Read Cibverano Cipsa Cisena Aroma 9 Bible Online

Aroma 9 - Cibverano Cipsa Cisena bible

Aroma 9

¹Ndisalonga pya ndimo mwene muna Kirixtu, siri kulonga uthambi tayu. Manyerezero anga a muntima asandipanga penepi, mu Nzimu Wakucena kuti:

²Ndisatsukwala pikulu kakamwe, pontho ntima wanga usakhala mbundipha.

³Thangwi mbipidakwanisika, ine ene ndikhafuna ndipaswe pyanga dzedze, ndipambulike pyanga na Kirixtu, na thangwi ya kufuna abale anga a dzindza yanga,

⁴mbumba ya Izarayeli. Iwo asankhulwa kuti akhale ana a Mulungu, pontho Mulungu aapasa mbiri yace, pibverano pyace, Mwambo wace, malambiriro ace mu Nyumba ya Mulungu, na pipikiriro.

⁵Iwo ndi akulu a dzindza ya Izarayeli. Pontho Kirixtu, ninga munthu, ndi wa dzindza yawo. Ndiye Mulungu wa pyonsene,[29] wakusimbwa kwenda na kwenda! Ameni.

⁶Si kulongera kuti fala ya Mulungu yadodomeka tayu. Thangwi mbumba yonsene ya Izarayeli, si dzindza ya Izarayeli tayu.

⁷[30]Pontho onsene a dzindza ya Abharaamu, si ana a Abharaamu tayu. Thangwi Mulungu akhadalonga kuna Abharaamu kuti: “Dzindza yako inabulukira kuna Izaki.”

⁸Penepi nkhulongera kuti: anacemerwa ana a Mulungu, si ale adabalwa pa nyama tayu, mbwenye ana akupikirirwa ndiwo anacemerwa a dzindzadi ya Abharaamu.

⁹[31]Thangwi fala ya cipikiriro yalonga tenepa: “N'dzidzi wace ungakwana, ndinabwera pontho. Sara anadza kabala mwana-mamuna.”

¹⁰Si penepi basi tayu. Pyacitikambo na ana awiri a mamphasa a Rabheka. Baba wawo, akhali m'bodzi ene mbuya wathu Izaki.

¹¹Mbwenye ana enewa mbadzati kubalwa, mbadzati cita cibodzi cakuipa peno cadidi - toera kucitike kufuna kwa Mulungu pa kusankhula kwace,

¹²[32]si na mabasa tayu, mbwenye ndi thangwi ya ule anacemera[33] Rabheka apangwa na Mulungu kuti: “Mwana wako wa nkulu, anaphatira basa mwana wako wang'ono.”

¹³[34]Ninga mudalemberwa ipyo m'Bukhu ya Mulungu kuti: “Ndafuna Djakobo, mbwenye ndakhonda Izauuu.”

¹⁴Tinalonganji mphapo? Kuti Mulungu si wakulungama tayu? Nkhabe citika!

¹⁵[35]Thangwi Iye alonga kuna Mozesi kuti: “Ndinabvera ntsisi kuna ule anafuna Ine kuti ndim'bvere ntsisi. Ndinakoma ntima kuna ule anafuna Ine kuti ndikome ntima.”

¹⁶Na tenepo, penepi hapinandawa na kufuna kwa munthu, peno na mphambvu za munthu tayu. Mbwenye pina ndawa na Mulungu pontho na ntsisi zace.

¹⁷[36]Thangwi Bukhu ya Mulungu yalonga kuna Farau kuti: “Ine ndakulamusa na thangwi eneyi, toera mwa iwe ndipangize mphambvu zanga, pontho toera dzina yanga imwazwe pantsi pano ponsene.”

¹⁸Na tenepo, Mulungu asabvera ntsisi kuna ule anafuna Iye, pontho asaumisa ntima ule anafuna Iye.

¹⁹[37]Mbwenye m'bodzi wanu anandibvundza tenepa: “Thangwi yanji mphapo Mulungu asatipasa thangwi? Mbani anapokanya pinafuna Iye?”

²⁰Mbwenye ndiwe ani iwe munthu, kuti uketesane na Mulungu? “Kodi combo cinakwanisa longa kuna ule adacicita kuti: ‘Wandicitiranji tenepa?’ ”

²¹Kodi nyakuumba pyombo nkhabe kwanisa kukwata dongo ibodzi-bodzi mbaumba nayo combo cibodzi ca pinthu pyakupasa mbiri, cinango ca pinthu pyakupwazika?

²²Mphapo ngakhala Mulungu na kufuna kupangisa kuipirwa kwace, pontho na kufuna kudziwisa mphambvu zace, apirira na kulekerera kukulu kakamwe pyombo pikhadatongera Iye kuonesa nyatwa kuti apifudze,

²³tinalonganji mphapo ngakhala Iye acita penepi toera apangizembo upfumi wa mbiri yace, kuna pyombo pya ntsisi zace pidasasanyira Iye kale toera kupaswa mbiri,

²⁴peno tilonge, kuna ife adacemerwambo na Iye, si kuna ale madjuda basi tayu, mbwenye na ale ene adakhonda kukhala madjuda?

²⁵[38]Ninga munalonga Iye mu bukhu ya Ozeya kuti: “Ndinadza kacemera ‘mbumba yanga’ ale adakhonda kukhala mbumba yanga. Pontho ndinadza kacemera ‘nyakufunika wanga’ ule adakhonda kufuniwa na Ine.”

²⁶[39]Pontho, “pa mbuto ibodzi-bodzi idapangwa iwo kuti: ‘imwe simwe mbumba yanga,’ penepo iwo anadza kacemerwa ‘ana a Mulungu wa m'maso.’ ”

²⁷[40]Pa thangwi ya Izarayeli, Izaya akhuwa mbalonga kuti: “Na kuinjipa kudacita mbumba ya Izarayeli ninga checa ya m'bara, mbwenye anafuna pulumuswa ndi pang'ono basi.

²⁸Thangwi Mbuya anati acite na mwansanga pantsi pano, pyonsene pidalonga Iye.”

²⁹[41]Ninga iye Izaya akhadapilonga kale kuti: “Mbuya wa Anyankhondo mbadakhonda kutisiyira dzindza, mbatidakhala ninga nzinda wa Sodhoma, pontho sawa-sawa ninga nzinda wa Gomora.”

³⁰Tinalonganji mphapo? Tinalonga kuti ale adakhonda kukhala madjuda, mbakhakhonda kusaka kulungama,[42] adza kagumanako kulungama. Mbwenye ndi kulungama kudabulukira pa cikhulupiro.

³¹Mbwenye Izarayeli akhasaka kulungama kubulukira pa mwambo, hadadza kapikwanisa tayu.

³²Thangwi yanji? Thangwi akhapisaka na mabasa[43] awo. Hakhapisaka na kukhulupira tayu. Agwegweduka na “mwala wa kugwegwedusa.”

³³Ninga mudalembwa ipyo kuti: “Lang'anani! Ndiri kuikha mu Siyau mwala ubodzi wakugwegwedusa, mwala ukulu unagwisisa. Pontho ule anaukhulupira, nkhabebve kudza kasandikika.[44]”