Read Cibverano Cipsa Cisena Luka 6 Bible Online

Luka 6 - Cibverano Cipsa Cisena bible

Luka 6

¹Ntsiku ibodzi ya Sabudu, mukhapita Yezu na pakati pa munda wa tirigu, anyakupfundza ace atoma kupuruza tirigu, mbakhaiting'inda na manja awo, mbakhadya.

²Na tenepo, afarisi anango abvundzisa mbalonga kuti: “Thangwi yanji imwe musacita pire pinakhondeswa kucita ntsiku ya Sabudu?”

³Yezu aatawira tenepa: “Kodi imwe cipo mudzati kuona pidalembwa na thangwi ya pidacita Dhavidhi na andzace, mudabva iwo njala?

⁴Iye apita N'nyumba ya Mulungu, akwata mikate ya ntsembe, mbadya pontho mbapasambo andzace. Mbwenye anatawirirwa kudya mikate eneyo mbanyantsembe basi.”

⁵Na tenepo, Yezu aapanga kuti: “Ine, Mwana wa Munthu, ndine Mbuya wa Sabudu.”

⁶Nsabudu inango, Yezu apita n'nyumba ya kuphemberera mbatoma kupfundzisa. Mwenemu mukhali na mamuna m'bodzi akhadalamala djanja ya nkono wa madyo.

⁷Afarisi na anyakudziwisa a Mwambo, akhasaka thangwi ya kupumpha nayo Yezu. Na tenepo, akhamulang'anisa, toera amuone ngakhala Iye anamuwangisa ntsiku ya Sabudu.

⁸Mbwenye Yezu akhadziwa manyerezero awo. Na tenepo, ampanga mamuna nyakulamala manja kuti: “Lamuka, bwera pano pakati.” Iye alamuka mbakhala dzololo.

⁹Penepo Yezu aapanga kuti: “Ine ndisafuna ndikubvundzeni ici: Ndi ninji pinatawirirwa kucita ntsiku ya Sabudu? Kucita udidi, peno kucita uipi? Kupulumusa munthu peno kunsiya mbafa?”

¹⁰Na tenepo, Yezu alang'ana onsene akhali n'khundu mwace, mbampanga mamuna kuti: “Fungula djanja yako.” Iye afungula djanja yace, iyo mbiwanga.

¹¹Mbwenye anthu aipirwa pikulu kakamwe, mbatoma kuketesana okha-okha na kusaka kuti ndi ninji pinafuna iwo kuncita Yezu.

¹²Pa ntsiku zenezo, Yezu akwira pa phiri kwenda kaphembera. Penepo, akhala masiku onsene mbakhaphembera Mulungu.

¹³Pidaca kunja, Yezu acemera anyakupfundza ace, mbasankhula khumi na awiri pakati pawo. Enewa, Yezu aathula apoxtolo. Iwo madzina awo mbawa:

¹⁴Simau, adapasa Iye dzina ya Pedhru, na Andereya m'bale wace Pedhru, Tiyago na Juwau, Filipi na Bhatolomeu,

¹⁵Mateu na Tomasi, Tiyago mwana wa Alufeu, Simau nyakukakamira mwambo wa Mulungu,

¹⁶Djuda mwana wa Tiyago, pontho na Djuda Xikariyoti, ule adadza kasandukira Yezu.

¹⁷Yezu achita pa phiri pabodzi pene na iwo, mbalimira pa mbuto ya kusoweka makata. Penepo akhalipo anyakupfundza ace azinji, na mwinji wa anthu ukhabuluka mu Djudeya monsene, mu Djerusalema na anthu akhali dhuzi na gombe ya Tiru na Sidhoni.

¹⁸Iwo akhadabwera kuna Yezu toera kudza kamubva na kukondziwa nthenda zawo. Ale akhanentseka na mizimu ya kuipa akhawangiswambo.

¹⁹Anthu onsene akhasaka kun'khuya, thangwi mphambvu zikhabuluka muna Yezu zikhawangisa onsene.

²⁰Yezu alang'ana anyakupfundza ace mbaapanga kuti: “Anyakutsandzaya ndimwe anyakucherenga, thangwi Umambo wa Mulungu ndi wanu.

²¹Anyakutsandzaya ndimwe muna njala cincino, thangwi munati mukhute. Anyakutsandzaya ndimwe muna lira cincino, thangwi munati museke.

²²Anyakutsandzaya ndimwe, iwo angakuidani, angakuthamangisani, angakutiKhanani, mbakhonda dzina yanu kuti ndimwe anthu a kuipa, na thangwi ya Ine, Mwana wa Munthu.

²³“Tsandzayani mbamukomerwa pikulu kakamwe ntsiku eneyi, thangwi kudzulu mwakoyerwa muwoni wanu ukulu kakamwe. Thangwi a mbuya awo anthu enewa acitambo pibodzi-bodzi kuna maporofeta.

²⁴“Mbwenye muna nyatwa imwe apfumi, thangwi mwamala matamizwa kale.

²⁵Muna nyatwa imwe mudakhuta cincino, thangwi munati mukhale na njala. Muna nyatwa imwe munaseka cincino, thangwi munati mubulire mbumulira.

