Read Cibverano Cipsa Cisena 1 Akorintu 7 Bible Online

1 Akorintu 7 - Cibverano Cipsa Cisena bible

1 Akorintu 7

¹Pa thangwi ya pinthu pidandilembera imwe, ndi pyadidi kuti mamuna akhonde kudziwa nkazi.

²Mbwenye na thangwi ya lukwali, pikhali pyadidi mamuna akhale na nkazi wace, nkazimbo akhale na mamuna wace.

³Mamuna asatongwa kucitira nkazi wace pyonsene pinatongwa iye kucita n'kati mwa nyumba. Nkazi asatongwambo acite sawa-sawa kuna mamuna wace.

⁴Nkazi nkhabe mphambvu za kutonga manungo ace, mbwenye anaatonga ndi mamuna wace. Sawa-sawambo na mamuna, nkhabe mphambvu za kutonga manungo ace, mbwenye anaatonga ndi nkazi wace.

⁵Lekani kukhonderana n'kati mwa nyumba, m'bodzi na m'bodzi. Penepi pisatawirirwa male mungabverana pa n'dzidzi ung'ono toera munyerezere kuphembera. Mungamala, munagumana pontho toera mukhonde kunyengererwa na Sathani, na thangwi ya kusowa kwanu mphambvu za kupirira.

⁶Siri kulonga ipi ninga matongero tayu, mbwenye ndinakutawirirani.

⁷Ndikhafuna kuti anthu onsene akhale ninga ine. Mbwenye m'bodzi na m'bodzi ana muwoni wace udapaswa iye na Mulungu. M'bodzi asapaswa na njira iyi, unango asapaswa na njira inango.

⁸Mphapo ndisalonga kuna ale adasowa banja, pontho na kuna akazi adaferwa na amuna awo, kuti pikhali pyadidi iwo akhale pyawo tenepo ninga ine.

⁹Mbwenye angapicimwana, mphyadidi acite banja. Thangwi mphyadidi kakamwe kucita banja, kupiringana kuthabuka na kusirira.

¹⁰Mphapo kuna ale ali pa banja, ndisaapasa matongero awa, si anga tayu, mbwenye mba Mbuya, kuti: nkazi akhonde kumwalana na mamuna wace.

¹¹Mbwenye angamwalana, mbakhale tenepo, mbakhonda kucita pontho banja ipsa. Peno angafuna, mbasekesane abwererane pontho na mamuna wace. Mamunambo, mbaleke kumwalana na nkazi wace.

¹²Kuna anangombo, ine ene ndisaapanga ipi, si Mbuya tayu, kuti: ngakhala m'bale m'bodzi wa mamuna ana nkazi adakhonda kutawira Yezu, mbwenye iye asafuna kukhala na mamuna wace, mamuna mbaleke kumwalana na iye.

¹³Ngakhala ndi nkazimbo ana mamuna adakhonda kutawira Yezu, mbwenye iye asafuna kukhala na nkazi wace, nkazi mbaleke kumwalana na iye.

¹⁴Thangwi mamuna wakukhonda kutawira Yezu, anaceneswa na thangwi ya nkazi wace. Sawa-sawambo na nkazi wakukhonda kutawira Yezu, anaceneswa na thangwi ya mamuna wace. Mbapidakhonda kukhala tenepa, ana awo mbadakhala ana akukhonda kuceneswa pamaso pa Mulungu. Mbwenye cincino, iwo aceneswa.

¹⁵Mphapo ngakhala ule adakhonda kutawira Yezu asafuna pyakumwalana, mbamwalane. Pa mathangwi enewa, m'bale wakutawira Yezu wa mamuna, peno wa nkazi, nkhabebve mwambo unaakakamiza kukhala pabodzi. Thangwi Mulungu akucemerani toera mukhale mu ntendere.

¹⁶Iwe nkazi, usapidziwa tani kuti unadza kapulumusa mamuna wako? Peno iwembo mamuna usapidziwa tani kuti unadza kapulumusa nkazi wako?

¹⁷Na tenepo, m'bodzi na m'bodzi mbakakamire kufamba na mule mudansankhulira Mbuya, pontho ninga mudancemerera Mulungu. Ipi ndipyo pinapanga ine abale m'magereja onsene.

¹⁸Alipo munthu adacemerwa mbadamala kusibza kale? Mbaleke kusaka kusasanyira pontho manungo ace. Alipo adacemerwa mbadzati kusibza? Mbaleke kusibzabve.

¹⁹Kusibza na kukhonda kusibza, pyonsene nkhabe kulonga pinthu. Pinafunika ndi kubvera matongero a Mulungu.

