Read Cibverano Cipsa Cisena Heb 1 Bible Online

Heb 1 - Cibverano Cipsa Cisena bible

Heb 1

¹Kale ene Mulungu alonga kazinji kene na maporofeta kuna ambuya athu, na njira za kusiyana-siyana.

²Mbwenye ntsiku zino zakumalisa, Iye alonga kuli ife na mulomo wa Mwana wace, ule adapasa iye unthaka wa pinthu pyonsene, pontho adacita na iye dziko yonsene.

³Mwana unowu ndi kuyetimira kwa mbiri yace, pontho ndiye anapangisa uunthu wakukwana wa Mulungu mbaphata dziko yonsene na fala yace ya mphambvu. Iye, pakumala kucenesa anthu madawi awo, aenda kakhala kudzulu, ku nkono wa madyo wa Mulungu wa mphambvu zonsene.

⁴Mbakhala nkulu kakamwe kupita maanju, pontho na dzina idapaswa Iye ndi ikulu kakamwe kupita madzina awo.

⁵[1]Thangwi mbani m'bodzi wa maanju akhadapangwa ntsiku inango na Mulungu kuti: “Iwe ndiwe Mwana wanga, lero, Ine ndakubala?” Peno mbampanga pontho kuti: “Ine ndinakhala Baba wace, Iye anakhala Mwana wanga?”

⁶[2]Pontho Mulungu mudapereka Iye Mwana wace wa utombo pa dziko alonga tenepa: “Maanju onsene a Mulungu mbamulambire.”

⁷[3]Pa thangwi ya maanju, Mulungu alonga tenepa: “Iye asacita maanju ace akhale mphepo, anyabasa ace, akhale malirimi a moto.”

⁸Mbwenye pa thangwi ya Mwana alonga tenepa: “[4]Imwe Mulungu, mpando wanu wa umambo unakhala kwenda na kwenda. Mpsimbo yakulungama ndi mpsimbo ya umambo wanu.

⁹Musafuna kulungama, musaipirwa na pyakukhonda kulungama. Na thangwi eneyo, Mulungu, Iye Mulungu wanu, akusankhulani pakati pa andzanu, mbakudzodzani na mafuta akutsandzaisa.”

¹⁰[5]Pontho alonga kuti: “Imwe Mbuya, pakutoma mwacita pantsi pano, pontho

¹¹[6]kudzulu ndi basa ya manja anu. Pyonsene ipi pinadza kamala, mbwenye Imwe ndimwe wa kwenda na kwenda. Pyonsene pinadza kasakala ninga nguwo.

¹²[7]Imwe munadza kaafunya ninga kapoti, iwombo anadza kacinjiwa ninga nguwo. Mbwenye Imwe nkhabe kudza kacinjika, pontho ntsiku zanu cipo zinadza kamala.”

¹³[8]Mbani m'bodzi wa maanju akhadapangwa ntsiku inango na Mulungu kuti: “Khala ku nkono wanga wa madyo, mpaka panaikha ine anyamalwa ako, ninga cinthu cakupwandira manyalo ako?”

¹⁴Kodi maanju enewa onsene awa, siwo tayu mizimu inaphatira basa Mulungu, idatumiwa toera kuphedzera ale anafuna kudza katambira unthaka wa upulumuki?