Read Cibverano Cipsa Cisena 2Tm 2 Bible Online

2Tm 2 - Cibverano Cipsa Cisena bible

2Tm 2

¹Na tenepo, iwe mwana wanga, wangisira na kukoma ntima kuli muna Kirixtu Yezu.

²Pontho, mafala adabva iwe kuna ine pamaso pa amboni azinji, apange anthu akunyindirika anakwanisa kupfundzisambo andzawo.

³Thabuka pabodzi na ine, ninga nyankhondo wadidi wa Kirixtu Yezu.

⁴Nkhabe nyankhondo m'bodzi anaenda kunkhondo mbapingizika na pinthu pyakukhonda kukhala pya nkhondo, thangwi asafuna akome kuna ule adamuendesa ku nkhondo.

⁵Pontho nkhabe nyakuthamanga m'bodzi pa mapika anafuna kutambira nthimba ninga nyakuwina, angakhonda kuthamanga ninga munalongera mitemo yawo.

⁶Nyakulima anaphata basa na mphambvu zonsene, ndiye anatongwa kudya pakutoma misapu ya m'munda.

⁷Pinyerezere mwadidi pidakupanga ine, thangwi Mbuya anakudziwisa pyonsene.

⁸Kumbuka Yezu Kirixtu wa dzindza ya Dhavidhi, adalamuka pa kufa, ninga Mphangwa zanga Zadidi zinamwaza ine.

⁹Ndi thangwi eneyi idathabukira ine mpaka kumangwa ninga nsumankha. Mbwenye fala ya Mulungu hidamangwa tayu.

¹⁰Na thangwi eneyo, ndisapirira pa pyonsene na thangwi ya anyakusankhulwa, toera kuti iwombo agumane upulumuki uli muna Kirixtu Yezu, na mbiri ya kwenda na kwenda.

¹¹Fala ya kunyindirika ndi ixi: Ngakhala tafa na Iye, tinakhalambo m'maso na Iye.

¹²Tingapirira, tinatongambo pabodzi na Iye. Tingan'khonda, Iye anatikhondambo.

¹³Tingakhonda kukhala akunyindirika, Iye anakhala wakunyindirika basi, thangwi anacimwana kukhondeka ekha ene.

¹⁴Akumbuse anthu onsene pinthu penepi, mbuacenjeza mwakukwana patsogolo pana Mulungu.[3], kuti akhonde kuketesana na thangwi ya mafala. Penepi nkhabe kuphedzera cinthu, mbwenye pisataisa ale anabva.

¹⁵Saka kupangizika mwakukwana kuna Mulungu ninga nyabasa wakusowa cinthu cakupasisa manyadzo, pontho mbupfundzisa mwadidi fala ya ndimo mwene.

¹⁶Calira makani akusowa basa na akuipa, thangwi anatowerera penepi, asatekereratu kupwaza Mulungu.

¹⁷Mapfundzisiro awo asanyeka ninga cironda ca diro. Pa nsoka wawo alipo Imineu na Filetu.

¹⁸Enewa asiya pya ndimo mwene, mbalonga kuti kulamuka pa kufa kwamala kucitika kale. Na tenepo, asazunguza kukhulupira kwa anango.

¹⁹[4]Mbwenye miyala yakutsidzikira idaikhwa na Mulungu, na lero nkhabe kutekenyeka, pontho yadhindwa na malemba awa: “Mbuya asadziwa anthu ace,” pontho “Ale onsene analonga dzina ya Mbuya, mbathauke pa pinthu pyakuipa.”

²⁰Lang'anani, mu nyumba ikulu nkhabe gumanika pyombo pya oro na pya parata basi tayu. Mbwenye pisagumanikambo pya miti na pya dongo. Pinango toera kupasa napyo mbiri, pinango pyakukhonda kupasa mbiri.

²¹Munthu anaceneseka pa pinthu penepi, anakhala combo cakupasa mbiri, cidapambulwa, cakufunika kuna Mbuya, pontho mbacisasanyirwa toera kucita basa yonsene yadidi.

²²Thawa kufuna pya kuipa pya uphale, utowere pyakulungama, pyakukhulupira, pyakufunana na pya ntendere na ale anacemera Mbuya na ntima wawo wakucena.

²³Calira panalongwa makani a ciudzemwa, na akusowa basa, thangwi iwe usaadziwa kuti asasosa nthonga.

²⁴Pisatongwa kuti nyabasa wa Mbuya akhonde kukhala mbasosa nthonga, mbwenye mbakhale munthu wadidi kuna onsene, munthu wakukwana toera kupfundzisa, na wakupirira,

²⁵asatongwa asandike na kukhurudzika ale anapokanya, na cidikhiro ca kuti Mulungu anaapasa kuchunyuka, mbaakwata kuti adziwe mwadidi pya ndimo mwene,

²⁶toera tenepa, ndzeru zawo zibwere pontho pakubalwa, mbabuluka pa nsampha wa Dyabu, adaamanga toera iwo acite kufuna kwace.