Read Cibverano Cipsa Cisena 2Tm 1 Bible Online

2Tm 1 - Cibverano Cipsa Cisena bible

2Tm 1

¹Ine Paulu, mpoxtolo wa Kirixtu.[1] Yezu na kufuna kwa Mulungu, ninga cipikiriro ca upulumuki ciri muna Kirixtu Yezu,

²ndisalembera iwe Timoti, mwana wanga wakufunika, kukoma ntima, ntsisi na ntendere wa Mulungu Baba na wa Kirixtu Yezu Mbuya wathu, mbipikhale na iwe.

³Ndisapereka takhuta kuna Mulungu, anaphatira ine basa na manyerezero adidi a muntima, ninga mukhamphatira a mbuya anga, pa kukumbuka kwanga iwe kazinji kene masiku na masikati, pa miphembero yanga.

⁴Ndisakumbuka misozi yako, mbandifuna kuonana na iwe, toera nditsandzaye pikulu kakamwe.

⁵Ndisakumbuka cikhulupiro cako ca ndimo mwene, cikhakhala pakutoma na mbuya wako wankazi Loidhe na mai wako Eunise, pontho ndisatawira kuti iwe uli nacombo.

⁶Na thangwi eneyo, ndisakukumbusa pontho kuti ulamusire muwoni wa Mulungu uli muna iwe, udakuphemberera ine pa kukusandzika manja anga.

⁷Thangwi Mulungu hadatipasa Nzimu wa kugopa tayu, mbwenye atipasa Nzimu wa mphambvu, wa kufunana na wa kukhurudzika.

⁸Na tenepo, leka kukhala na manyadzo na kucitira umboni Mbuya wathu, peno na kucitira ine nyaperezo wace, mbwenye na mphambvu za Mulungu, uone nyatwa pabodzi na ine na thangwi ya Mphangwa Zadidi.

⁹Iye atipulumusa mbaticemera toera kukhala mbumba ya Mulungu. Si na thangwi ya mabasa athu tayu, mbwenye ndi na thangwi ya kufuna kwace pontho na ntsisi zace. Kukoma ntima kweneku takupaswa muna Kirixtu Yezu, kutomera midzidzi ya kale na kale,

¹⁰mbukupangizika cincino na thangwi ya kubwera kwa Mpulumusi wathu Kirixtu Yezu. Na thangwi ya Mphangwa Zadidi, Iye akunda kufa mbabweresa pakweca[2] upulumuki, pontho na kukhonda kufa kwa kwenda na kwenda.

¹¹Pa Mphangwa zenezi Zadidi, ndacitwa kuti ndikhale nyakumwaza mphangwa, mpoxtolo, pontho ndikhale mpfundzisi.

¹²Na thangwi eneyo, ndisathabuka, mbwenye sinamanyadzo tayu, thangwi ndisan'dziwa mbani anakhulupira ine, pontho ndisatawira kuti Iye ana mphambvu za kukoya pire pinanyindira ine mpaka Ntsiku eneyo.

¹³Phatisisa ukwatire luso cipfundzo cadidi cidabva iwe kuna ine pa kukhulupira pontho na pa kufunana muna Kirixtu Yezu.

¹⁴Koya cinthu cadidi cidanyindirwa iwe na thangwi ya Nzimu Wakucena uli muna ife.

¹⁵Iwe usadziwa kuti anthu onsene a dziko ya Azya amala kundithawa, pabodzi na Fijelu, na Erimojeni.

¹⁶Mbuya mbaubvere ntsisi mudzi wa Oneziforu, thangwi kazinji kene iye andipasa cipapu, mbakhonda kukhala na manyadzo na kumangwa kwanga.

¹⁷Mbwenye mudafika iye ku Roma andisaka mbakhonda kuneta, mpaka kundigumana.

¹⁸Mbuya mbam'phedze kuti Ntsiku eneyo agumane ntsisi, kuna Mbuya! Iwe usadziwa mwadidi mwene, mabasa mazinji adandiphatira iye ku Efesu.