Read Cibverano Cipsa Cisena Heb 8 Bible Online

Heb 8 - Cibverano Cipsa Cisena bible

Heb 8

¹Cikulu maka-maka cinalonga ife ndi ca kuti, tinaye nkulu wa anyantsembe ninga unowu, adakhala ku nkono wa madyo pa mpando wa Umambo wa Mphambvu za kudzulu.

²Pontho Iye ndi nyabasa mu mbuto ya Mulungu, nyumbadi ya ntsembe ya Mulungu idamangwa na Mbuya, mbikhonda kucitwa na munthu.

³Nkulu onsene wa anyantsembe asaikhwa toera kupereka miyoni na ntsembe. Na thangwi eneyo, pikhafunika kuti Iye nyantsembe unowu akhalembo na cinthu ca kupereka.

⁴Yezu mbadakhala ali pantsi pano, mbadakhala nyantsembe tayu, thangwi alipo kale ale anapereka miyoni ninga munalongera Mwambo.

⁵[41]Iwo asaphata basa mu mbuto ya Mulungu yakusangizira, pontho ndi cithundzi-thundzi ca mbuto ire iri kudzulu, sawa-sawa ninga mudapangirwa Mozesi mukhafuna iye kumanga nyumba ya ntsembe ya Mulungu kuti: “Cita mphole, usafunika ucite pyonsene sawa-sawa ninga mudapangizwa iwe pa phiri.”

⁶Mbwenye cincino, basa idapaswa Yezu ndi ikulu kakamwe kupita yawo. Sawa-sawambo na cibverano cidacitira unkhoswe Yezu ndi cikulumbo kupita cakale, thangwi cisabulukira pa pipikiriro pikulumbo.

⁷Thangwi cibverano cakutoma mbicidakhala ndi cakukwanira, mbipidafunika kusaka cibverano cinango cipsa tayu.

⁸[42]Mbwenye Mulungu aona kuti pidakwana tayu, mbalonga tenepa: “Lang'anani, ziri kufika ntsiku zinafuna Ine kucita cibverano cipsa na mbumba ya Izarayeli pontho na mbumba ya Djudaa.

⁹[43]Nkhabe kudza kakhala ninga cibverano cidacita Ine na ambuya awo mudaaphata Ine na manja anga, toera kuabulusa mu dziko ya Idjipitu. Thangwi iwo asiya kubvera cibverano canga, Ine mbindiasiya Ndipyo pidalonga Mbuya.

¹⁰[44]Mbuya alonga tenepa: Ceneci ndi cibverano cinadza kacita Ine na mbumba ya izarayeli, pakupita ntsiku zenezo. Ndinaikha myambo yanga mu ndzeru zawo, pontho mbandiilembera m'mitima mwawo. Ndinati ndikhale Mulungu wawo, iwo anati akhale mbumba yanga.

¹¹[45]Nkhabebve kudza kapfundzisana, peno m'bale wace mbalonga kuti: ‘Dziwani Mbuya’, thangwi iwo onsene anati andidziwe, kutomera kuna ang'ono mpaka kuna akulu.

¹²[46]Thangwi Ine ndinadza kaabvera ntsisi kuipisa kwawo, pontho nkhabe kudza kakumbukabve madawi awo.”

¹³Mulungu pa kucicemera “cipsa” cibverano ici, nkhulongera kuti cakutoma cadza cakale. Cinthu cinacitika cakale peno cinakulupala, ciri dhuzi na kufuna kumala.