Read Cibverano Cipsa Cisena Aroma 8 Bible Online

Aroma 8 - Cibverano Cipsa Cisena bible

Aroma 8

¹Na tenepo, cincino ale ali muna Kirixtu Yezu[25], nkhabebve thangwi yakukoneswa nayo.

²Thangwi muna Kirixtu Yezu, mwambo wa Nzimu wa upulumuki, wakusudzula[26] pa mwambo wa kudawa na pa kufa.

³Thangwi pire pidacimwana kucita Mwambo na thangwi ya kusowa mphambvu kwa nyama yathu, Mulungu apicita pa kutuma Mwana wace mbamulandanisa na munthu wa kudawa, ninga ntsembe ya kukunda kudawa. Na tenepo, akonesa kudawa pa nyama,

⁴toera pinthu pyakulungama pinaphembwa na Mwambo, pikwanise kucitika muna ife anakhonda kutoweza makhaliro a nyama, mbwenye mbatitoweza makhaliro a Nzimu Wakucena.

⁵Ale anakhala mu nyama, ndzeru zawo zisanyerezera kucita pinafuna nyama, mbwenye ale anakhala mu Nzimu Wakucena, ndzeru zawo zisanyerezera kucita pinafuna Nzimu Wakucena.

⁶Thangwi manyerezero a nyama ndi kufa, mbwenye manyerezero a Nzimu Wakucena ndi upulumuki na ntendere.

⁷Na thangwi eneyo, manyerezero a nyama asaidana na Mulungu, thangwi nkhabe kubvera Mwambo wa Mulungu pontho nkhabe kwanisa kuubvera.

⁸Anabvera pinafuna nyama nkhabe kwanisa tsandzaisa Mulungu.

⁹Imwe nkhabe kundiwabve na nyama tayu, mbwenye musakundiwa na Nzimu, ngakhaladi Nzimu wa Mulungu uli muna imwe. Pontho, ngakhala munthu nkhabe Nzimu wa Kirixtu, munthu unowu si wa Kirixtu tayu.

¹⁰Mbwenye ngakhala Kirixtu ali muna imwe, manungo anu akhala ninga afa na thangwi ya kudawa, mbwenye nzimu wanu uli m'maso[27] na thangwi ya kulungama.

¹¹Na tenepo, ngakhala Nzimu wa Ule udalamusa Yezu pa kufa uli muna imwe, Unowu ubodzi-bodzi udalamusa Kirixtu pa kufa, unalamusambo manungo anu akufa, na Nzimu wace ubodzi-bodzi uli muna imwe.

¹²Na tenepo, abale anga ife tina mangawa, mbwenye si na nyama tayu, kuti tikhale mbatitoweza pontho pya nyama.

¹³Thangwi mungakhala mu nyama munafa, mbwenye na mphambvu za Nzimu mungapha mabasa a nyama, munapulumuka.

¹⁴Thangwi onsene anatsogolerwa na Nzimu wa Mulungu ndi ana a Mulungu.

¹⁵Thangwi imwe mudatambira nzimu wa udzakazi toera mugope pontho tayu, mbwenye mwatambira Nzimu Wakucena udakucitani kuti mukhale ana a Mulungu. Nzimu unowu ndiwo unacemera na ife “Aba,” ndiko kubveka, “Baba.”

¹⁶Nzimu unowu wa Mulungu ndiwo unaticitira umboni kuna nzimu wathu, kuti ife ndife ana a Mulungu.

¹⁷Ngakhala ndife ana a Mulungu, na tenepo ndifembo ana a unthaka. A unthaka a Mulungu, pontho ana a unthaka pabodzi na Kirixtu. Ngakhala taona nyatwa pabodzi na Iye, tinapaswambo mbiri pabodzi na Iye.

¹⁸Thangwi ine ndisadziwa kuti nyatwa zinaona ife cincino, nkhabe kudza kakhala sawa-sawa na mbiri inafuna kudza kapangizika mwa ife tayu.

¹⁹Pyonsene pidalengwa na Mulungu, pisadikhira na kufuna kukulu ntsiku eneyi inafuna kudza kapangisa Mulungu ana ace.

