Read Cibverano Cipsa Cisena Tg 2 Bible Online

Tg 2 - Cibverano Cipsa Cisena bible

Tg 2

¹Abale anga, ninga anyakukhulupira Yezu Kirixtu Mbuya wathu wa mbiri, lekani kusankhulana peno kulang'ana nkhope ya munthu.

²Tendeni tione, ngakhala pa nsonkhano wanu apita munthu m'bodzi na mphete n'cala ya oro na nguwo zakubalika, mbapitambo n'cherengi na nguwo zakusakala pontho mbaziswipa,

³imwe mbumulang'anisa ule adabvala nguwo zakubalika mbumumpanga tenepa: “Imwe khalani apa pa mbuto yadidi,” mbwenye mbumupanga n'cherengi kuti: “Iwe khala dzololo apo,” peno kuti: “Khala pantsi dhuzi na panasandzikira ine myendo yanga.”

⁴Tenepa sikusankhulana tayu, mbumukhala anyakutonga miseru a manyerezero akuipa?

⁵Bvani abale anga akufunika: Mulungu hadasankhula anaoniwa acherengi pa dziko toera akhale apfumi pa kukhulupira, pontho adye unthaka wa Umambo udapikirira Iye kuna ale ananfuna tayu?

⁶Mbwenye imwe musapwaza n'cherengi. Kodi siwo anyakupfuma anakupondererani tayu? Siwo enewa tayu anakukakamizani kwenda ku nyumba zakutongera miseru?

⁷Siwo enewa tayu anaxola dzina yadidi idapaswa imwe?

⁸[4]Ngakhala imwe musabveradi mwambo wa Umambo unagumanika m'Bukhu ya Mulungu, unalonga kuti: “Funa ndzako ninga iwe ene,” musacita mwadidi.

⁹Mbwenye mungasankhulana, muli kudawa, pontho munakoneswa na mwambo ninga anthu akupwaza mwambo.

¹⁰Thangwi ule anakoya mwambo onsene, mbwenye mbapwaza pa matongero mabodzi basi, adawa pa mwambo onsene.

¹¹[5]Thangwi ule adalonga kuti: “Leka kucita upombo,” alongambo kuti: “Leka kupha munthu.” Ngakhala iwe hudacita upombo tayu, mbwenye wapha munthu, ndiwe nyakupwaza mwambo.

¹²Longani, pontho mucite ninga anthu anadza katongwa na mwambo wa ufulu.

¹³Thangwi kuna ale adasowa ntsisi kunaoneka kutongwa kwakusowa ntsisi. Ntsisi zinakunda kutongwa!

¹⁴Abale anga, pisaphedzeranji munthu angalonga kuti ndina cikhulupiro mbasowa mabasa? Kodi cikhulupiro ceneci cinakwanisa kumpulumusa?

¹⁵Ngakhala m'bale wathu wa mamuna peno wankazi asowa cakubvala, peno cakudya ca ntsiku na ntsiku,

¹⁶m'bodzi wanu mbampanga tenepa: “Kafikeni mwadidi. Kapisirweni, mudye mbumukhuta,” mbakhonda kumpasa cinthu, penepi pisaphedzeranji?

¹⁷Sawa-sawambo, cikhulupiro cokha cene, cingasowa mabasa, cafa.

¹⁸Mbwenye unango analonga tenepa: “Iwe una cikhulupiro, ine ndina mabasa.” Ndipangize cikhulupiro cako cakusoweka mabasa, ine ndikupangize cikhulupiro canga na mabasa.

¹⁹Iwe usatawira kuti Mulungu ndi m'bodzi basi? Ndimo mwene! Na iyo ene mizimu yakuipa isatawira, pontho mbidzadzamira!

²⁰Iwe dzemwa! Usafuna udziwe mwadidi kuti cikhulupiro cingasowa mabasa nkhabe kuphedzera cinthu.[6]?

²¹Kodi Baba wathu Abharaamu hadalungamiswa na mabasa tayu, mudapereka iye mwana wace Izaki pa guwa ya ntsembe?

²²Lang'ana kuti kukhulupira na mabasa pikhaphata basa pabodzi, pontho kukhulupira kwadzadziswa na mabasa.

²³[7]Tenepa, pyasimbiswa m'Bukhu ya Mulungu kuti: “Abharaamu akhulupira Mulungu, penepi pyancita kuti iye akhale wakulungama,” pontho iye adza kacemerwa xamwali wa Mulungu.

²⁴Onani kuti munthu asalungamiswa na mabasa, si na kukhulupira basi tayu.

²⁵[8]Pibodzi-bodzi pyacitika na Raabhi nkazi wa lukwali. Iye hadalungamiswa na mabasa tayu, mudatambira iye a ntapa-nduwa mbaabulusa na njira inango?

²⁶Na tenepo, ninga manungo angasowa nzimu afa, tenepambo cikhulupiro cingasowa mabasa, cafa.