Read Cibverano Cipsa Cisena Aroma 15 Bible Online

Aroma 15 - Cibverano Cipsa Cisena bible

Aroma 15

¹Ife anyakuwangisira pakutawira, tisatongwa tipirire kupolola kwa ale adasowa mphambvu pakutawira, mbatikhonda kucita pinatsandzaisa ife tekha ene.

²M'bodzi na m'bodzi wa ife, asafunika atsandzaise ndzace, toera ndzace akhale mwadidi pontho akule pa kukhulupira.

³[76]Thangwi na Iyenembo Kirixtu hadasaka kutsandzaya kwace basi tayu, mbwenye ninga pidalembwa m'Bukhu ya Mulungu kuti: “Kutikana kwa ale anakutikana, kwagwera Ine.”

⁴Thangwi pyonsene pidalembwa kale ene pyalembwa toera kutipfundzisa, kuti kubulukira pa kupirira pontho na pa kubalangazwa na Bukhu ya Mulungu, tikoye cidikhiro cathu.

⁵Mulungu anapasa kupirira na kubalangaza, mbakupaseni nzimu wakubverana m'bodzi na m'bodzi, ninga munafuna Kirixtu Yezu,

⁶toera na ntima ubodzi basi, pontho na mulomo ubodzi basi, mukuze Mulungu, Baba wa Mbuya wathu Yezu Kirixtu.

⁷Na tenepo, tambiranani m'bodzi na m'bodzi ninga Kirixtu akutambirani, toera mupase mbiri Mulungu.

⁸Ine ndisakupangani kuti Kirixtu acitika nyabasa wa anyakusibza, na kufuna undimo mwene wa Mulungu, toera kusimbisisa cipikiriro cidacita Iye na a mbuya awo,

⁹[77]kuti ale adakhonda kukhala madjuda akuze Mulungu na thangwi ya ntsisi zace, ninga pidalembwa m'Bukhu ya Mulungu kuti: “Na thangwi eneyo, ndinakukuzani pakati pa anthu adakhonda kukhala madjuda, mbandikuimbirani nyimbo za kukuza dzina yanu.”

¹⁰[78]Pontho pyalembwa kuti: “Imwe, mbumba idakhonda kukhala madjuda, tsandzayani na mbumba ya Mulungu.”

¹¹[79]Pyalembwa pontho kuti: “Imwe monsene mudakhonda kukhala madjuda kuzani Mbuya. Kuzani Mbuya imwe mbumba zonsene.”

¹²[80]Mporofeta Izaya alembambo kuti: “Anadza kabalwa mu dzindza ya Djesi,[81] ule anadza kalamuka toera kudza kakhala ntongi wa ale adakhonda kukhala madjuda. Iwo anadza kan'dikhira.”

¹³Mulungu wa cidikhiro, mbakudzazeni na kutsandzaya konsene, na ntendere, pa kun'khulupira kwanu, toera mukhale na cidikhiro cikulu, na mphambvu za Nzimu Wakucena.

¹⁴Abale anga, ine ene ndisatawira kuti imwe mwadzala na udidi pontho ndimwe anthu ana udziwisi kakamwe, mbamukwanisa kulangana m'bodzi na m'bodzi.

¹⁵Mbwenye ndakulemberani ipi na cipapu consene, maka-maka toera ndikukumbuseni pontho penepi, na thangwi ya kukoma ntima kwa Mulungu kudandicitira Iye.

¹⁶Ntsisi zenezi ndi zakukhala nyabasa wa Kirixtu Yezu pakati pa ale adakhonda kukhala madjuda. Basa yanga ikulu ninga nyantsembe, ndi ya kulonga Mphangwa Zadidi za Mulungu, toera ale adakhonda kukhala madjuda, akwanise kukhala ntsembe yakufunika kuna Mulungu, pontho yakuceneswa na Nzimu Wakucena.

¹⁷Na tenepo, ndina gaya muna Kirixtu Yezu, na thangwi ya basa ya Mulungu.

¹⁸Ine nkhabe cipapu cakukwanisa kulonga, kupiringana pire pidacita Kirixtu bulukira muna ine, na mafala peno na kucita, toera kukwata ale adakhonda kukhala madjuda abvere Mulungu,

¹⁹na thangwi ya mphambvu ya pidzindikiro na ya pirengo, pontho na mphambvu za Nzimu Wakucena. Na tenepo, kubulukira Djerusalema na m'pisa pyace pya dhuzi, mpaka ku cisa ca Iliriku, ndamala kumwaza mwakukwana Mphangwa Zadidi za Kirixtu.

²⁰Ine ndikhasirira kakamwe kumwaza Mphangwa Zadidi mule mukhakhonda dziwika Kirixtu, kuti ndikhonde kulimisa basa mule mudamala kulimiswa kale na unango.

²¹[82]Mbwenye ninga pidalembwa m'Bukhu ya Mulungu kuti: “Ale adakhonda kumubva mbalongwa anadza kamuona, pontho ale adakhonda kum'bvesera, anadza kam'bvesesa.”

²²Ndi thangwi eneyo idandicitambo kuti kazinji kene ndapingizwa kudza kakuonani.

²³Mbwenye cincino, na kumala kwa basa n'kati mwa pisa pino, pontho na thangwi ya kupita pyaka pizinji mbandifuna kukuonani,

²⁴ndisasaka kuti ndidze kakuonani ndingaenda ku dziko ya Xipanya. Thangwi ndisadikhira kukuonani pa kupita kwanga na kweneku, pontho toera mundiphedze pa ulendo wanga wa kwenda kweneku, pakumala kuceza pang'ono na imwe.

²⁵Mbwenye cincino ndiri pa ulendo kwenda ku Djerusalema, kaphatira basa mbumba ya Mulungu.

²⁶Thangwi abale a ku Masedhonya na a ku Akaya, na kutsandzaya kwawo konsene, acita nsonkho-nsonkho toera kuphedza abale anyakucherenga, pakati pa mbumba ya Mulungu ya ku Djerusalema.

²⁷Iwo akomerwa na kucita penepi, pontho ndimo mwene, iwo mbanyamangawa kuna mbumba ya Mulungu ya ku Djerusalema. Thangwi ngakhala ale adakhonda kukhala madjuda ali nazombo nkhombo za mu nzimu za madjuda, iwombo asatongwa kuphedza madjuda na pinthu pyawo pina iwo.

²⁸Na tenepo, pakumala basa eneyo, pontho mbandidziwa kuti iwo aitambiradi miyoni eneyi, ndinaenda ku Xipanya, mbandipita mbindikuonani.

²⁹Ine ndisadziwa kuti ndingabwera kudza kakuonani, ndinadza mbidadzala na nkhombo za Kirixtu.

³⁰Abale anga, ndisakuphembani na dzina ya Mbuya wathu Yezu Kirixtu, pontho na kufuna kwa Nzimu Wakucena, kuti mumenye nkhondo pabodzi na ine pa miphembero inandicitira imwe kuna Mulungu.

³¹Ndiphemberereni kuti ndiombolwe m'manja mwa anyakukhonda kutawira Yezu a ku Djudeya, pontho toera basa yanga ku Djerusalema, ikwanise kutawirwa na mbumba ya Mulungu.

³²Na tenepo, Mulungu angafuna, ndinakuonani na kukomerwa konsene, pontho mbindikwanisa kupuma pang'ono pabodzi na imwe.

³³Mulungu wa ntendere mbakhale na imwe monsene. Ameni.