Read Cibverano Cipsa Cisena Juwau 12 Bible Online

Juwau 12 - Cibverano Cipsa Cisena bible

Juwau 12

¹Zikhadasala ntsiku zitanthatu kuti idyiwe phwandu ya Paxkwa. Yezu aenda ku Bhetanya kukhakhala Lazaru, ule akhadalamusa iye pa kufa.

²Penepo iwo ancitira siyari, Marita mbakhan'dzesera pyakudya. Lazaru akhali na anthu pabodzi na Yezu pa thando ya kudya.

³Na tenepo, Mariya akwata ntete wace wa mafuta akudzola akununkhira a nardu wakukhonda kubvungazwa,[38] a ntengo ukulu. Iye adzoza na iwo myendo ya Yezu, mbampukuta na tsisi yace. Nyumba yonsene yadzala na khwema ya mafuta.

⁴Mbwenye nyakupfundza wace m'bodzi anacemerwa Djuda Xikariyoti, ule adadza kansandukira, alonga tenepa:

⁵“Thangwi yanji mafuta enewa akununkhira aleka kuagulisa na ntengo wa madzana matatu a kobiri ya parata,[39] kobiri eneyo mbipaswa anyakucherenga?”

⁶Djuda alonga penepi si ntsisi na anyakucherenga tayu, mbwenye ndi thangwi iye akhali mbava. Ndiye akhali na cikhwama ca kobiri, mbakhabulusa kobiri ikhakoiwa mwenemu.

⁷Yezu alonga tenepa: “Nsiyeni pyace. Penepi mbapikoyere ntsiku ya kuikhwa kwanga n'nthumbi.

⁸Thangwi anyakucherenga imwe munakhala na iwo ntsiku zonsene, mbwenye Ine sinakhala na imwe ntsiku zonsene tayu.”

⁹Na tenepo, mwinji ukulu wa madjuda pidadzindikira iwo kuti Yezu ali kweneko, abwera. Iwo akhadzera Yezu basi tayu, mbwenye akhadzambo kaona Lazaru, ule akhadalamuswa na Yezu pa kufa.

¹⁰Mbwenye akulu aanyantsembe abverana kuti aphembo Lazaru,

¹¹thangwi azinji madjuda na thangwi ya Lazaru, akhabuluka kuna iwo mbakhatawira Yezu.

¹²Mangwana mwace, mwinji ukulu wa anthu ukhadadza ku phwandu ya Paxkwa, wabva kuti Yezu ali kufika mu Djerusalema.

¹³[40]Na thangwi eneyo, akwata masandzu a micindu mbaenda kantambira, mbakhakhuwa tenepa: “Hosana!” “Mbasimbwe ule anadza na dzina ya Mbuya!” “Mbasimbwe Mambo wa Izarayeli!”

¹⁴Yezu agumana mwana buru, mbampakira pa nsana pace, ninga mukhadalembwa ipyo m'Bukhu ya Mulungu kuti:

¹⁵“[41]Leka gopa, iwe nzinda![42] wa Siyau. Lang'ana Mambo wako ali kudza mbapakira padzulu pa mwana buru.”

¹⁶Pakutoma, anyakupfundza ace hakhapidziwa penepi tayu. Mbwenye mudadza kapaswa mbiri Yezu, ndipo padakumbuka iwo kuti pinthu penepi pikhadalembwa na thangwi yace, pontho pyadza kacitika kuna Iye.

¹⁷Mwinji wa anthu ukhakhala na Yezu pa n'dzidzi ukhapanga iye Lazaru kuti abuluke n'nthumbi mbamulamusa pa kufa, ndiwo ukhaenda mbulonga pidacitika.

¹⁸Anthu azinji, na kubva mbapilongwa kuti Yezu ndiye akhadacita cidzindikiro ca cirengo ceneci, aenda kaonana na iye.

¹⁹Na tenepo, afarisi akhalonga okha-okha kuti: “Nkhabe cinthu cidakwanisa ife. Lang'anani, anthu onsene ali kwenda n'nduli mwace.”

²⁰Pakati pa anthu ale akhadaenda kalambira Mulungu pa phwandu ya Paxkwa, akhalipo angasi adakhonda kukhala agerego.

²¹Iwo afendedzera Filipi, akhali wa ku Bhetisaidha ya Galileya, mbam'phemba tenepa: “Mbuya, tisafuna tione Yezu.”

²²Filipi aenda kapilonga kuna Andereya. Andereya na Filipi mbapifikisa kuna Yezu.

²³Yezu aatawira tenepa: “Wafika n'dzidzi wakupaswa mbiri Ine, Mwana wa Munthu.

²⁴Ndimo mwene, ndimo mwene ndisakupangani kuti, mbeu ya tirigu ingakhonda kugwa pa mataka mbikhonda kufa, inakhala yokha basi. Mbwenye ingafa, inabala misapu mizinji.

