Read Cibverano Cipsa Cisena Juwau 8 Bible Online

Juwau 8 - Cibverano Cipsa Cisena bible

Juwau 8

¹Mbwenye Yezu aenda ku phiri ya Mulivera.

²Na macibese ene, Yezu abwerera pontho mu Nyumba ya Mulungu, mudagumanyikana mbumba yonsene n'khundu mwace, Iye mbakhala pantsi toera aipfundzise.

³Anyakudziwisa a Mwambo na afarisi, am'bweresera nkazi m'bodzi adagumanizwa mbacita upombo, mbamulimisa patsogolo pa anthu onsene.

⁴Iwo alonga kuna Yezu kuti: “Mpfundzisi, nkazi uyu agumanizwa mbakhacita upombo.

⁵Mbwenye pa Mwambo wa Mozesi, akazi ninga awa asatongwa kuti amenyiwe na myala. Imwe Mbuya, musaona tani?”

⁶Iwo akhacita m'bvundzo unowu ninga kumulesera, toera asake thangwi ya kumpumpha nayo. Mbwenye Yezu akotama mbatoma kulemba pantsi na cala.

⁷Yezu na kuona kuti ali kuthimiza na kum'bvundza, alamuka mbaapanga tenepa: “Ngakhala alipo munthu pakati panu wakukhonda kudawa, mbatome ndiye kuponya mwala kuna nkazi.”

⁸Yezu akotama pontho mbatoma kulemba pantsi.

⁹Na kubva mafala enewa, atoma buluka m'bodzi na m'bodzi, kutomera kwa akulu mpaka akumalisira, mbasala Yezu ekha ene. Mbwenye nkazi asala dzololo, pakati pakhadaikhwa iye.

¹⁰Na tenepo, Yezu alamuka mbam'bvundza nkazi kuti: “Nkaziwe, ali kupi adakusumira? Nkhabe m'bodzi adakukonesa?”

¹¹Nkazi atawira kuti: “Nkhabe, Mbuya.” Yezu ampanga tenepa: “Na inembo nkhabe kukukonesa. Cincino ndoko, leka dawa pontho.[27]”]

¹²Yezu aapanga pontho kuti: “Ine ndine cieza ca dziko. Ule ananditowera nkhabebve famba pontho n'cidima, mbwenye anakhala na cieza ca upulumuki.”

¹³Afarisi ampanga kuti: “Iwe usapicitira umboni wekha ene. Na tenepo, umboni wako si wa ndimo mwene tayu.”

¹⁴Yezu atawira kuti: “Ngakhala Ine ndisapicitira umboni wanga ndekha, umboni wanga ndi wa ndimo mwene, thangwi ndisadziwa kudabuluka Ine na kunaenda Ine. Mbwenye imwe nkhabe dziwa kudabuluka Ine, peno kunaenda Ine.

¹⁵Imwe musatonga mu nyama, Ine nkhabe tonga munthu tayu.

¹⁶Pontho Ine ndingatonga, matongero anga ndi a ndimo mwene, thangwi siri ndekha tayu, ndiri na Baba adandituma.

¹⁷[28]Pa Mwambo wanu pyalembwa kuti umboni wa anthu awiri ndi wa ndimo mwene.

¹⁸Ine ndisapicitira umboni ndekha ene, unango anandicitira umboni ndi Baba adandituma.”

¹⁹Na tenepo iwo am'bvundza kuti: “Ali kupi Baba wako?” Yezu atawira kuti: “Imwe nkhabe kundidziwa pontho nkhabe kun'dziwa Baba wanga. Mbamudandidziwa Ine, mbamudadziwambo Baba wanga.”

²⁰Yezu akhalonga mafala awa pa n'dzidzi ukhapfundzisa Iye mu Nyumba ya Mulungu, dhuzi na pakhaikhwa miyoni. Mbwenye nkhabe munthu adam'manga, thangwi n'dzidzi wace ukhadzati fika.

²¹Yezu athimiza na kuapanga kuti: “Ine ndiri kwenda, imwe munati mundisake, mbwenye munati mufere n'kati mwa kudawa kwanu. Kuna funa Ine kwenda, imwe nkhabe kwanisa kwendako.”

²²Na tenepo, madjuda atoma bvundza kuti: “Kodi nkhulongera kuti iye funa apheke ekha ene? Thangwi iye asalonga kuti kunafuna Ine kwenda, imwe nkhabe kudza kaendako.”

²³Mbwenye Yezu athimiza na kulonga kuti: “Imwe ndimwe a pantsi pano, INE NDINE wa kudzulu. Imwe ndimwe a padziko ino, Ine sine wa dziko ino tayu.

²⁴Na thangwi eneyo, Ine ndakupangani kuti imwe munati mufere n'kati mwa madawi anu. Mungakhonda kutawira kuti Ine Ndine,[29] munati mufere n'kati mwa madawi anu.”

²⁵Iwo am'bvundza kuti: “Iwe ndiwe ani?” Yezu aatawira kuti: “Ndi pire pikhakupangani Ine midzidzi yonsene.

²⁶Ndina pinthu pizinji pya kulonga na pya kukutongani. Mbwenye ule adandituma ndi wakunyindirika, pontho pire pidabva Ine kuna Iye, ndipyo pinalonga Ine pa dziko.”

²⁷Mbwenye iwo hadapibvesa tayu kuti akhalonga na thangwi ya Baba wace.

²⁸Na tenepo Yezu alonga kuti: “Mungalamusa Ine Mwana wa Munthu, munadza kadziwa kuti INE NDINE, pontho nkhabe cita cinthu canga ndekha, mbwenye ndisalonga sawa-sawa ninga mudandipfundzisira Baba.

