Read Cibverano Cipsa Cisena 2 Akorintu 9 Bible Online

2 Akorintu 9 - Cibverano Cipsa Cisena bible

2 Akorintu 9

¹Lang'anani, pa thangwi ya kuphedza kunacita imwe mbumba ya Mulungu ku Djudeya, nkhabe funika kukulemberani.

²Ndisadziwa kuti musafuna muphedze, pontho ine ndapangisa kale kuna abale a kudziko ya Masedhonya, kugaya kunacita ine na thangwi yanu, kuti kutomera caka cidamala, imwe a ku Akaya, mukhadamala kusasanyira kuti mucite nsonkho-nsonkho. Pontho kufuna kwanu kupasa, kwacita kuti kupasembo mphambvu anthu azinji.

³Mbwenye ndiri kutuma abale awa toera kugaya kwathu na thangwi yanu kukhonde kukhala kwapezi, toera imwe mukhale akusasanyira, ninga mukhadakupangirani ine kale,

⁴toera kuti panango, ndingabwera pabodzi na abale a ku Masedhonya, mbakugumanani kuti mudzati kusasanyira, ife, mbatikhonda pyathu kulonga imwe, tikhonde kukhala na manyadzo na thangwi ya cinyindiro cikulu cikhali na ife kuna imwe.

⁵Tenepa, ndapiona kuti mphyadidi kutuma abale adze kakuonani, mbumudzati kumala sasanyira miyoni yanu yadidi idapikirira imwe. Na tenepo, nsonkho-nsonkho unowu unakhala wakumala kusasanyirwa ninga muwoni wakubulukira muntima, mbukhonda kukhala ninga muwoni wakubulukira pakukakamizwa.

⁶Kumbukani kuti: Ule anabzala pang'ono, anabvunambo pang'ono, pontho ule anabzala pizinji, anabvunambo pizinji.

⁷M'bodzi na m'bodzi mbapase na pinanyerezera iye muntima mwace, akhonde kucita na kutsukwala peno na kukakamizwa, thangwi Mulungu asafuna anapasa na kutsandzaya.

⁸Mulungu ndi wa mphambvu toera kuinjipisa kukoma ntima kwace konsene kuna imwe, kuti pa pinthu pyonsene, pa midzidzi yonsene, mukhale na pyonsene pinafunika, imwe mudzale na kutaikira pa mabasa onsene adidi.

⁹[16]Ninga pidalembwa kuti: “Agawa, mbapasa anyakucherenga. Kulungama kwace kusakhala kwenda na kwenda.”

¹⁰Ule anapasa mbeu nyakubzala, na anapasa nkate toera kudya, anaapasambo pontho mbainjipisa mbeu, pontho anakulisa misapu yakulungama kwace.

¹¹Imwe munapfumiswa pa pyonsene, toera mukhale akukoma ntima pa midzidzi yonsene inafunika, pontho na thangwi yathu, kukoma ntima kwanu kubale kupereka takhuta kuna Mulungu.

¹²Basa ya kuphedza inacita imwe, nkhabe kumalisa kusowa kwa mbumba ya Mulungu basi tayu, mbwenye isataikirambo toera anthu apereke takhuta kazinji kene kuna Mulungu.

¹³Na kupangizika kwa basa eneyi, anango anapasa mbiri Mulungu na kubvera kunacita imwe, kunapangisa pire pinalonga imwe pa thangwi ya Mphangwa Zadidi za Kirixtu, pontho na kukoma ntima kwanu kunaphedza imwe, iwo na onsene.

¹⁴Na miphembero inacita iwo kuna imwe, iwo anakufunani pikulu kakamwe na thangwi ya kukoma ntima kukulu kakamwe kudakucitirani Mulungu.

¹⁵Tinapereka takhuta kuna Mulungu na muwoni wace ukulu wakukhonda kulongeka!