Read Cibverano Cipsa Cisena Mabasa 10 Bible Online

Mabasa 10 - Cibverano Cipsa Cisena bible

Mabasa 10

¹Ku nzinda wa Sezareya, kukhali na mamuna m'bodzi akhacemerwa Korenelyu, akhali nkulu wa anyankhondo a nsoka wa ku Roma, ukhali na dzina ya “Italya.”

²Iye na mudzi wace onsene, akhali anthu akuphembera na akugopa Mulungu. Pontho kazinji kene akhaphedza na pinthu pyace mbumba yakucherenga, mbakhaphembera Mulungu midzidzi yonsene.

³Ntsiku inango, dhuzi na n'dzidzi utatu wa kumaulo, Koronelyu apangizwa mwadidi mwene mu Nzimu, anju wa Mulungu mbakhadza kuna iye mbampanga kuti: “Korenelyu!”

⁴Korenelyu amulang'ana anju na kugopa, mbam'bvundza tenepa: “Ninji Mbuya?” Anju antawira tenepa: “Maphembero ako, na kuphedza kunacita iwe anyakucherenga, pyafika pamaso pa Mulungu. Iye nkhabe kukuduwala.

⁵Cincino tuma amuna angasi aende ku nzinda wa Djopi, akhakwate mamuna m'bodzi anacemerwa Simau, anadziwika na dzina ya Pedhru.

⁶Iye afikira pa nyumba ya Simau nyakufukuta nthembe, anakhala dhuzi na bara.”

⁷Mudabuluka anju ikhampanga, Koronelyu acemera anyabasa awiri na nyankhondo m'bodzi wakuphembera, ule akhamphatira basa.

⁸Penepo, Korenelyu aapanga pyonsene pidancitikira, pidamala iye mbaatuma kwenda ku Djopi.

⁹Mangwana mwace, pa n'dzidzi khumi na uwiri wa masikati, mukhaenda iwo mbafamba na njira, dhuzi na kufika pa nzinda wa Djopi, Pedhru akwira n'nyumba ya n'dzulu toera kuphembera.

¹⁰Na njala ikhakhala na iye, akhafuna kudya. Mukhamphikira iwo cakudya, Pedhru aphatwa na Nzimu Wakucena.

¹¹Aona thambo yafunguka, pontho na combo cakulandana na nguwo ikulu idamangwa nkhomu zace zinai mbicikhachita pantsi.

¹²N'kati mwa nguwo eneyi, mukhali na ntundu onsene wa pinyama pya myendo minai, pinango pya kufamba na mimba, na mbalame za kudzulu.

¹³Na tenepo, Pedhru abva fala ikhalonga kuti: “Lamuka Pedhru! Pha udye!”

¹⁴Mbwenye Pedhru atawira kuti: “Nkhabe citika Mbuya! Ine cipo ndidzati kudya cinthu cakukhonda kuceneswa na Mwambo, peno cakunyanyasa!”

¹⁵Mphapo fala yabveka pontho kaciwiri mbilonga tenepa: “Leka kulonga kuti ndi pyakukhonda kuceneswa na mwambo, pire pidaceneswa na Mulungu.”

¹⁶Penepi pyacitika katatu. Buluka penepo, nguwo ire yakwira pontho kudzulu.

¹⁷Pa n'dzidzi ukhabvundzika Pedhru ekha ene kuti pisalongeranji pidaoneswa iye mu Nzimu, amuna adatumwa na Korenelyu akhadafika pa nsuwo mbakhadza mbabvundzisa nyumba ya Simau.

¹⁸Iwo acemera m'bodzi wa mwenemu, mbam'bvundzisa kuti: “Kodi afikira pano mamuna anacemerwa Simau, anadziwika na dzina ya Pedhru?”

¹⁹Pedhru mukhanyerezera iye kuti pisalonganji pidaoneswa iye mu Nzimu, Nzimu Wakucena wampanga tenepa: “Lang'ana Pedhru, alipo amuna atatu asakusaka.

²⁰Lamuka, chita uyende na iwo. Leka penula, thangwi ndine adaatuma.”

²¹Penepo, Pedhru achita mbaapanga amuna kuti: “Munthu anasaka imwe ndine. Mwadzeranji?”

²²Iwo atawira tenepa: “Adatituma ndi nkulu wa anyankhondo anacemerwa Korenelyu. Iye ndi munthu wakulungama. Asagopa Mulungu, mbalemebza pikulu kakamwe na mbumba yonsene ya madjuda. Anju m'bodzi wa Mulungu ampanga kuti acemerese imwe mwende mpaka ku nyumba kwace, toera abve pinafuna imwe kulonga.”

²³Penepo, Pedhru aatambira mbaapitisa n'nyumba. Mangwana mwace, Pedhru alamuka mbaenda na iwo, mbaperekerwa na abale anango a ku Djopi.

²⁴Nkucauno mwace, afika ku nzinda wa Sezareya. Korenelyu na abale ace, na axamwali ace a pa ntima akhadacemera iye, akhaadikhira.

²⁵Mukhapita Pedhru n'nyumba, Korenelyu abwera kantambira mbagodama patsogolo pace, mbamulambira.

