Read Cibverano Cipsa Cisena Mabasa 12 Bible Online

Mabasa 12 - Cibverano Cipsa Cisena bible

Mabasa 12

¹Pa n'dzidzi unowu, mambo Herodhi amanga abale anango a gereja, toera aathabuse.

²Iye aphesa Tiyago m'bale wace Juwau na tarasada.

³Pidaona iye kuti penepi madjuda akomerwa napyo, athimiza, mbamangisambo Pedhru, pa n'dzidzi wa phwandu ya mikate yakusowa ntombwe wa kutupisa.[27]

⁴Herodhi, pidamala iye kumangisa Pedhru, ampitisa n'kaidi, mbampereka kuti aonererwe na misoka minai ya anyankhondo. Nsoka ubodzi ukhali na anyankhondo anai. Thangwi Herodhi akhafuna antonge pamaso pa mbumba pakumala kwa Paxkwa.

⁵Na tenepo, Pedhru akhaonererwa n'kaidi, mbwenye abale agereja, akham'phemberera na mphambvu kuna Mulungu.

⁶Na masiku, mbidzati fika ntsiku ikhafuna Herodhi kuti antonge pamaso pa mbumba, Pedhru, akhagona pakati pa anyankhondo awiri, wakumangwa na unyolo uwiri, mbakhaonererwa na anyankhondo pa nsuwo wa kaidi.

⁷Na mwansanga, afika anju wa Mbuya, n'kaidi mbamuoneka cieza. Anju an'gwedza Pedhru pa khundu pace, amulamusa mbampanga tenepa: “Lamuka na mwansanga!” Penepo, maunyolo akhadamangwa na iye m'manja mwace, agwa.

⁸Anju ampanga tenepa: “Manga bhande yako, ubvale ntsapato zako.” Pedhru acita pidapangwa iye na anju. Penepo anju ampanga pontho kuti: “Bvala kapoti wako unditowere.”

⁹Penepo, Pedhru abuluka mbantowerera. Mbwenye iye akhapidziwa tayu kuti anju ali kum'bulusadi. Pyonsene pikhacitika, akhanyerezera ali kupioneswa mu Nzimu.

¹⁰Iwo apiringana nyakuonera wakutoma na waciwiri, mbafika pa citseko cikulu ca utale cikhalang'anisana na nzinda. Citseko cafunguka cokha cene, iwo mbabuluka. Akhafamba mu nseu un'gono, pa n'dzidzi ubodzi ene, anju mbansiya.

¹¹Penepo, Pedhru aphepuka mbalonga ekha ene kuti: “Cincino ndadziwa kuti ndimo mwene, Mulungu atuma anju wace mbandiombola m'manja mwa Herodhi na pyonsene pikhafuna kundicita madjuda.”

¹²Pedhru mukhanyerezera iye penepi, aenda ku nyumba kwa Mariya, mai wace Juwau akhacemerwa Marku. Anthu azinji akhadagumanyikana penepo mbakhaphembera.

¹³Iye amenya citseko ca kunja, nyabasa wankazi anacemerwa Rodhe, mbaenda kaona kuti ndi ani.

¹⁴Nyabasa mudadzindikira iye kuti fala ndi ya Pedhru, akomerwa pikulu kakamwe, mbacimwana na kufungula kwene citseko, mbabwerera na kuthamanga kwenda kapanga anthu kuti: “Pedhru ali pa nsuwo.”

¹⁵Mbwenye iwo alonga kuti: “Iwe ndiwe bendzi!” Mphapo iye akhalonga basi kuti ndimo mwene. Penepo iwo antawira kuti: “Panango ndi anju wace!”

¹⁶Mbwenye Pedhru akhamenya basi citseko. Mudafungula iwo citseko, aona Pedhru, mbadzumatirwa.

¹⁷Penepo, Pedhru aapasa cidzindikiro na manja toera amatame, mbaapanga kuti abuluswa tani n'kaidi na Mbuya, mbalonga kuti: “Panganimbo penepi Tiyago na abale anango.” Na tenepo, iye abuluka mbaenda mbuto inango.

¹⁸Mangwana mwace na macibese, anyankhondo anentseka pikulu kakamwe, thangwi akhasaka kudziwa ndi ninji pidacitika kuna Pedhru!

¹⁹Herodhi atuma anthu kwenda mbansaka, mbwenye iwo hadan'gumana tayu. Na thangwi eneyo, Herodhi, pakumala kuasanya anyakuonera, aatonga kuti aphiwe. Buluka penepo, Herodhi abuluka ku Djudeya mbaenda kakhala ntsiku zingasi ku nzinda wa Sezareya.

²⁰Mambo Herodhi akhaidana pikulu na mbumba ya mu nzinda wa Tiru na wa Sidhoni. Mbwenye mbumba ikhadagumanyikana pabodzi pene mbikhasaka kuonana na iye. Iyo yaphemba kuti asekesane na mambo mbaphebza na Bhalaxtu, mamuna akhanyidirika na mambo, thangwi pikhadya iwo pikhabuluka n'dziko ya mambo Herodhi.

²¹Ntsiku idabverana iwo, Herodhi abvala nguwo zace za ciumambo, akhala pa mpando wace wa umambo, mbatoma kulonga na mbumba.

²²Penepo, mbumba yatoma kukhuwa kuti: “Fala iyi nja mulungu, si ya munthu tayu!”

²³Pa n'dzidzi ubodzi ene udatawira iye kupaswa mbiri ninga mulungu, anju wa Mulungu agwisa nyatwa kuna Herodhi, adyiwa na mpfunye, mbafa.

²⁴Na tenepo, fala ya Mulungu ikhalongwa konsene kwene mbikhaenda mbimwazika.

²⁵Bharnabhasi na Saulo pakumala mabasa awo, abwerera buluka ku Djerusalema, pabodzi na Juwau anacemerwa Marku.