Read Cibverano Cipsa Cisena Heb 12 Bible Online

Heb 12 - Cibverano Cipsa Cisena bible

Heb 12

¹Ngakhala ndi tenepo, na ifembo, na thangwi ya kuzungulirwa na mwinji uyu ukulu wa amboni, mbatisiyeni pyonsene pinatipingiza, pontho na madawi anatimanga. Mbatithamangeni na phinga yonsene pa ndima idapaswa ife,

²mbatilang'anisa maso athu kuna Yezu, adatoma na kumalisira cikhulupiro cathu. Na kutsandzaya kukhadakoyerwa Iye, apirira nyatwa ya pa ntanda, mbakhonda kutsalakana manyadzo, pontho mbakhala ku nkono wa madyo wa mpando wa Umambo wa Mulungu.

³Toera imwe mukhonde kuneta n'kati mwanu, pontho mukhonde kumala mphambvu, nyerezerani mwadidi Ule adapirira kuzondiwa kudacitirwa Iye ene na anyakudawa.

⁴Pa kumenyana kwanu na kudawa, imwe musati kupirira mpaka kubuluka ciropa canu cene.

⁵[78]Imwe mwaduwala mafala akulanga adakupangani iye ninga anace kuti: “Mwana wanga, leka kupwaza kulanga kwa Mbuya, pontho leka kuneta na kusandika kwace angakuthabusa.

⁶[79]Thangwi Mbuya asasandika ule anafunika na Iye, pontho asamenya onsene ule anatawira kukhala ninga mwanace.”

⁷Pirirani nyatwa, mbamuzitambira ninga muli kulangwa. Mulungu asakucitani ninga ana ace. Thangwi mbani baba anakhonda kusandika mwana wace?

⁸Kusandikwa kusagumanika kuna ana onsene. Imwe mungakhonda kusandikwa, nkhulongera kuti imwe simwe anacedi tayu, mbwenye ndimwe ana akudza.

⁹Pontho ife tikhali na ababa athu a pa nyama, akhatisandika ife mbatikhaalemedza. Apo ndiye tani, ife nkhabe kufunika tim'bvere Baba wathu wa munzimu, toera tikhale na upulumuki?

¹⁰Ababa athu akhatisandika pa n'dzidzi ung'ono pa pire pinaona iwo kuti mphyadidi. Mbwenye Mulungu asatisandika toera uoneke udidi kuna ife, pontho toera ife tikhale akucena ninga Iye.

¹¹Kusandikwa konsene, pakutoma nkhabe kutsandzaisa munthu, mbwenye kusapha muntima. Apo pakupita ntsiku zingasi, kusandikwa kusabala kulungama na ntendere, kuna ale adadzowerereswa kulangwa.

¹²[80]Na tenepo, wangisani manja anu akusowa mphambvu na mabondo anu akuneta.

¹³[81]Sasanyirani njira zakulungama zinafuna kupita na imwe, toera anyakulamala myendo akhonde kububunyuka, mbwenye awangiswe.

¹⁴Wangisirani kukhala mu ntendere na onsene, pontho mbamuperekeka kuna Mulungu. Thangwi mungakhonda kuperekeka kuna Mulungu, nkhabe munthu anadza kaona Mbuya.

¹⁵[82]Cenjerani kuti akhonde kugumanika munthu m'bodzi wakupambulika pa kukoma ntima kwa Mulungu. Pontho pakati panu pakhonde kugumanika n'chici ubodzi wakuwawa kuti ungaphwikira, ukunentseni mbuthapulisa uipi kuna anthu azinji.

¹⁶Pontho mbakhonde kugumanika munthu m'bodzi wakuzuda peno wakupwaza pya Mulungu, ninga pidacita Izauuu adagulisa ukulu wace wa mwana wa utombo, na mbale ibodzi basi ya cakudya.

¹⁷[83]Ninga pinadziwa imwe kale, pakumala penepo, mukhafuna iye kutambira nkhombo, akhonderwa. Iye acita pyonsene, kulira na kulira, mbwenye acimwana kusanduza pire pikhadacitika.

¹⁸Imwe mudafika tayu pa phiri ya Sinai ikhakwanisika kugwedzeka iyo mbikhagaka moto, pontho mudafika pa kuswipa, pa cidima, pa conzi ca mphepo,

¹⁹[84]pa kulira kwa kaluta, pa kubveka kwa mafala adacita kuti ale akhaabva, akhaphemba kuti akhonde kuapangwabve.

²⁰[85]Thangwi akhacimwana kupirira pire pikhatongwa iwo kucita kuti: “Na cinyama cene, cingagwedza phiri, cisatongwa ciphiwe na myala.”

²¹[86]Pyonsene pikhacitika pikhali pinthu pyakugopsa kakamwe, mpaka kufikira Mozesi mbalonga kuti: “Ndisadzadzamira na kugopa!”

²²Mbwenye imwe mwafika ku phiri ya Siyau, ku Djerusalema ya kudzulu, ku nzinda wa Mulungu wa m'maso, mwafika kuna pikwi na pikwi pya maanju pa nsonkhano wakutsandzaya,

²³[87]pa gereja ya ana a utombo a Mulungu, ale adalembwa madzina awo kudzulu. Mwafika pana Mulungu, ntongi wa miseru ya anthu onsene. Mwafika kuna mizimu ya anyakulungama akukwana.

²⁴[88]Mwafika pana Yezu, nkhoswe wa cibverano cipsa. Mwafika pa ciropa cakuwaziwa, cinalonga mwadidi kakamwe kupita ciropa ca Abheli.

²⁵Cenjerani! Lekani kupokanya Ule analonga. Thangwi, ngakhala ale adakhonda kubvera Ule adaacenjeza pantsi pano aoneswa nyatwa, ndiye tanimbo ife tingathawa Ule anaticenjeza kudzulu?

²⁶[89]Ule adacita kuti ntsiku inango, na fala yace atekenyesa mataka, lero asapikirira mbalonga kuti: “Ndinati nditekenyese pontho mataka na kudzulu kwene.”

²⁷Mafala enewa analonga kuti: “Ndinati ndicite pontho papsa” asapangisa kufudza pire pinakwanisa kutekenyeswa. Uku ndi kubveka pinthu pyakulengwa, toera pisale pinakhonda kutekenyeka.

²⁸Na tenepo, na kutambira kunacita ife lero Umambo wakukhonda kutekenyeka, tiperekeni takhuta, pontho mbatilambira Mulungu mwakufunika, na cilemedzo pontho na kun'gopa.

²⁹[90]Thangwi Mulungu wathu ndi moto unafudza!