Read Cibverano Cipsa Cisena Mabasa 22 Bible Online

Mabasa 22 - Cibverano Cipsa Cisena bible

Mabasa 22

¹“Imwe abale anga na ababa anga. Bveserani, cincino funa nditawire pamaso panu pire pidandipambazira iwo.”

²Mudambva iwo mbakhaapanga na malongero a ciebhereu, iwo apfulikeratu kakamwe. Na tenepo, Paulu alonga kuti:

³“Ine ndine n'djuda. Ndabalwa ku Tarisu, ku dziko ya Silisya. Mbwenye ndalerwa mu Djerusalema muno. Gamaliyeli ndiye adandipfundzisa mwakukwana mwambo wa akulu athu akale, mbandikhala munthu wa kukakamira kakamwe kucita pinafuna Mulungu, ninga imwembo lero.

⁴Ndikhaazonda anthu akhatowera Njira eneyi mpaka kuapha, mbandimanga amuna na akazi mbandiaponya n'kaidi.

⁵Nkulu wa anyantsembe, na nsoka wa akulu anyakutonga miseru asapidziwa, pontho anakwanisa kucita umboni wa pinthu penepi. Iwo andipasa matsamba adalembera iwo abale awo a ku nzinda wa Dhamaxku, mbandienda mpaka kweneko kakwata anthu akhatowerera N'njira ya Mbuya, mbandibwera na iwo mu Djerusalema muno ninga anyan'kaidi, toera athabuswe.

⁶“Dhuzi na n'dzidzi khumi na uwiri wa ku masikati, mbindiri dhuzi na nzinda wa Dhamaxku, na mwansanga ndaona cieza cikulu cidabuluka kudzulu, mbicindimwanikira n'khundu mwanga.

⁷Na tenepo, ine ndagwa pantsi mbandibva fala ikhalonga kuti: ‘Saulo, Saulo, thangwi yanji usandizonda?’

⁸Penepo ine ndam'bvundza kuti: ‘Imwe ndimwe ani Mbuya?’ Iye atawira tenepa: ‘Ine ndine Yezu wa ku Nazareti, ule anazonda iwe!’

⁹Amuna akhaenda na ine aciona cieza, mbwenye fala ya ule akhalonga na ine hadaibvesesa tayu.

¹⁰“Na tenepo, ndabvundza kuti: ‘Mbuya, mphyanji pinafuna kucita ine?’ Mbuya atawira tenepa: ‘Lamuka upite mu nzinda wa Dhamaxku. Mwenemu unapangwa pyonsene pinatongwa iwe kucita.’

¹¹Kuyetimira kwa cieza kwandipha maso. Andzanga akhali na ine andiphata nsenzi mpaka ku Dhamaxku.

¹²“Mu nzinda unowu, mukhali na mamuna m'bodzi anacemerwa Ananiya. Iye akhali munthu wakuphembera ninga munalongera mwambo, pontho akhali munthu wa kulemebza na madjuda onsene akhali mu nzinda unowu.

¹³Iye abwera kudza kaonana na ine. Mudafika iye dhuzi na ine andipanga tenepa: ‘Saulo m'bale wanga, maso ako mbaone.’ Pa n'dzidzi ubodzi ene ndakwanisa kumuona.

¹⁴“Iye andipanga tenepa: ‘Saulo, Mulungu wa ambuya athu akusankhula toera udziwe pinafuna Iye, uone Wakulungama, pontho ubve pinafuna longa Iye na mulomo wace.

¹⁵Thangwi iwe unadza kakhala m'mboni wace kuna anthu onsene, wa pire pidaona iwe, na pidabva iwe.

¹⁶Mphapo cincino usadikhiranji? Lamuka utambiriswe batixmu, utsuke kudawa kwako, mbuphemba na dzina ya Mbuya.’

¹⁷“Mudabwerera ine ku Djerusalema, mbandikhaphembera mu Nyumba ya Mulungu, ndaphatwa na Nzimu Wakucena,

¹⁸mbindioneswa Mbuya mbakhandipanga tenepa: ‘Cimbiza, buluka na mwansanga mu Djerusalema muno, thangwi iwo nkhabe kudza kakubvera pinafuna iwe longa na thangwi yanga.’

¹⁹“Ine ndatawira tenepa: ‘Mbuya, amuna awa asapidziwa kuti ine ndikhaenda nyumba na nyumba za kuphemberera za madjuda, mbandikhamanga na kumenya ale akhakutawirani.

²⁰Mukhapha iwo m'mboni wanu Xitevau, ine ndikhalimbo penepo, mbandikhatawirirambo kufa kwace. Pontho ndine akhakoya nguwo za ale akhamupha!

²¹“Na tenepo, Mbuya andipanga kuti: ‘Ndoko, thangwi ine funa ndikutume uyende kutali, kuna ale adakhonda kukhala madjuda.’ ”

²²Mbumba ikham'bvesera. Mbwenye mudatoma iye kulonga mafala enewa, mbumba yatoma kukhuwa tenepa: “Mamuna uyu mbaphiwe! Nkhabe funika akhale m'maso!”

²³Iwo akhakhuwa, mbakhaponya nguwo zawo, uku mbakhawaza mataka kudzulu.

²⁴Na tenepo, nkulu wa cikwi ca anyankhondo apanga anyankhondo ace kuti akwate Paulu apite na iye mu mpanda wa nyumba ya anyankhondo, ankwapule na kum'bvundzisa toera adziwe ndi thangwi yanji mbumba isakhuwa tenepa kuna Paulu.

²⁵Mbwenye mukham'manga iwo toera ankwapule, Paulu abvundza kuna nkulu wa anyankhondo a ku Roma akhali dhuzi na iye kuti: “Kodi mwambo wanu usatawirira kumenya munthu wa ku Roma iye mbadzati kutongwa?”

²⁶Nkulu ule wa anyankhondo mudabva iye penepi, aenda kuna nkulu wa cikwi ca anyankhondo mbampanga tenepa: “Nyerezera mwadidi pinafuna iwe kucita! Mamuna uyu ndi mu Roma!”

²⁷Na tenepo, nkulu wa cikwi ca anyankhondo aenda kalonga na Paulu mbam'bvundza tenepa: “Ndipange, kodi iwe ndiwe mu Roma?” Paulu atawira kuti: “Ande, ndine mu Roma.”

²⁸Penepo, nkulu wa cikwi ca anyankhondo alonga tenepa: “Ine toera ndithuliwe mu Roma, ndabvunga kobiri zizinji.” Mbwenye Paulu atawira kuti: “Ine ndine mu Roma wa kubaliwa.”

²⁹Na mwansanga, onsene akhafuna kunkwapula ansiya. Na iye ene nkulu wa cikwi ca anyankhondo agopa, na kubva kuti Paulu uyu akhadamanga iwo, ndi mu Roma.

³⁰Nkulu wa cikwi ca anyankhondo akhafuna kudziwa mwadidi mwene ndi thangwi yanji madjuda asumira Paulu. Na tenepo, mangwana mwace, apanga anthu ace kuti ansudzule unyolo ukhadamangwa na iye, mbacemeresa akulu aanyantsembe, na akulu onsene anyakutonga miseru, kuti agumanyikane. Buluka penepo, acemeresa Paulu mbamuikha patsogolo pawo.