Read Cibverano Cipsa Cisena Aroma 6 Bible Online

Aroma 6 - Cibverano Cipsa Cisena bible

Aroma 6

¹Tinalonganji mphapo? Tisatongwa basi kukhala n'kudawa toera kukoma ntima kwa Mulungu kuinjipe?

²Nkhabe citika! Ife takhala ninga anthu akufa pa pinthu pyakudawa, tinakhala tani pontho n'kudawa?

³Kodi imwe nkhabe kupidziwa kuti ife tonsene tidatambira batixmu muna Kirixtu Yezu, tatambiriswa batixmu na kufa kwace?

⁴Na tenepo, taikhwa pabodzi na Iye pa kufa kubulukira pa kutambira batixmu, toera ninga Kirixtu alamuswa pa kufa kubulukira mu mbiri ya Baba, ifembo tinakhala na upulumuki upsa.

⁵Ngakhala taphatanizwa na Yezu pa kulandana na kufa kwace, tinaphatanizwambo na Iye pa kulandana na kulamuka kwace pa kufa.

⁶Thangwi tisadziwa kuti munthu wathu wakale.[20] akhomerwa pa ntanda pabodzi na Iye, toera manungo athu a kudawa afudziwe, pontho tikhonde khala adzakazi a madawi.

⁷Thangwi ule adafa, asudzuka pa mphambvu za madawi.

⁸Ngakhala cincino tafa pabodzi na Kirixtu, tinatawirambo kuti tinadza kakhala m'maso pabodzi na Iye.

⁹Thangwi ife tisadziwa kuti, Kirixtu pakulamuka kwace pa kufa, nkhabe kudza kafa pontho. Iye nkhabe kudza kakundiwabve na kufa.

¹⁰Thangwi pa kufa kwace, Kirixtu afa kabodzi basi toera kukunda kudawa, mbwenye cincino, ali m'maso toera acite kufuna kwa Mulungu.

¹¹Sawa-sawa na imwembo, dziwani kuti ndimwe akufa kuna madawi, mbwenye ndimwe a m'maso kuna Mulungu muna Kirixtu Yezu.

¹²Na tenepo, lekani kusiya kuti manungo anu akufa anyanye kukundwa na kudawa, mbukukukwatani kuti mucite kufuna kwawo kwakuipa.

¹³Lekani kupereka mapindi a manungo anu mwa kudawa, ninga pida pyakucita napyo kuipa. Mbwenye perekekani kuna Mulungu ninga anthu adabuluka pa kufa kwenda ku upulumuki. Pontho perekani mapindi a manungo anu kuna Iye ninga pida pyakulungama.

¹⁴Thangwi kudawa nkhabe kudza kakukundani, thangwi imwe muli pantsi pa mwambo tayu, mbwenye muli pantsi pa kukoma ntima kwa Mulungu.

¹⁵Mphapo ndiye tani? Tinadawa pyathu thangwi tiri pantsibve pa Mwambo tayu, mbwenye tiri pantsi pa kukoma ntima kwa Mulungu? Nkhabe citika!

¹⁶Imwe nkhabe dziwa kuti mungaperekeka kuna munthu kuti mum'bvere ninga adzakazi, musakhala adzakazi a ule anabvera imwe? Ngakhala ndimwe adzakazi a madawi, anakupitisani mwa kufa. Ngakhala ndimwe adzakazi a kubvera, kunakupitisani mwakulungama.

¹⁷Mbwenye tisapereka takhuta kuna Mulungu thangwi imwe kale ene mukhali adzakazi a madawi, cincino musabvera na ntima wanu onsene cipfundzo cidatambira imwe.

¹⁸Imwe mwasudzulwa n'kudawa, cincino ndimwe adzakazi a Mulungu toera kucita pyakulungama.

¹⁹Ndisalonga ninga munthu, na thangwi yakukhonda dziwa kwanu.[21] Sawa-sawa ninga imwe mukhadapereka mapindi a manungo anu kuti akhale adzakazi a pyakunyanyasa, na pyakuipa pinango pinakukwatani kuti mucite kuipa, cincino aciteni kuti akhale adzakazi a udidi toera kuperekeka kuna Mulungu.

²⁰Thangwi pa n'dzidzi ukhakhala imwe adzakazi a madawi, mukhatsalakana kucita udidi tayu.

²¹Na tenepo, ndi ninji pidawina imwe[22] pa pinthu penepi pinakupasani manyadzo cincino? Kumalisira kwapyo ndi kufa.

²²Mbwenye cincino, pakumala kusudzulwa kwanu n'kudawa mbamudza kakhala adzakazi a Mulungu, misapu inasaka imwe isakucitani kuti mukhale anthu akuperekeka toera kuphatira Mulungu, pontho kumalisira kwayo ndi upulumuki wakukhonda kumala.

²³Thangwi kutambiriswa kwa kudawa ndi kufa. Mbwenye muwoni wa kupaswa pezi wa Mulungu ndi upulumuki wakukhonda kumala muna Kirixtu Yezu, Mbuya wathu.