Read Cibverano Cipsa Cisena 2 Akorintu 11 Bible Online

2 Akorintu 11 - Cibverano Cipsa Cisena bible

2 Akorintu 11

¹Ndisadikhira kuti imwe munandilekerera pang'ono udzemwa wanga. Ande, ndaphata myendo, ndilekerereni.

²Nchanje inabva ine kuna imwe, ndi nchanje inabuluka kuna Mulungu. Ine ndakupikirirani mamuna m'bodzi basi, ndiye Kirixtu, mbandifuna kukuperekani ninga mwali wakulungama kuna Iye.

³[18]Cinagopa ine ndi ca kuti, sawa-sawa ninga nyoka yanyengerera Eva na ucenjeri wace, ndzeru zanumbo zikhonde kudodomeswa mbamutayika pa kukhulupira kwanu muna Kirixtu, kwa ndimo mwene na kwakulungama.

⁴Thangwi angabwera munthu kudza kakupangani Yezu unango adakhonda kukhala ule adakupangani ife, peno mungatambira nzimu unango wakusyana na ule udatambira imwe, peno Mphangwa Zadidi zakusyana na zire zidatawira imwe, imwe munaalekerera pyanu.

⁵Mbwenye ine, nkhabe kunyerezera na pang'ono pene kuti ndine mwana kwa apoxtolo enewa analongwa kuti ndi “akulu-akulu.”

⁶Ndisadziwa kuti ine nkhabe kwanisa kulonga mwadidi pamaso pa anthu tayu, mbwenye kudziwa ndinako. Ande, penepyo takupangisani kale pa makhaliro onsene akusiyana-siyana.

⁷Kodi nkhulongera kuti ine ndadawa pidacepeseka ine toera imwe mukuzwe, pakukupangani Mphangwa Zadidi za Mulungu mbandikhonda kukuphembani cinthu?

⁸Pa n'dzidzi ukhaphata ine basa pakati panu, ndatambiriswa na magereja anango. Penepi pyakhala ninga ndikhaabera toera kuphedza imwe.

⁹Pikhakhala ine pakati panu mbandikhasowa pinthu, sikhanentsa munthu tayu. Thangwi abale pidabuluka iwo ku Masedhonya, akwanisa kundipasa pikhasowa ine. Ndacita pyonsene toera ndikhonde kukunentsani, pontho ine ndinathimiza na kucita tenepo.

¹⁰Ande, ninga undimo mwene wa Kirixtu uli muna ine, nkhabe munthu anafuna kundipingiza kugaya kuno, m'pisa pya Akaya.

¹¹Thangwi yanji ndisalonga penepi? Thangwi ine nkhabe kukufunani? Mulungu asadziwa kuti ndisakufunani!

¹²Pinacita ine ndinathimiza basi na kupicita, toera ndikhonde kupasa n'dzidzi ale anasaka kudziwika kuti ndi sawa-sawa na ife, pa pire pinagaya na iwo.

¹³Thangwi anthu enewa ndi apoxtolo a uthambi, anyabasa akunyengeza anthu, mbakhasangizira ninga apoxtolo a Kirixtu.

¹⁴Penepyo nkhabe kudzumisa, thangwi na Sathani ene asangizirambo ninga anju wa cieza.

¹⁵Na tenepo, nkhabe kudzumisa kuti anyabasa awo asangizirembo ninga anyabasa a pinthu pyakulungama. Mbwenye kumalisira kwawo kunati kukhale sawa-sawa na mabasa awo.

¹⁶Ndisathimiza na kulonga pontho kuti: Mbaleke kuoneka m'bodzi wakunyerezera kuti ine ndine dzemwa. Mbwenye ngakhala imwe musandinyerezera tenepo, nditambireni ninga musatambira dzemwa, toera ine ndigayembo pang'ono.

¹⁷Pyakugaya pinalonga ine ipi, siri kupilonga ninga munafunira Mbuya tayu, mbwenye ndiri kupilonga ninga dzemwa.

¹⁸Thangwi azinji ali kugaya na pinacitika pa dziko, ine ndinati ndigayembo.

¹⁹Na thangwi ya kukhala anthu a ndzeru, imwe musakwanisa kupirira mwadidi pinthu pya madzemwa!

²⁰Ande, imwe musakwanisa kupirira anakucitani udzakazi, peno anakudyerani manja, anakunyengezani, anapikuza peno anakumenyani kunkhope.

²¹Na manyadzo onsene, ndisatawira kuti ife tapolola pikulu kakamwe pa thangwi eneyo, ninga munationera imwe. Pire pinathanda onsene anango kuti agaye napyo, ndisalonga ninga dzemwa, ine ndisapithandambo.

²²Iwo ndi mahebhereu? Inembo ndine muhebhereu. Iwo ndi maizarayeli? Inembo ndine muizarayeli. Iwo ndi a dzindza ya Abharaamu? Inembo ndine wa dzindza ya Abharaamu.

²³Iwo ndi anyabasa a Kirixtu? Ine mbandilonga ninga nyansala, ndine nyabasa kupita iwo. Ndaphata basa ikulu kakamwe, ndapitiswa n'kaidi kazinji kene, ndakwapulwa pikulu kakamwe, mbandikhafuna kufa kazinji kene.

²⁴Madjuda andikwapula na michamu makumatatu na mipfemba, kaxanu.

²⁵Ndakwapulwa katatu na mpsimbo, ndamenyiwa na myala kabodzi, ndalobzeka m'bara katatu. Ndamala masiku mabodzi, na masikati mabodzi mbandiberuka pakati pa bara.

²⁶Ndikhacita ulendo kazinji kene. Ndatambana na pyakugopsa n'nyandza, kugopsa kwa mapanga, kwa madjuda andzanga, kwa adakhonda kukhala madjuda, n'kati mwa nzinda, n'thando, m'bara, pontho na kugopsa kwa abale a uthambi.

²⁷Ndaphata basa na mphambvu zonsene, kazinji kene ndacimwana kugona, ndakhala kazinji kene na njala na nyota, kazinji kene ndikhasowa cakudya, mbandibva mphepo pontho na usiwa.

²⁸Pontho ndisabva kupha muntima mwanga ntsiku zonsene, na kunentseka na thangwi ya magereja onsene.

²⁹Mbani adamala mphambvu, ine mbindikhonda kumala na iye mphambvu pabodzi? Mbani anagwiswa n'kudawa, ine mbindikhonda kuipirwa n'kati mwanga?

³⁰Ngakhala pisafunika ndigaye, mbukukhale kugaya na pire pinapangisa kupolola kwanga.

³¹Mulungu Baba wa Mbuya Yezu, Ule wakusimbwa kwenda na kwenda, asadziwa kuti pinalonga ine si pya uthambi tayu.

³²Ku nzinda wa Dhamaxku, ntongi adasankhulwa na mambo Areta, aikha asupai kuti aonere nzinda toera andimange.

³³Mbwenye ndakwanisa kupulumuka m'manja mwace, thangwi anthu anango andipitisa m'malikofa wa nkulu, mbandichitisa na pa benga ya mpanda wa nzinda.