Read Cibverano Cipsa Cisena Heb 3 Bible Online

Heb 3 - Cibverano Cipsa Cisena bible

Heb 3

¹Na tenepo, abale anga, mbumba ya Mulungu, imwe muli pabodzi pa kucemerwa kudzulu, nyerezerani Yezu, Mpoxtolo wa Mulungu pontho mbakhala Nkulu wa Anyantsembe anacitira ife umboni.

²Iye akhali wakunyindirika na ule adamuikha, ninga Mozesi akhala wakunyindirika, na nyumba yonsene ya Mulungu.

³Yezu alemebza mbapaswa mbiri ikulu kakamwe kupita Mozesi, sawa-sawa ninga nyakumanga nyumba asalemebza pikulu kakamwe kupita nyumba idamanga iye.

⁴Thangwi nyumba yonsene isamangwa na munthu, mbwenye Mulungu ndiye adacita pinthu pyonsene.

⁵[15]Na tenepo, Mozesi akhali wakunyindirika ninga n'dzakazi pa nyumba yonsene ya Mulungu, mbacita umboni wa pire pikhafuna kudza kalongwa kutsogolo,

⁶mbwenye Kirixtu.[16] ndi wakunyindirika ninga Mwana, pa Nyumba ya Mulungu. Nyumba eneyi ndife pano, ngakhala tanyindiradi mbatidikhiradi pire pinatipasa mbiri.[17]

⁷Tenepo, pinalonga Nzimu Wakucena kuti: “[18]Lero, imwe mungabva fala yace,

⁸[19]lekani kuumisa mitima yanu, ninga pidacita ambuya anu pa cikuti, pa n'dzidzi wakuleserwa kwawo n'thando.

⁹[20]Ndi mwenemu mudandinyengerera ambuya anu mbandilesera, pakumala kuona mabasa adacita Ine pa pyaka makumanai.

¹⁰[21]Na thangwi eneyo, Ine ndaipirwa na anthu enewa mbindiapanga kuti: Awa mitima yawo isakhala mbidodomeka, iwo nkhabe kudzindikira njira zanga.

¹¹[22]Na tenepo, Ine ndaipirwa mbindidumbira kuti: Iwo cipo anadza kapita pa mbuto yanga ya kupuma.”

¹²Citani mphole abale anga, kuti pakhonde kuoneka m'bodzi wanu na ntima wa kuipa na wakukhonda kutawira, mbasiya Mulungu wa m'maso.

¹³Mbwenye pisafunika kuti mupasane cipapu m'bodzi na m'bodzi ntsiku zonsene, pa n'dzidzi unacemerwa “lero”, toera pakhonde kuoneka m'bodzi wanu aumiswe ntima na thangwi ya kunyengezwa na madawi,

¹⁴thangwi tadza kakhala andzace Kirixtu, male ngakhala ife tanyindiradi mbatiwangisiradi mpaka pakumalisira, ninga mukhanyindira ife pakutoma.

¹⁵[23]Ndi thangwi eneyo pyalongwa kuti: “Ngakhala imwe lero mwabva fala yace, lekani kuumisa mitima yanu, ninga pa cikuti.”

¹⁶Lang'anani, mbani adabva fala ya Mulungu mbacita cikuti? Si ale onsene tayu adabulusa Mozesi mu Idjipitu?

¹⁷[24]Mulungu akhadaipirwa na ani pa pyaka makumanai? Si na ale tayu adadawa mbamala kufa n'thando?

¹⁸Pontho mbani akhadadumbirirwa na Mulungu kuti cipo anadza kapita pa mbuto yace ya kupuma? Siwo ale akhakhonda kubvera tayu?

¹⁹Na tenepo, taona kuti na thangwi yakukhonda kutawira, acimwana kupita.