²⁹Ule adandituma ali na Ine. Nkhabe kundisiya ndekha ene, thangwi midzidzi yonsene Ine ndisacita pinan'tsandzaisa.”

³⁰Mukhalonga Iye penepi, anthu azinji antawira.

³¹Yezu alonga kuna madjuda ale adantawira kuti: “Mungakhala mbamunyindira fala yanga, ndimwe anyakupfundza angadi.

³²Na tenepo munati mudziwe pya ndimo mwene, pontho pya ndimo mwene pinadza kakusudzulani.”

³³Iwo antawira kuti: “Ndife dzindza ya Abharaamu, pontho cipo tidzati khala adzakazi a munthu. Usalongeranji kuti tinati tikhale akusudzuka?”

³⁴Yezu aatawira kuti: “Ndimo mwene, ndimo mwene ndisakupangani kuti: Munthu onsene anakhala mbadawa, ndi n'dzakazi wa kudawa.

³⁵N'dzakazi hanakhala ninga mwana wa pa nyumba kwenda na kwenda tayu. Mbwenye mwana, ndi wa pa nyumba kwenda na kwenda.

³⁶Na thangwi eneyo, Mwana angakusudzulani imwe munakhaladi akusudzuka.

³⁷Ine ndisadziwa kuti ndimwe a dzindza ya Abharaamu, mbwenye musasaka kundipha, thangwi fala yanga nkhabe pita muna imwe.

³⁸Ine ndisakupangani pidaona Ine kuna Baba wanga, mbwenye imwe musacita pidabva imwe kuna baba wanu.”

³⁹Iwo atawira kuti: “Abharaamu ndi baba wathu.” Yezu aapanga tenepa: “Mbamudakhala ndimwe ana a Abharaamu, mbamudacita mabasa a Abharaamu.

⁴⁰Mbwenye cincino musasaka kupha Ine anakupangani pya ndimo mwene, pidabva Ine kuna Mulungu. Abharaamu hadacita tenepo tayu.

⁴¹Imwe musacita mabasa a baba wanu.” Iwo ampanga tenepa: “Ife sife ana a upombo tayu, Baba wathu ndi m'bodzi basi, Iye Mulungu.”

⁴²Yezu aapanga kuti: “Mulungu mbadakhala ndi Baba wanu, imwe mbamudandifuna, thangwi Ine ndabuluka kuna Mulungu, cincino ndiri pano. Ine sidabwera na kufuna kwanga tayu, mbwenye ndiye adandituma.

⁴³Thangwi yanji imwe nkhabe bvesesa malongero anga? Thangwi imwe nkhabe kwanisa kubva pinalonga Ine.

⁴⁴“Imwe muna baba wanu, ndi Dyabu, musafuna mucite kufuna kwace. Iye ndi phanga kutomera pakutoma, pontho iye nkhabe longa pya ndimo mwene. Angalonga uthambi, ndi makhaliro ace, thangwi iye ndi nyauthambi, pontho ndi baba wa uthambi.

⁴⁵Mbwenye thangwi Ine ndisakupangani pyamaso, imwe nkhabe kunditawira.

⁴⁶Mbani mwa imwe anakwanisa kupangisa pakweca kudawa kwanga? Ngakhala pinalonga Ine mphya ndimo mwene, thangwi yanji imwe nkhabe kunditawira?

⁴⁷Ana a Mulungu anabva Mafala a Mulungu. Mbwenye imwe nkhabe kubva thangwi simwe a Mulungu tayu.”

⁴⁸Madjuda antawira kuti: “Pinalonga ife simo mwene tayu kuti ndiwe wa ku Samariya pontho una dimonyo?”

⁴⁹Yezu aatawira kuti: “Ine nkhabe dimonyo! Ine ndisalemedza Baba wanga, mbwenye imwe musandipwaza.

⁵⁰Ine nkhabe saka mbiri yanga ndekha, mbwenye alipo anaisaka pontho mbatonga.

⁵¹Ndimo mwene, ndimo mwene ndisakupangani kuti, munthu anakoya fala yanga, nkhabe kudza kafabve kwenda na kwenda.”

⁵²Na tenepo, madjuda alonga kuti: “Cincino takudziwa kuti iwe una dimonyo! Abharaamu na maporofeta afa, mbwenye iwe usalonga kuti munthu anakoya mafala anga, nkhabe kudza kafabve!

⁵³Iwe ndiwe nkulu kupita baba wathu Abharaamu? Iye na maporofeta afa. Kodi iwe usafuna ukhale ani?”

⁵⁴Yezu aatawira kuti: “Ngakhala ndisapasika mbiri ndekha, mbiri yanga nkhabe longa pinthu. Anandipasa mbiri ndi Baba, unowu analonga imwe kuti ndi Mulungu wanu.

⁵⁵Imwe nkhabe kun'dziwa, mbwenye Ine ndisan'dziwa. Ndingalonga kuti Ine nkhabe kun'dziwa ndine nyauthambi ninga imwe, mbwenye Ine ndisan'dziwa mbandikoya mafala ace.

⁵⁶Abharaamu baba wanu, atsandzaya na kufuna kuona ntsiku yanga. Iye aiona mbakomerwa.”

⁵⁷Madjuda alonga kuti: “Iwe udzati kucita pyaka makumaxanu, wamuona tani Abharaamu?”

⁵⁸Yezu atawira kuti: “Ndimo mwene, ndimo mwene ndisakupangani kuti Abharaamu mbadzati kubalwa, INE NDINE.”

⁵⁹Na tenepo, madjuda alokota myala kuti am'menye, mbwenye Yezu abisalika mbabuluka mu Nyumba ya Mulungu.