²⁰Thangwi pidalengwa pyacitwa kuti pikhale pyakusowa basa, si kufuna kwa ipyo tayu, mbwenye ndi thangwi ya kufuna kwa Mulungu adapicita na cidikhiro,

²¹ca kuti ipyo pidalengwa pinati pibuluke mu udzakazi wakufubza uli na iwo, mbapitambira ufulu wa mbiri ya ana a Mulungu.

²²Thangwi tisadziwa kuti pyonsene pidalengwa, mpaka lero pisabulira ninga nkazi wakubva kupha pakufuna kubala.

²³Si penepi basi tayu, mbwenye na ife ene ana Nzimu Wakucena ninga misapu yakutoma, tisabulira n'kati mwathu mbitidikhira kucitwa kwathu ana a Mulungu, ndiko kuombolwa kwa manungo athu.

²⁴Thangwi mu cidikhiro ceneci, ife tapulumuswa. Mbwenye kudikhira cinthu cinaoneka, si kudikhira tayu. Mbani munthu anadikhira cinthu cinaona iye?

²⁵Mbwenye ngakhala tiri kudikhira cinthu kuti tidzati kuciona, tisacidikhira na kunyindira.

²⁶Sawa-sawambo na Nzimu Wakucena, usatiphedza pa kupolola kwathu, thangwi ife nkhabe dziwa kuphembera ninga munafunika, mbwenye Nzimu ubodzi-bodzi usatiphemberera mbubulira na mafala akukhonda kulongeka.

²⁷Mphapo ule anasaka kudziwa piri m'mitima mwathu, asadziwa ndi ninji pinafuna Nzimu, thangwi Nzimu Wakucena usaphemberera mbumba yace ninga munafunira Mulungu.

²⁸Tisadziwa kuti pinthu pyonsene pisaphedzera udidi kuna ale anafuna Mulungu, ale adacemerwa kuti picitike ninga mudafunira Mulungu.

²⁹Thangwi ale adadziwiwa kale na Mulungu, akhadasankhulwa kale kuti akhale akulandana na Mwana wace, toera Mwana unowu akhale wa utombo pakati pa abale ace azinji.

³⁰Ale akhadasankhulwa kale, Iye aacemerambo. Ale adacemera Iye, aalungamisambo. Ale adalungamisa Iye, aapasambo mbiri.

³¹Tinalonganji mphapo pa pinthu penepi? Ngakhala Mulungu ali na ife, mbani anafuna kutikunda?

³²Ule adaleka kukhondesa Mwana wace ene kuti atifere, mbwenye mbampereka na thangwi yathu tonsene, anakhonda tani kutipasa pezi pabodzi pene na Iye, pinthu pyonsene?

³³Mbani anafuna kuapasa thangwi anyakusankhulwa a Mulungu? Ndi Mulungu anaalungamisa.

³⁴Mbani anafuna kuakonesa? Nkhabe m'bodzi anafuna kuakonesa. Thangwi Kirixtu Yezu afa mbalamuka pa kufa, mbakhala ku nkono wa madyo wa Mulungu, pontho asatiphembererambo.

³⁵Mbani anakwanisa kutimwazanisa pakufunana na Kirixtu? Ndi nyatwa, ndi kutsukwala, ndi kuchingwa, ndi njala, ndi usiwa, ndi kugopsa, peno ndi tarasada?

³⁶[28]Ninga pidalembwa m'Bukhu ya Mulungu kuti: “Na thangwi ya kukufunani tiri kufa ntsiku zonsene, mbaticitwa ninga mabira anaenda kaphiwa.”

³⁷Mbwenye pa penepi pyonsene, ndife anyakukunda kupiringana anango, na thangwi ya ule adatifuna.

³⁸Thangwi ndisatawira kuti kufa, peno kukhala m'maso, peno maanju, peno mizimu ya kuipa, peno pyacincino, peno pinafuna kudza, peno mphambvu zinango,

³⁹peno pyakudzulu, peno pyapantsi pa mataka, peno pinthu pinango pyakulengwa, nkhabe cibodzi cinakwanisa kutimwazanisa pa kufuna kunaticita Mulungu, muna Kirixtu Yezu Mbuya wathu.