Read Cibverano Cipsa Cisena Juwau 10 Bible Online

Juwau 10 - Cibverano Cipsa Cisena bible

Juwau 10

¹“Ndimo mwene, ndimo mwene ndisakupangani kuti ule anakhonda kupita na pa nsuwo n'thanga ya mabira, mbwenye mbakwira na panango, ndi mbava pontho ndi phanga.

²Ule anapita na pa nsuwo ndi nkumbidzi wa mabira.

³Nyakuonera pa nsuwo asanfungulira, pontho mabira asabva fala yace. Iye asacemera mabira ace na madzina awo, mbaakwata mbabuluka na iwo kunja.

⁴Angamala kuabulusa kunja mabira ace onsene, asapita patsogolo pawo, iwo mbantowera,[32] thangwi fala yace asaidziwa.

⁵Mbwenye cipo anadza katowera munthu anakhonda iwo kudziwa. Anan'thawa, thangwi iwo nkhabe kudzindikira fala ya unango.”

⁶Yezu aapanga nsanje uyu, mbwenye iwo hadapibvesesa pikhafuna longa Yezu kuna iwo tayu.

⁷Na tenepo Yezu alonga pontho kuti: “Ndimo mwene, ndimo mwene, ndisakupangani kuti: Ine ndine nsuwo wa mabira.

⁸Onsene adabwera Ine mbindidzati kufika, akhali mambava na mapanga, mbwenye mabira hadaabvera tayu.

⁹Ine ndine nsuwo. Anapita na pana Ine, anapulumuka. Anapita mbabuluka, mbagumana thongwe.

¹⁰Mbava asabwera kudza kaba, kupha na kufudza basi ene. Mbwenye Ine ndabwera toera mabira akhale na upulumuki, upulumuki wakukwana.

¹¹“Ine ndine nkumbidzi wadidi. Nkumbidzi wadidi asafera mabira ace.

¹²Nyabasa si nkumbidzi tayu. Pontho mabira si ace tayu. Na thangwi eneyo, angaona m'bindzi uli kufika, iye asaasiya mabira mbathawa. Na tenepo, m'bindzi unaphata mabira mbamala kuabalalisa.

¹³Iye asathawa, thangwi ndi nyabasa, pontho iye nkhabe tsalakana mabira.

¹⁴“Ine ndine nkumbidzi wadidi. Mabira anga ndisaadziwa pontho iwo asandidziwambo,

¹⁵sawa-sawa ninga Baba asandidziwa, Ine ndisan'dziwambo Baba, pontho ndisaperekeka toera kufera mabira anga.

¹⁶Ndina mabira anango adakhonda kukhala a thanga ino. Pisafunika kuti ndiakumbizembo. Iwo anadza kabva fala yanga, pontho unadza kakhala nkumbi ubodzi na nkumbidzi m'bodzi basi.

¹⁷Ndi thangwi eneyo Baba wanga asandifuna, thangwi ndisapereka moyo wanga, toera ndingamala ndiukwate pontho.

¹⁸Nkhabe munthu anafuna kundipokosera upulumuki wanga, mbwenye Ine ndinaupereka na kufuna kwanga. Ndina mphambvu za utongi zakupereka upulumuki wanga na zakuukwata pontho. Ntemo unowu ndautambira kuna Baba wanga.”

¹⁹Na thangwi ya mafala enewa madjuda atoma kugawika pontho pakati pawo.

²⁰Azinji awo akhalonga tenepa: “Iye ana dimonyo, ampasa udzemwa. Thangwi yanji musam'bvesera?”

²¹Mbwenye anango akhalonga tenepa: “Mafala awa, si a munthu ana dimonyo tayu. Dimonyo anakwanisa fungula maso a maboli-boli?”

²²N'Djerusalema mukhali na phwandu ya kuceneswa kwa Nyumba ya Mulungu. Ukhali n'dzidzi wa khoni.

²³Yezu akhali mu Nyumba ya Mulungu mbakhafamba n'khonde ya Salomau.

²⁴Madjuda agumanyikana n'khundu mwace, mbalonga tenepa: “Ngakhala iwe ndiwe Kirixtu tipange pakweca. Unatisiya mbatikhala anthu akupenula mpaka lini?”

²⁵Yezu atawira tenepa: “Ine ndakupangani kale, mbwenye imwe nkhabe tawira. Mabasa anacita Ine na dzina ya Baba wanga, asandicitira umboni.

²⁶Mbwenye imwe nkhabe tawira, thangwi simwe mabira anga tayu.

²⁷Mabira anga asabva fala yanga. Ine ndisaadziwa, pontho iwo asanditowera.

²⁸Ndinaapasa upulumuki wakukhonda kumala, pontho iwo na lini anadza kafa. Nkhabe munthu anafuna kundipokosera iwo m'manja mwanga.

²⁹Baba wanga adandipasa mabira enewa, ndi nkulu kupiringana onsene.[33] Nkhabe munthu anakwanisa kuapokosa m'manja mwa Baba wanga.

³⁰Ine na Baba ndife m'bodzi.”

³¹Madjuda alokota pontho myala toera am'menye nayo,

³²mbwenye Yezu aapanga tenepa: “Ine ndakupangisani mabasa mazinji adidi adabuluka kuna Baba wanga, ndi basa ipi inafuna kundimenyera imwe na myala?”

³³Madjuda atawira tenepa: “Ife nkhabe kukumenyera thangwi ya mabasa adidi tayu, mbwenye na thangwi ya kuxola Mulungu. Thangwi Iwe ndiwe munthu, mbwenye usapicita ninga Mulungu.”

³⁴[34]Yezu aatawira tenepa: “Mu Mwambo wanu mudalembwa tayu kuti: ‘Ine ndalonga kuti: Imwe ndimwe ninga Mulungu?’

³⁵Mphapo ngakhala iye acemera ‘ninga Mulungu’ kuna ale adatumirwa fala ya Mulungu, (Pidalembwa m'Bukhu ya Mulungu nkhabe kumala.)

³⁶Ndiye tani kuna ule adaperekeka kuna Baba mbantuma pa dziko? Musandilongeranji kuti ndaxola Mulungu thangwi pidalonga Ine kuti: Ndine Mwana wa Mulungu?

³⁷Ine ndingakhonda kucita mabasa a Baba wanga, lekani kunditawira.

³⁸Mbwenye ngakhala ndisaacita, mungacimwana kutawira Ine, tawirani mabasa, toera mukwanise kudziwa kuti Baba ali muna Ine, Ine ndiri muna Baba.”

³⁹Iwo akhasaka pontho kum'phata, mbwenye Yezu abuluka pakati pawo.

⁴⁰Na tenepo, Yezu awambuka pontho nyandza ya Djorodani, mbaenda ku mbuto ikhatambirisa Juwau batixmu kale ene, mbakhala kweneku.

⁴¹Anthu azinji aenda mpaka kukhakhala Iye, mbalonga tenepa: “Juwau nkhabe cidzindikiro ca cirengo cibodzi cidacita iye, mbwenye pyonsene pidalonga iye na thangwi ya mamuna uyu, ndimodi.”

⁴²Penepo anthu azinji atawira Yezu.