²⁶Muna nyatwa imwe, mungasimbwa na anthu onsene, thangwi a mbuya awo asimbambo maporofeta a uthambi.”

²⁷“Mbwenye Ine ndisakupangani imwe munandibva kuti: Funani anyamalwa anu, citirani udidi kuna ale anakuzondani.

²⁸Acitireni udidi ale anakupasani dzedze, phembererani ale anakucitani kuipa.

²⁹Munthu anakumenya phutu ibodzi, mpasembo phutu inango. Munthu anakukwatira kapoti wako, nsiye akukwatirembo na kamiza ene ya m'bwalo.

³⁰Onsene anakuphemba cinthu apase. Pontho munthu anakukwatira cako leka kum'phemba kuti akubwezere.

³¹Citirani andzanu pyonsene pire pinafuna imwe kuti iwo akucitirenimbo.

³²“Ngakhala imwe musafuna ale anakufunani basi, ndi muwoni wanji unadikhira imwe kutambira kuna Mulungu? Thangwi anyakudawa asafunambo ale anaafuna.

³³Pontho ngakhala imwe musacita udidi kuna ale basi anakucitani udidi, ndi muwoni wanji unadikhira imwe kutambira kuna Mulungu? Thangwi anthu anyakudawa asacitambo pibodzi-bodzi.

³⁴Pontho, ngakhala imwe musabwerekesa ale basi anadikhira imwe kuti iwo anadza kakubwerezerani, ndi muwoni wanji unadikhira imwe kutambira kuna Mulungu? Thangwi anyakudawa asabwerekesanambo, mbadikhira kuti abwezerwe pyonsene.

³⁵Mphapo funani anyamalwa anu, acitireni udidi, muabwerekese mbamukhonda kudikhira kubwezerwa cinthu. Na tenepo, muwoni wanu unadza kakhala ukulu, pontho imwe munadza kakhala ana a Mulungu wa kudzulu kakamwe, thangwi Iye ndi wadidi kuna ale anakhonda kucita takhuta na anyakuipa mitima.

³⁶Khalani anthu a ntsisi ninga Baba wanu ndi wa ntsisi.

³⁷“Lekani kutonga andzanu, tenepa imwe nkhabe kudza katongwa na Mulungu. Lekani kukonesa andzanu, na tenepo imwe nkhabe kudza kakoneswa na Mulungu. Lekererani andzanu, tenepa imwe munadza kalekererwambo na Mulungu.

³⁸Pasani andzanu, tenepa Mulungu anadza kakupasanimbo na n'dida wadidi, wakukhomerwa mbautsindirwa, pontho wa kudzala na mubvu. Thangwi na n'dida ubodzi-bodzi unapimira imwe andzanu, munadza kapimirwambo na n'dida unowu.”

³⁹Pontho Yezu alonga nsanje uyu: “Kodi pisacitika boli-boli kuphatana nsenzi boli-boli ndzace? Mu uwiri mwawo nkhabe kudza kagwa n'djenje?

⁴⁰Nkhabe nyakupfundza anapita mpfundzisi wace. Mbwenye iye nyakupfundza, angamala kupfundzambo pyonsene mwadidi, anakhala sawa-sawa na mpfundzisi wace.

⁴¹“Thangwi yanji usalang'ana cirombo cing'ono ciri n'diso mwa m'bale wako, mbukhonda kuona nkhuni iri n'diso mwako?

⁴²Unakwanisa tani kupanga m'bale wako kuti: ‘M'bale, ndisiye ndikubuluse cirombo ciri n'diso mwako,’ ngakhala iwe nkhabe kwanisa kuona nkhuni iri n'diso mwako? Nyauthambi! Pakutoma bulusa nkhuni iri n'diso mwako, na tenepo iwe unaona mwadidi toera ubulusembo cirombo ciri n'diso mwa m'bale wako.”

⁴³“Nkhabe muti wadidi unabala misapu ya kuipa, peno muti wa kuipa, unabala misapu yadidi.

⁴⁴Thangwi miti yonsene isadziwika na misapu yawo. Nkhabe munthu anachoda malembe pa miti ya minga, peno mauva pa psepse.

⁴⁵Munthu wadidi, asabulusa pinthu pyadidi pidakoya iye muntima mwace. Munthu wa kuipa, asabulusa pinthu pyakuipa pidakoya iye muntima mwace. Thangwi mulomo wace usalonga pire pidadzala muntima mwace.

⁴⁶“Thangwi yanji imwe musandicemera ‘Mbuya, Mbuya’ mbamukhonda kucita pinalonga Ine?

⁴⁷Ine ndinakupangisani mbani adalandana na ule anabwera kuna Ine, mbabva mafala anga na kuacita.

⁴⁸Iye alandana na mamuna m'bodzi adamanga nyumba yace pa mwala. Akumba madjenje akuzika, mbaikha nchici. Madzi adzala mbamenya nyumba, mbwenye iyo hidatekenyeka tayu, thangwi ikhadamangwa mwadidi.

⁴⁹Mbwenye ule anabva mafala anga mbakhonda kuacita, alandana na mamuna adamanga nyumba yace pa mataka mbakhonda kuikumbira mwadidi na kuiyikha nchici. Na tenepo, madzi pidamenya iwo nyumba ire, iyo yagwa, mbifudzikiratu yonsene.”