Read Cibverano Cipsa Cisena Luka 15 Bible Online

Luka 15 - Cibverano Cipsa Cisena bible

Luka 15

¹Onsene anyakukumbusa misonkho na anyakudawa, akhafendedzera Yezu toera abve pikhalonga Iye.

²Mbwenye afarisi na anyakudziwisa a Mwambo, akhadungunya mbalonga tenepa: “Mamuna uyu asatambira anyakudawa, mbadya na iwo pabodzi!”

³Na tenepo, Yezu aapanga nsanje uyu:

⁴“Mbani pakati panu ana dzana ya mabira, ingataika ibodzi, mbakhonda kwenda kaisaka mpaka kuigumana, mbasiya makumapfemba na mapfemba n'thando?

⁵Angaigumana, asaikwata mbaiyikha pa phewa na kukomerwa,

⁶mbaenda nayo ku nyumba. Angafika, asacemera axamwali ace na andzace a pa cisa, mbalonga tenepa: ‘Tsandzayani pabodzi na ine, thangwi bira yanga ikhadataika, ndaigumana.’

⁷Ine ndisakupangani kuti, ndi sawa-sawambo na kudzulu, Kunagumanika kutsandzaya kukulu kakamwe na thangwi ya nyakudawa m'bodzi adachunyuka kudawa kwace, kupiringana kutsandzaya kukhali na iwo na anthu makumapfemba na apfemba akulungama akusowa mathangwi akuchunyuka.

⁸“Peno mbani nkazi anakhala na kobiri khumi za ndzaya-ndzaya, angataikirwa na ibodzi, mbakhonda gasa nyale, na kupsaira n'nyumba mwace, mbaisaka mpaka kuigumana?

⁹Angaigumana, anacemeresa axamwali ace, na andzace a pa cisa mbaapanga tenepa: ‘Tsandzayani pabodzi na ine, thangwi ndaigumana kobiri yanga ikhadataika.’

¹⁰Ndinakupangani kuti tenepa ndi sawa-sawambo na anju za Mulungu, zisatsandzaya na thangwi ya munthu m'bodzi nyakudawa angachunyuka.”

¹¹Yezu alonga pontho kuti: “Mamuna m'bodzi akhali na anace awiri aamuna.

¹²Mwana wa ng'ono alonga tenepa kuna baba wace: ‘Baba, ndipaseni cincino, phindi yanga ya unthaka.’ Na tenepo, iye aagawaniza anace awiri ene mpfuma yace.

¹³“Mudapita ntsiku pang'ono, mwana wang'ono agumanya pyace pyonsene, mbaenda dziko inango ya kutali. Kweneko aenda kabvunga pyace pyonsene pikhakhala na iye, na makhaliro ace a kuipa akhacita iye.

¹⁴Mudamala iye kubvunga pyace pyonsene, mwaoneka njala ikulu n'dziko eneyo, iye mbatoma kuthabuka.

¹⁵Na thangwi eneyo, asaka basa kwa munthu m'bodzi wa kweneku, munthu unowu mbamuendesa kumunda kwace kuti akhadyese nkhumba.

¹⁶Kweneko, na njala ikakhala na iye, akhafuna kuti adye pyace pikhadya nkhumba, mbwenye na penepyo pyene nkhabe akhampasa.

¹⁷“Ekha-ekha, anyerezera tenepa: ‘Mbangasi anyabasa a baba ana phoso yakukwana, ine ndiri kuno mbandifa na njala!

¹⁸Ndinalamuka mbandibwerera kuna baba wanga, ndikhampange tenepa: Baba, ndadawa kudzulu na kuna imwe.

¹⁹Sidakwana kucemerwa pontho mwana wanu tayu. Nditambireni ninga m'bodzi wa nyabasa wanu.’

²⁰Buluka penepo alamuka mbabwerera pontho kuna baba wace. “Mbali kutali, baba wace amuona. Na kubva ntsisi zikulu na mwana wace, anthamangira mban'khumbatira na kumpsompsona.

²¹“Mwana alonga tenepa: ‘Baba, ndadawa kudzulu na kuna imwe. Sidakwana kuti mundicemere pontho mwana wanu.’

²²“Mbwenye baba apanga anyabasa ace tenepa: ‘Cimbizani! Bweresani nguwo zadidi kakamwe mum'bvazike. Muikheni mphete ibodzi n'cala mwace, mbamumbvazika ntsapato m'myendo mwace.

²³Bweresani pontho mwana ng'ombe wa kunenepa, mumuphe ticite phwandu pontho tisekere.

²⁴Thangwi mwana wanga uyu akhadafa, lero alamuka. Akhadataika, lero agumanika.’ Mbatoma kucita phwandu yawo.

²⁵“Mukhacitwa penepi, mwana wa nkulu akhali ku munda. Mudabwerera iye mbafika dhuzi na pa nyumba, abva anthu ali kuimba mbakhabvina.

²⁶Na tenepo, acemera nyabasa m'bodzi mbam'bvundza kuti: ‘Ndi ninji pinacitika?’

²⁷Nyabasa atawira tenepa: ‘M'bale wako abwera. Baba wako apha mwana ng'ombe wa kunenepa, thangwi antambira wa m'maso pontho na manungo ace akuwanga.’

²⁸“Mwana wa nkulu aipirwa pikulu kakamwe, mbakhonda na kupita kwene. Na tenepo, baba wace abuluka kunja mbakhankakamiza kuti apite.

²⁹Mbwenye iye atawira tenepa: ‘Ndina pyaka pizinji mbandikuphatirani basa ninga bichu mbandikhonda kupwaza mwambo ubodzi wanu. Na tenepo, mudzati kundipasambo mbuzi ene ibodzi, toera ine ndicitembo phwandu na axamwali anga.

³⁰Mbwenye mwana wanu uyu adamala kubvunga pinthu pyanu pyonsene, na akazi anyalukwali, lero abwera, imwe mwam'phera mwana ng'ombe wa kunenepa!’

³¹“Baba antawira tenepa: ‘Mwana wanga, iwe usakhala na ine ntsiku zonsene, pontho pyonsene pina ine mphyakombo.

³²Mbwenye tikhafunika ticite phwandu toera kupangisa kukomerwa kwathu. Thangwi m'bale wako uyu akhadafa, lero alamuka. Akhadataika, lero agumanika.’ ”