Read Cibverano Cipsa Cisena Agalata 2 Bible Online

Agalata 2 - Cibverano Cipsa Cisena bible

Agalata 2

¹Pakupita pyaka khumi na pinai, ndaenda pontho ku Djerusalema pabodzi na Bharnabhasi, mbandikwatambo Titu mbandiyenda na iye pabodzi.

²Ndaenda kweneku na thangwi ya kupangizwa kudacitwa ine mu Nzimu, mbandilonga patsogolo pawo Mphangwa Zadidi zinamwaza ine pakati pa ale adakhonda kukhala madjuda. Mbwenye ndazilonga pa khundu kuna ale akhabvekera pikulu kakamwe, toera basa idacita ine na ikhacita ine ikhonde kukhala yapezi.

³Na iye ene Titu akhakhala na ine pabodzi akhali mugerego. Mbwenye pa pyonsene ipi, iye hadakakamizwa kuti asibze tayu.

⁴Penepi pyacitika na thangwi ya abale anango authambi apitambo pakati pathu, mbabvungazikana na ife kudza kasuzumira ufulu una ife muna Kirixtu Yezu, toera atipitise mu udzakazi.

⁵Ife takhonda kuabvera abale enewa na pang'ono pene, toera undimo mwene wa Mphangwa Zadidi ukhale muna imwe.

⁶Pa thangwi ya ale anthu akhaoneka ninga akubvekera - ine sinawo basa na kufuna kwadziwa kuti akhali ani kale, thangwi Mulungu nkhabe kutonga mbalang'ana nkhope - apo iwo anthu enewa akubvekera, nkhabe cinthu cipsa cidandipanga iwo.

⁷Mbwenye padzulu pa pyonsene ipi, iwo adzindikira kuti ine ndikhadanyindirwa na Mulungu kwenda kamwaza Mphangwa Zadidi kuna ale adakhonda kusibza,[4] sawa-sawambo ninga kunyindirwa kudacitwa Pedhru kwenda kamwaza Mphangwa Zadidi kuna anyakusibza.[5]

⁸Thangwi Mulungu adaphata basa muna Pedhru ninga mpoxtolo wa anyakusibza, Mulungu m'bodzi-bodzi aphatambo basa muna ine, kuna ale adakhonda kusibza.

⁹Na kudzindikira kukoma ntima kwa Mulungu kukhadacitirwa ine, Tiyago, Pedhru na Juwau, ale anadziwika ninga machikwa, atipasa manja na nkono wawo wa madyo ine na Bharnabhasi, ninga cidzindikiro cakuphatana. Penepo, iwo atawira kuti ife tisatongwa kwenda kuna anthu adakhonda kusibza, iwo mbaenda kuna anyakusibza.

¹⁰Iwo atiphemba cibodzi basi: Kuti tikumbuke anyakucherenga. Penepi ndipyo pikhasaka ine kucita.

¹¹Mbwenye Pedhru pidadza iye ku nzinda wa Antiyokiya, ndamulongera pakweca, na thangwi ya pyakuipa pidacita iye.

¹²Thangwi mbadzati kufika anthu anango adabuluka kuna Tiyago, Pedhru akhadya na ale adakhonda kukhala madjuda. Mbwenye pidadza kafika iwo, Pedhru atoma kukhala pa khundu, mbathawana na ale adakhonda kukhala madjuda, na thangwi ya kugopa ale adasibza.

¹³Madjuda anango atomambo kupita mu uthambi unowu na iye pabodzi, kufikira Bharnabhasi akwatiwambo na mayengerero awo.

¹⁴Pidaona ine kuti iwo nkhabe kufamba mu njira ya ndimo mwene ya Mphangwa Zadidi, ndampanga Pedhru pamaso pa anthu onsene kuti: “Iwe ndiwe n'djuda, mbwenye usakhala ninga siwe n'djuda, iwe mbuli n'djuda ene. Thangwi yanji usakakamiza ale adakhonda kukhala madjuda, kuti akhale na makhaliro a madjuda?”

¹⁵“Ife, madjuda akubaliwa, mbatikhonda kukhala ‘mbumba ya anyakudawa’ idakhonda kukhala madjuda,

¹⁶tisadziwa kuti nkhabe munthu anakwanisa kukhala wakulungama pamaso pa Mulungu na thangwi yakubvera Mwambo, mbwenye pinakwanisika na kukhulupira Yezu Kirixtu. Na tenepo, ifembo tisatawira Kirixtu Yezu toera ticitwembo anthu akulungama, na thangwi ya kukhulupira Kirixtu, si thangwi ya kubvera Mwambo tayu. Thangwi na kubvera Mwambo, nkhabe munthu anakwanisa kukhala wakulungama pamaso pa Mulungu.

¹⁷“Mphapo ngakhala ife pakusaka kwathu kulungamiswa muna Kirixtu tadzindikira kuti ife ene ndife anyakudawa, nkhulongera kuti Kirixtu ndi nyabasa wa kudawa? Nkhabe citika!

¹⁸Ngakhala ndisamanga pontho papsa cire cidafudza ine, ndisapangisa kuti ine ndine nyakudawa.

¹⁹Na thangwi ya Mwambo, ine ndafa kufera Mwambo, toera ndikhale m'maso kuna Mulungu. Ndakhomerwa pa ntanda pabodzi na Kirixtu.

²⁰Tenepa, sinebve ali m'maso tayu, mbwenye ndi Kirixtu ali m'maso muna ine. Upulumuki uli na ine cincino pa nyama, ndiri na iwo na thangwi ya kukhulupira Mwana wa Mulungu, adandifuna mbaperekeka na thangwi yanga.

²¹Ine nkhabe kufudza kukoma ntima kwa Mulungu, thangwi ngakhala kulungama kusabulukira pa Mwambo, Kirixtu atifera pezi.”