Na tenepo, mbuya wace aipirwa pikulu kakamwe, mbalonga kuti: ‘Ndoko na mwansanga m'miseu na m'misika ya mu nzinda ukhacemere anyakucherenga, maboli-boli, anyakulamala na anyakuchikama.’

²²“Mudabwerera nyabasa, alonga tenepa: ‘Mbuya, ndamala kucita pyonsene pidandipanga imwe, mbwenye mbuto iciripo basi.’

²³Penepo, mbuya wace ampanga tenepa: ‘Ndoko m'miseu na n'njira zinango za cigwagwa. Akakamize anagumana iwe mwenemu kuti abwere, toera nyumba yanga idzale.

²⁴Mbwenye ine ndisakupangani kuti nkhabe m'bodzi pa ale adacemerwa, anadza kalawira phwandu yanga.’ ”

²⁵Penepo, mwinji wa anthu ukhatowera Yezu. Iye azungunuka mbalonga tenepa:

²⁶“Ule anafuna kunditowera, mbakhonda kundifuna kupiringana baba wace na mai wace, nkazace, anace aamuna na aakazi, abale ace aamuna na aakazi, peno mbakhonda kundifuna kupiringana moyo wace, nkhabe kwanisa kukhala nyakupfundza wanga.

²⁷Pontho ule anakhonda kukwata ntanda wace mbanditowera, nkhabe kwanisa kukhala nyakupfundza wanga.”

²⁸“Ngakhala m'bodzi wanu asanyerezera kumanga nyumba yakulapha pikulu kakamwe, cakutoma nkhabe kukhala pantsi mbatoma kuona pinafuna kubvunga iye, toera angamala aone ngakhala kobiri zace zinakwana?

²⁹Thangwi angakhonda kucita penepi, iye anaikha nchici, mbwenye anacimwana kuimalisa nyumba. Penepo, onsene adaona pidacitika, anatoma kunseka mbalonga tenepa:

³⁰‘Mamuna uyu aitoma nyumba, mbwenye acimwana kuimalisa!’

³¹“Peno mbani mambo, kuti angafuna buluka kwenda ku nkhondo kamenyana na mambo ndzace, pakutoma nkhabe khala pantsi mbatoma kunyerezera kuti na anyankhondo pikwi khumi, ndinakwanisa kumenyana na ule anadza na pikwi makumawiri?

³²Angakhonda kucita penepi, anamalisira kutuma mwana nkate kuna mambo ndzace mbali kutali, kuti abverane na iye pya ntendere.

³³Na tenepo, nkhabe m'bodzi wanu anakwanisa kukhala nyakupfundza wanga, angakhonda kusiya pyonsene pina iye.

³⁴“Munyu ngwadidi, mbwenye ungasuluka unadza kadzipa tani pontho?

³⁵Nkhabe basabve ibodzi inafuna kucita iwo, peno pa mataka, peno kupasa ndimu mataka. Unakwatwa mbutayiwa kunja. “Ule ana makutu a kubva, mbabve.”