²⁵Ule anafuna moyo wace, anauluza. Mbwenye ule anazonda moyo wace pantsi pano, anati aukoyerwe upulumuki wakukhonda kumala.

²⁶Ule anandiphatira basa, asafunika anditowere. Panakhala Ine, nyabasa wanga ali penepombo. Pontho ule anandiphatira basa, anati asimbwe na Baba wanga.

²⁷“Cincino ntima wanga wanentseka pikulu kakamwe. Ndinalonganji? ‘Baba ndipulumuseni pa n'dzidzi uno?’ Nkhabe. Ine ndadzera penepi, ndadzera n'dzidzi unowu wa nyatwa.

²⁸Baba, pasani mbiri dzina yanu!” Na tenepo, kudzulu kwabveka fala ikhalonga kuti: “Ine ndaipasa kale mbiri, pontho ndinadza kaipasa pontho mbiri.”

²⁹Mwinji wa anthu ukhali penepo, mudabva iwo fala eneyi, alonga kuti ndi njazi. Anango akhalonga kuti ndi anju adalonga.

³⁰Yezu alonga tenepa: “Fala iyi yabveka thangwi yanu, si thangwi yanga tayu.

³¹Wafika n'dzidzi wa kuti dziko ino itongwe. Cincino anathamangiswa nkulu wa dziko ino.

³²Mbwenye Ine ndingadza kathukulwa pantsi pano, ndinacita kuti anthu onsene akundike adze kuna Ine.”

³³Yezu alonga penepi, akhafuna pangisa mafero akhafuna cita Iye.

³⁴Anthu azinji alonga tenepa: “Mwambo usatipfundzisa kuti Kirixtu anakhala kwenda na kwenda. Usalongeranji pontho kuti Mwana wa Munthu asafunika athukulwe? Ndi ani mwana wa munthu unowu?”

³⁵Na tenepo, Yezu aapanga kuti: “Cieza cinakhala na imwe pa n'dzidzi ung'ono basi. Fambani, cieza mbiciripo, toera mukhonde kuphatwa na cidima. Ule anafamba n'cidima nkhabe dziwa nkhupi kunaenda iye.

³⁶Cieza mbiciri na imwe, khulupirani cieza, toera mukhale ana a cieza.” Pakumala kulonga penepi, Yezu abuluka pyace, mbabisala.

³⁷Na pidzindikiro pyonsene pya pirengo pikhacita Iye pamaso pawo, iwo akhonda kuntawira.

³⁸[43]Penepi pyacitika toera kusimbisa mafala adalonga mporofeta Izaya kuti: “Mbuya, mbani adatawira pikhalonga ife, pontho mbani adapangizwa mphambvu zanu?”

³⁹Na thangwi eneyo akhacimwana kutawira, thangwi Izaya akhadalonga pontho kuti:

⁴⁰“[44]Aafunga maso awo pontho mbaaumisa mitima yawo, toera akhonde kuona na maso, pontho mbapikhonda kupita muntima mwawo, mbacimwana zungunuka kuna Ine, Ine mbindiawangisa.”

⁴¹Izaya alonga penepi thangwi akhaiona kale mbiri ya Kirixtu, pontho mbalonga na thangwi ya Kirixtu.

⁴²Pa pyonsene ipi, na akulu ene azinji a madjuda antawira Yezu. Mbwenye na thangwi ya afarisi, akhacimwana kupangisa pakweca kukhulupira kwawo, na kugopa kuti anadza kathamangiswa n'nyumba ya kuphembera.

⁴³Thangwi akhafuna pikulu kakamwe mbiri ya anthu, kupiringana Mbiri ya Mulungu.

⁴⁴Na tenepo, Yezu alonga na mphambvu kuti: “Ule ananditawira, asatawira Ine basi tayu, mbwenye asatawira ule adandituma.

⁴⁵Ule anandiona, asaonambo ule adandituma.

⁴⁶Ine ndabwera pa dziko ninga cieza, toera onsene ale ananditawira akhonde kukhala n'cidima.

⁴⁷“Munthu anabva mafala anga mbakhonda kuakoya, Ine nkhabe kuntonga. Thangwi Ine sidabwera kudza katonga dziko tayu, mbwenye ndabwera kudza kaipulumusa.

⁴⁸Alipo nyakutonga miseru m'bodzi kuna ale anandikhonda, na kuna ale anakhonda kutawira mafala anga. Fala ibodzi-bodzi idalonga Ine, ndiyo inadza kankonesa ntsiku yakumalisa.

⁴⁹Thangwi Ine sidalonga pya munsolo mwanga tayu, mbwenye Baba adandituma, ndiye adandipanga kuti ndilonge pinakupangani Ine na pinalonga Ine.

⁵⁰Ndisadziwa kuti ntemo wace ndi upulumuki wakukhonda kumala. Na tenepo, pinalonga Ine, ndisapilonga ninga mudapipangwa Ine na Baba kuti ndilonge.”