Read Cibverano Cipsa Cisena Juwau 7 Bible Online

Juwau 7 - Cibverano Cipsa Cisena bible

Juwau 7

¹Pakumala penepyo, Yezu atoma kufamba mu Galileya. Iye akhakhonda kufamba mu Djudeya, thangwi kweneko madjuda akhafuna kumupha.

²Mbwenye dhuzi na kukwana n'dzidzi wa Phwandu ya Makumbi,[24] ya madjuda

³abale ace Yezu ampanga tenepa: “Iwe usafunika ubuluke pano uyende ku Djudeya, toera anyakupfundza ako akwanise kuona mabasa anacita iwe.

⁴Thangwi nkhabe munthu anafuna kubvekera, mbacita pinthu n'cibiso-biso. Mphapo iwe usacita pinthu penepi, pangizika kuna anthu.”

⁵Thangwi na abale ace ene hakhantawira tayu.

⁶Na tenepo, Yezu aapanga kuti: “N'dzidzi wanga udzati kukwana, mbwenye kwa imwe midzidzi yonsene ndi yadidi.

⁷Anthu a padziko ino nkhabe kwanisa kukuzondani, mbwenye Ine asandizonda thangwi ndisaalongera kuti pinacita iwo mphyakuipa.

⁸Ndokoni ndimwe ku phwandu. Ine sinendako ku phwandu eneyi tayu, thangwi n'dzidzi wanga udzati kukwana.”

⁹Yezu mudamala Iye kulonga penepi, asala mu Galileya.

¹⁰Mbwenye abale ace pidamala iwo kwenda ku phwandu, iye aendambo n'cibiso-biso mbakhonda kupangizika.

¹¹Pa phwandu, madjuda akhansaka Yezu mbakhabvundzisa kuti: “Mamuna ule ali kupi?”

¹²Pakati pa mbumba, azinji akhadungunya nciwerewere na thangwi yace. Anango akhalonga kuti: “Iye ndi munthu wadidi.” Anango akhatawira kuti: “Nkhabe, Iye asanyengeza mbumba.”

¹³Mbwenye nkhabe akhamulonga pakweca, thangwi akhagopa atsogoleri a madjuda.

¹⁴Pakati pa phwandu, Yezu aenda ku Nyumba ya Mulungu, mbatoma kupfundzisa.

¹⁵Madjuda adzumatirwa, mbabvundza kuti: “Mamuna uyu asadziwa tani pinthu penepi, iye pfundza nkhabe?”

¹⁶Yezu aatawira kuti: “Pinapfundzisa Ine si pyanga tayu. Piri kubuluka kuna ule adandituma.

¹⁷Munthu anafuna kucita kufuna kwa Mulungu, anadzindikira ngakhala pinapfundzisa Ine pyabuluka kuna Mulungu, peno ndisalonga pyanga ndekha.

¹⁸Ule anapilongera ekha ene, asasaka mbiri yace. Mbwenye ule anasaka mbiri ya ule adantuma, unowu ndi wa ndimo mwene. Nkhabe ca uthambi ciri muna iye.

¹⁹Mozesi adakupasani Mwambo tayu? Mphapo nkhabe m'bodzi wanu anatoweza Mwambo. Thangwi yanji imwe musasaka kundipha?”

²⁰Mwinji wa anthu antawira tenepa: “Iwe una dimonyo. Mbani asasaka kukupha?”

²¹Yezu aapanga kuti: “Ndacita cirengo cibodzi, imwe monsene mwadzumatirwa.

²²Na tenepo, imwe musasidza ana anu acimuna ntsiku ya Sabudu, thangwi Mozesi akusiyirani mwambo unowu. (Mbwenye adatoma na penepi ndi a mbuya anu, si Mozesi tayu.)

²³Mphapo ngakhala musasidza ana anu acimuna ntsiku ya Sabudu toera kutoweza mwambo wa Mozesi, thangwi yanji musaipirwa na pidawangisa Ine manungo onsene a munthu ntsiku ya Sabudu?

²⁴Lekani kutonga mbamulang'ana nkhope, mbwenye tongani mwakulungama.”

²⁵Na tenepo, anthu anango a ku Djerusalema atoma kubvundza kuti: “Siye uyu tayu mamuna anasaka iwo kuti amuphe?

²⁶Iye ali pano mbalonga pakweca, iwo nkhabe kulonga na iye cinthu. Penepi nkhulongera kuti akulu autongi adza kantawira kuti iye ndiyedi Kirixtu?

²⁷Mbwenye ife tisan'dziwa ngwa kupi mamuna unowu. Kirixtu angadza kabwera, nkhabe anadza kan'dziwa ndi wa kupi.”