²⁶Mbwenye Pedhru amulamusa mbampanga kuti: “Lamuka, thangwi ine ndine munthu ninga iwembo.”

²⁷Mukhaceza iye na Korenelyu, Pedhru apita n'nyumba mbagumana mwinji wa anthu wagumanyikana mwenemu.

²⁸Penepo, Pedhru aapanga onsene kuti: “Imwe musadziwa mwadidi mwene kuti mwambo wathu nkhabe tawirira kuti n'djuda aphatane uxamwali na munthu adakhonda kukhala n'djuda, peno kwenda kamuona ku nyumba kwace. Mbwenye Mulungu andipangisa kuti leka longa kuna munthu kuti hudaceneswa pa mwambo, peno waswipa pa mwambo.

²⁹Na thangwi eneyo, pidandicemera imwe, ndabwera na ntima wanga onsene. Cincino ndisafuna ndidziwe thangwi yanji mwandicemeresa?”

³⁰Korenelyu atawira tenepa: “Kwapita ntsiku zitatu na ya lero ndi ya cinai, ine ndikhaphembera n'nyumba mwanga muno, pa n'dzidzi utatu wa kumaulo. Na mwansanga, mamuna m'bodzi akhadabvala nguwo zakucena, alimira patsogolo panga,

³¹mbalonga kuti: ‘Korenelyu, Mulungu abva maphembero ako, pontho mbakumbuka pinthu pyako pidapasa iwe anyakucherenga.

³²Tuma munthu m'bodzi aende ku Djopi, kacemera Simau anadziwika na dzina ya Pedhru. Iye afikira pa nyumba ya Simau nyakufukuta nthembe, anakhala dhuzi na bara.’

³³Na thangwi eneyo, ndakucemeresani na mwansanga. Mwacita mwadidi pidabwera imwe. Cincino tagumanyikana tonsene muno patsogolo pana Mulungu, toera tibve pyonsene pidapangwa imwe na Mbuya.”

³⁴Na tenepo, Pedhru atoma kulonga tenepa: “Cincino ndisadziwadi kuti Mulungu nkhabe tsankhulo.

³⁵Mbwenye pa madziko onsene a pantsi, Mulungu asatawira onsene ale anan'gopa, na anacita pinthu pyakulungama.

³⁶Imwe musazidziwa mphangwa zidatumiza Mulungu kuna mbumba ya Izarayeli, zinalonga na thangwi ya Mphangwa Zadidi za ntendere zidadza na Yezu Kirixtu. Unowu ndi Mbuya wa onsene.

³⁷Pontho pakumala kumwazwa mphangwa za batixmu na Juwau, imwe musapidziwa pidacitika n'dziko yonsene ya Djudeya, kutomera ku Galileya.

³⁸Kudzodza kudacita Mulungu, kuna Yezu wa ku Nazareti na Nzimu Wakucena, pontho na mphambvu za utongi, na kufamba kudacita Iye makhundu onsene, mbakhacita udidi na kuwangisa ale onsene akhathabuswa na Sathani, thangwi Mulungu akhali na Iye.

³⁹“Ife ndife amboni a pyonsene pidacita Iye n'dziko ya madjuda na mu Djerusalema mwene. Penepo iwo am'pha mban'khomera pa ntanda.

⁴⁰Mbwenye Mulungu, pa kupita ntsiku zitatu, amulamusa pa kufa mbacita kuti Iye aoniwe.

⁴¹Iye hadaonana na mbumba yonsene tayu, mbwenye aonana na ife, amboni akhadasankhula Mulungu kale ene. Ife tadya na Iye mbatimwa na Iye, mudamala Iye kulamuswa na Mulungu pa kufa.

⁴²Iye atituma toera tikhamwaze Mphangwa Zadidi kuna mbumba, mbaticita umboni kuti Yezu unowu, ndiye adaikhwa na Mulungu ninga ntongi wa miseru ya anthu ali m'maso na akufa.

⁴³Yezu unowu, ndiye adalongwa na maporofeta onsene kuti ale onsene anantawira, analekererwa madawi awo na dzina yace.”

⁴⁴Mukhalonga Pedhru mafala enewa, Nzimu Wakucena wachita kuna anthu onsene akhabva fala.

⁴⁵Madjuda akhadatawira Yezu, ale adabwera pabodzi na Pedhru, adzumatirwa napyo na kuona muwoni wa Nzimu Wakucena ukhapaswambo anthu akukhonda kukhala madjuda.

⁴⁶Thangwi iwo akhaabva mbakhalonga na malongero anango, mbakhapasa mbiri na kukuza Mulungu. Penepo Pedhru alonga kuti:

⁴⁷“Anthu awa atambira Nzimu Wakucena ninga mudautambira ifembo. Kodi alipo m'bodzi pano anakwanisa kukhondesa madzi, mbapingiza kuti awa akhonde kutambira batixmu?”

⁴⁸Na tenepo, Pedhru aapanga kuti atambire batixmu na dzina ya Yezu Kirixtu. Pakumala, iwo aphemba kuna Pedhru kuti athimize kukhala ntsiku zingasi pabodzi na iwo.