²⁰M'bodzi na m'bodzi asatongwa akakamire kukhala na makhaliro adagumanwa na iye pa kucemerwa na Mulungu.

²¹Wacemerwa mbuli n'dzakazi? Leka kunentseka napyo. Mphapo ungakwanisa kubulukamo ndi pyadidi ucite penepi.

²²Thangwi adacemerwa na Mbuya mbali n'dzakazi, ndi ntumbe muna Mbuya. Sawa-sawambo na ule adacemerwa mbali ntumbe, ndi n'dzakazi wa Kirixtu.

²³Imwe mwaguliwa na ntengo ukulu. Na tenepo, lekani kubwerera kakhala adzakazi a anthu.

²⁴Abale, m'bodzi na m'bodzi asatongwa akakamire kukhala patsogolo pa Mulungu na makhaliro ace adagumanwa na iye pa kucemerwa kwace.

²⁵Pa thangwi ya amyali, ine nkhabe matongero a Mbuya, mbwenye na kuona kwanga ndisakupangani ninga m'bodzi wakunyindirika na ntsisi za Mulungu.

²⁶Na thangwi za nyatwa za cincino, ndisanyerezera kuti ndi pyadidi mamuna akhale pyace tenepo ninga mudakhalira iye.

²⁷Wacita banja? Leka kumwalana na nkazi wako. Ndiwe nzice? Leka kusakabve nkazi.

²⁸Mbwenye ungacita banja, si kudawa tayu. Apo mwali angacitambo banja na mamuna wace, si kudawa tayu. Mbwenye ale anacita banja anadza kaona nyatwa pa makhaliro awo,[17] Ine ndisafuna ndikugugumireni nyatwa zenezi.

²⁹Abale anga, pinafuna ine kukupangani ndi kuti: N'dzidzi wacepa. Kutomera cincino kwenda kutsogolo, ale ana akazi, mbakhale ninga anthu akusowa akazi.

³⁰Ale analira, akhale ninga nkhabe kulira. Ale anatsandzaya, akhale ninga nkhabe kutsandzaya. Ale anagula pinthu, akhale ninga nkhabe pinthu.

³¹Ale anaphatisa basa pinthu pya dziko ino, akhonde kupikakamira. Thangwi makhaliro a cincino a dziko ali kulamala.

³²Ine ndisafuna kuti mukhale anthu akusowa pinthu pya kukunentsani. Thangwi mamuna wakusowa nkazi, asanyerezera pinthu pya Mbuya, kuti anatsandzaisa tani Mbuya.

³³Mbwenye mamuna ana nkazi, asanyerezera pinthu pya dziko ino, kuti anatsandzaisa tani nkazi wace.

³⁴Na tenepo, munthu asakhala wakugawika. Nkazi wa nzice, peno mwali, asanyerezera pinthu pya Mbuya, toera akhale wakucena pa manungo na pa nzimu ene. Mbwenye nkazi ana mamuna, asanyerezera pinthu pya dziko ino, kuti anatsandzaisa tani mamuna wace.

³⁵Ndisalonga ipi, ndi udidi kuna imwe. Si kukukakamizani tayu, mbwenye toera imwe mukhale na makhaliro adidi, mbamukhonda kupingizika.

³⁶Ngakhala alipo munthu asaona kuti pinacita iye si pyadidi tayu kuna mwali anabvundzirana na iye, pontho mbaona kuti pyaka pya mankhadzi wace piri kupita, mbanyerezera kucita banja, mbacite ninga munafunira iye. Nkhabe kudawa na penepi tayu. Mbacite pyawo banja.

³⁷Mphapo ule adafuna mwakukwana muntima mwace mbakhonda kubva ninga asakakamizwa, mbwenye asakwanisa kuphata ntima, pontho mbanyerezera kuti akhonde kucita banja na mwali, unowu asacitambo mwadidi.

³⁸Na tenepo, ule anacita banja na mankhadzi wace wa mwali, asacita mwadidi. Mbwenye ule anakhonda kucita banja, asacita mwadidi kakamwe.

³⁹Nkazi asakhala wakumangwa na mwambo wa pa banja, pa n'dzidzi onsene unakhala mamuna wace m'maso. Mbwenye mamuna angafa, iye anakhala wakusudzuka kuti asembwe na mamuna unango anafuna iye, male ngakhala mamuna ndi wakutawira Yezu.

⁴⁰Mbwenye kuona kwanga, iye anakhala wakutsandzaya kakamwe angakhonda kucita pontho banja. Ndisaona kuti ndiri nawombo Nzimu wa Mulungu.