Read Cibverano Cipsa Cisena Mabasa 26 Bible Online

Mabasa 26 - Cibverano Cipsa Cisena bible

Mabasa 26

¹Na tenepo, mambo Agiripa apanga Paulu kuti: “Watawirirwa kuti ulonge nseru wako tiubve.” Penepo Paulu acita cidzindikiro na manja ace mbatoma kulonga mathangwi ace tenepa:

²“Mambo Agiripa! Ndakomerwa pikulu kakamwe lero, na kukhala patsogolo panu, kuti ndilonge mathangwi a pyonsene pidandipambazira madjuda.

³Maka-maka thangwi imwe musadziwa mwadidi mwene, mitemo yonsene ya madjuda na kukhonda kubverana kwawo. Na tenepo, ndisaphemba kuti mundibvesere na kukhurudzika.

⁴“Madjuda onsene asadziwa makhaliro anga pakati pawo, kutomera pa uwana wanga mpaka lero, ku dziko idabalwa ine na ku Djerusalema kwene.

⁵Iwo asandidziwa na kale ene, angafuna kundicitira umboni, iwo analonga kuti ine ndikhali m'bodzi wa afarisi, nsoka wa ndale wakutoweza pikulu kakamwe pa mwambo wathu wa kuphembera.

⁶Cincino ndiri pano mbanditongwa, na thangwi ya cidikhiro cina ine ca cipikiriro cidacita Mulungu kuna a mbuya athu.

⁷Madzindza athu khumi na mawiri analambira Mulungu masiku na masikati, akhadikhirambo kuti acione cipikiro ceneci. Ndi thangwi ya cidikhiro ceneci mambo, cinasumirwa ine na madjuda.

⁸Kodi ndi thangwi yanji imwe musanyerezera kuti nkhabe kwanisika kuna Mulungu kulamusa anthu a kufa?

⁹“Na inembo ndikhadamala sasanyira pyonsene pikhafunika, toera kupingiza kubvekera kwa dzina ya Yezu wa ku Nazareti.

¹⁰Penepi ndipyo pidacita ine ku Djerusalema. Ndatawiriswa na akulu aanyantsembe, mbandikwata mbumba izinji ya Mulungu mbindiyikha n'kaidi. Angatongwa kuti aphiwe, ine ndikhatawirirambo kuti aphiwe.

¹¹Kazinji kene ndikhaenda mbandiathabusa m'manyumba mwawo a kuphemberera, mbandikhaakakamiza kuti axole Mulungu. Na kuipirwa na iwo kukulu kukhakhala na ine, ndafikira kwenda mbindiafambira n'nduli m'mizinda ya madziko anango.

¹²“Na thangwi eneyi, ndaenda mpaka ku nzinda wa Dhamaxku, na mphambvu za kutawiriswa kudacita ine na akulu aanyantsembe.

¹³Lang'anani mambo, pikhaenda ine na mu nseu, pa n'dzidzi khumi na uwiri wa masikati, ndaona cieza kudzulu cakuyetimira pikulu kakamwe kupiringana dzuwa. Cieza ceneci cagaka mbacigudumira ine na ale akhaenda na ine.

¹⁴Tonsene tagwa pantsi. Na tenepo, ine ndabva fala ikhandipanga na malongero a ciebhereu mbilonga kuti: ‘Saulo, Saulo! Thangwi yanji usandichinga? Ungakakamira menyana na Ine, unaona nyatwa!’

¹⁵“Penepo ine ndabvundza kuti: ‘Ndimwe ani Mbuya?’ “Mbuya atawira tenepa: ‘Ine ndine Yezu, ule anachinga iwe.

¹⁶Cincino, lamuka ulimire na myendo yako. Ine ndadza kuna iwe kakusankhula kuti ukhale nyabasa wanga, na m'mboni wanga wa pinthu pidaona iwe, na pinango pinadza kafuna kukupangisa ine.

¹⁷Ine ndinakuombola kuna madjuda, pontho na kwa ale adakhonda kukhala madjuda, kule kunafuna kukutuma ine.

¹⁸Iwe unenda kaafungula maso awo, toera uwabwerese buluka n'cidima kudza n'cieza, pontho uwabuluse mu mphambvu za Sathani adze kuna Mulungu, toera alekererwe madawi pontho atambire unthaka pakati pa ale adaceneswa na thangwi ya kundikhulupira.’

¹⁹“Na tenepo mambo Agiripa, ine ndacimwana khonda kubvera pinthu pya kudzulu pidaoneswa ine mu Nzimu.

²⁰Mbwenye Mphangwa zenezi, pakutoma ndazimwaza ku Dhamaxku. Buluka kweneku mbandiyenda ku Djerusalema na m'pisa pyonsene pya Djudeya, pontho na kuli ale adakhonda kukhala madjuda. Onsene ndikhaapanga kuti achunyuke kudawa kwawo, abwerere kuna Mulungu, acite pinthu pinapangisa kuti iwo achunyukadi.

²¹Ndi thangwi eneyi idandiphatira madjuda pikhakhala ine mu Nyumba ya Mulungu, mbakhafuna kundipha.

²²Mbwenye mpaka lero Mulungu ali kundiphedza. Ndi thangwi eneyi lero ndiri pano mbindicita umboni kuna imwe monsene anyakupwazika na anyakulemedzeka. Nkhabe cibodzi cidalonga ine kupiringana pidalonga maporofeta na Mozesi, kuti pinadza kacitika.

²³Thangwi iwo akhalonga kuti Kirixtu anati aone nyatwa, pontho atome ndiye kulamuka pa kufa, amwaze cieza ca upulumuki kuna madjuda na kuna ale adakhonda kukhala madjuda.”

²⁴Paulu mukhatawira iye pikhapambazirwa iye, pa n'dzidzi ubodzi ene Fextu akhuwa mbalonga tenepa: “Paulu, iwe ndiwe nyansala! Wapfundza maka, mbwenye kupfundza kwako, kusakupasa nsala!”

²⁵Paulu atawira tenepa: “Ine sinansala tayu, imwe wakulemedzeka mambo Fextu. Pinalonga ine ndimo mwene, pontho ndi pya ndzeru.

²⁶Mambo Agiripa, asapidziwa pyonsene, pontho siri kum'bisira cinthu tayu. Ine ndisadziwa kuti iye apibva pyonsene ipi, thangwi pidacitika pakubisala tayu.

²⁷Mambo Agiripa, imwe musatawira pidalonga maporofeta? Ine ndisadziwa kuti imwe musapitawira!”

²⁸Na tenepo, Agiripa ampanga Paulu kuti: “Iwe usanyerezera kuti pa n'dzidzi ung'ono basi, unakwanisa kundinyengerera mbundikunda kuti nditawire Kirixtu?”

²⁹Paulu atawira tenepa: “Ine ndiri kuphemba Mulungu kuti pa n'dzidzi ung'ono peno ukulu, si kuna imwe basi tayu, mbwenye kuli anthu onsene anandibvesera lero, adze kakhalembo ninga ine, mbwenye mbakhonda kumangwa na njema.”

³⁰Penepo mambo Agiripa alamuka, pabodzi na ntongi, na Bherenise na onsene akhakhala na iwo.

³¹Abuluka mbalonga okha-okha kuti: “Mamuna uyu nkhabe cinthu cidacita iye cakutongerwa kuphiwa, peno apitiswe naco n'kaidi.”

³²Na tenepo, Agiripa apanga Fextu kuti: “Mbadakhonda phemba kuti atongwe na Sezari, mbadabuluswa n'kaidi.”