²⁸Pa n'dzidzi ukhapfundzisa iye pa thando ya Nyumba ya Mulungu, Yezu akhuwa mbalonga kuti: “Ande, imwe musandidziwa, pontho musadziwa ndine wa kupi. Ine sidabwera na kufuna kwanga tayu, mbwenye ule adandituma ndi wa ndimo mwene. Imwe nkhabe kun'dziwa.

²⁹Mbwenye Ine ndisan'dziwa thangwi ndabuluka kuna Iye, pontho Iye ndiye adandituma.”

³⁰Na tenepo akhafuna kum'manga mbwenye nkhabe m'bodzi adamphata, thangwi n'dzidzi wace ukhadakwana tayu.

³¹Anthu azinji pakati pa mbumba atawira Yezu. Pontho iwo alonga kuti: “Kirixtu angadza kabwera anacita pidzindikiro pya pirengo pizinji kupiringana pidacita mamuna uyu?”

³²Afarisi abva mbumba mbikhadungunya pinthu penepi na thangwi ya Yezu. Na tenepo akulu aanyantsembe pabodzi na afarisi, atuma ale akhaonerera Nyumba ya Mulungu toera aende kam'mange.

³³Yezu aapanga tenepa: “Ndinakhala pontho na imwe n'dzidzi ung'ono basi. Buluka penepo ndinenda kuna ule adandituma.

³⁴Imwe munadza kandisaka, mbwenye nkhabe kudza kandigumana. Kunakhala Ine, imwe nkhabe kwanisa kwendako.”

³⁵Madjuda akhalonga okha-okha kuti: “Mamuna unowu ndi kupi kunafuna kwenda iye mbaticimwana kun'gumana? Kodi ali kwenda kwa madjuda adamala balalika mbabvungazikana na ale adakhonda kukhala madjuda toera akhaapfundzise?

³⁶Akhafuna kulonganji iye na mafala a kuti: ‘Imwe munadza kandisaka, mbwenye nkhabe kudza kandigumana’, pontho ‘Kunafuna khala Ine, imwe nkhabe kwanisa kwendako?’ ”

³⁷Pa ntsiku yakumalisa, ntsiku ikulu kakamwe ya phwandu, Yezu alimira mbalonga na kugaluza kuti: “Ngakhala alipo ana nyota mbabwere kuna Ine amwe.

³⁸Ule ananditawira, ninga kulonga kunacita Bukhu ya Mulungu, n'kati mwace munabuluka mikulo ya kuwewa madzi a upulumuki.”

³⁹Na mafala enewa, Yezu akhafuna kulonga kuti onsene anantawira, anadza katambira Nzimu Wakucena. Thangwi mpaka n'dzidzi unowu, Nzimu Wakucena ukhadadzati kutumwa, thangwi Yezu akhadzati kupaswa mbiri.

⁴⁰Na tenepo, anthu azinji mudabva iwo mafala ace alonga kuti: “Ndimo mwenedi, mamuna uyu ndi Mporofeta.”

⁴¹Anango akhalonga tenepa: “Iye ndi Kirixtu.” Mbwenye anango akhabvundza kuti: “Kirixtu buluka ku Galileya?

⁴²[25]Bukhu ya Mulungu nkhabe kulonga kuti Kirixtu anabuluka ku dzindza ya Dhavidhi, ku nzinda wa Bheleya, kukhakhala Dhavidhi?”

⁴³Na tenepo, mbumba yagawika na thangwi ya Yezu.

⁴⁴Anango akhafuna kum'manga, mbwenye nkhabe m'bodzi adamphata.

⁴⁵Pakumalisa, anyakuonera Nyumba ya Mulungu abwerera kuna akulu aanyantsembe na kuna afarisi. Penepo anyantsembe na afarisi aabvundza kuti: “Thangwi yanji imwe mwakhonda kudza na iye?”

⁴⁶Anyakuonera atawira tenepa: “Cipo tidzati kubva munthu unango mbalonga ninga Iye.”

⁴⁷Afarisi aabvundza tenepa: “Kodi na imwe ene mwamala nyengezwambo?

⁴⁸Penepo alipo nkulu m'bodzi wa utongi peno wa afarisi adatawirambo? Nkhabe!

⁴⁹Mbwenye anthu awa akupwazika akukhonda dziwa mwambo, anapaswa dzedze na Mulungu.”

⁵⁰Nikodhemu, nkulu m'bodzi wa afarisi akhadaenda na anthu kasaka Yezu, aabvundza tenepa:

⁵¹“Mwambo wathu usatawirira kukonesa munthu, mbatidzati kumubva toera kudziwa pidacita iye?”

⁵²Iwo atawira tenepa: “Kodi iwembo ndiwe wa ku Galileya? Lang'anisa malemba a Mulungu, unaona kuti nkhabe mporofeta m'bodzi anabuluka ku Galileya.”

⁵³[Na tenepo, m'bodzi na m'bodzi aenda ku nyumba kwace.[26]