Read Cibverano Cipsa Cisena Tg 5 Bible Online

Tg 5 - Cibverano Cipsa Cisena bible

Tg 5

¹Cincino bveserani imwe apfumi! Lirani mbamukhuwa, na thangwi ya ucherengi unafuna kukugwerani.

²Mpfuma zanu zabvunda, pontho nguwo zanu zamala dyiwa na ucenje.

³Ma oro anu na parata zanu pyamala dzala furuju, pontho furuju zace zinakucitirani umboni wa kuipa. Umboni unowu unadza kapisa manungo anu ninga moto. Imwe mwagumanya mpfuma ntsiku zino zakumalisa.

⁴Lang'anani ntengo udatambirisa imwe anyabasa adabvuna minda yanu mbumuabera, uli kukulirirani. Kulira kwa anyakubvuna, kwafika m'makutu mwa Mbuya wa Anyankhondo.

⁵Imwe mwakhala mwadidi kakamwe mbamudungudza pa dziko, mbamucita pinafuna imwe, pontho mbamunenepa ninga pifuyo pa ntsiku yakufuna kwenda kaphiwa.

⁶Mwankonesa nyakulungama mbamum'pha, iye mbakhonda kucita mphambvu kuna imwe.

⁷Na tenepo, abale anga, khalani akupirira mpaka kubwera kwa Mbuya. Lang'anani kudikhira na kupirira kunacita nyakulima misapu yadidi ya m'munda mwace, mpaka kubvumba kwa mulungu wakutoma na wakumalisa wa pacaka.

⁸Khalanimbo a kupirira mbumuwangisa mitima yanu, thangwi kubwera kwa Mbuya kuli dhuzi.

⁹Abale anga, lekani kusumirana m'bodzi na m'bodzi, toera mukhonde kutongwa. Lang'anani nyakutonga miseru ali pa nsuwo!

¹⁰Abale, kwatirani luso maporofeta adalonga na dzina ya Mbuya, kupirira kudacita iwo pa nyatwa.

¹¹[13]Ninga imwe musapidziwa, ife tisadziwa kuti anyakutsandzaya ndi ale anapangisa kupirira kwawo. Imwe mwabva kupirira kwa Djobo, pontho mwaona pidancitira Mbuya pakumalisa. Thangwi Mbuya ndi wa ntsisi pontho ndi wakukoma ntima.

¹²Maka-maka abale anga, lekani kudumbira, peno kudumbira na kudzulu, peno na pantsi pano, peno kudumbira na dzina ya cinthu cinango. Mbwenye kulonga kwanu mbukukhale “ande,” ande, “nkhabe,” nkhabe, toera mukhonde kutongwa.

¹³Alipo anathabuka pakati panu? Mbaphembere. Alipo adakomerwa? Mbaimbe nyimbo zakukuza nazo Mulungu.

¹⁴Alipo anaduwala pakati panu? Mbacemere akulu a gereja[14] kuti am'phemberere, mban'dzoza mafuta na dzina ya Mbuya.

¹⁵Maphembero anacitwa na kukhulupira, anawangisa ntenda. Mbuya anamulamusa. Pontho ngakhala iye adawa, analekererwa.

¹⁶Na tenepo, dambulani madawi anu kuna m'bodzi na m'bodzi, mbamuphembererana m'bodzi na m'bodzi, toera muwangiswe. Kuphembera kwa munthu wakulungama kuna mphambvu zikulu.

¹⁷Eliya akhali munthu ninga ife. Iye aphembera na mphambvu toera mulungu akhonde kubvumba. Na tenepo, pyapita pyaka pitatu na myezi mitanthatu, mulungu mbakhonda kubvumba pantsi pano.

¹⁸Iye aphembera pontho, mulungu mbabvumba, mataka mbabala pontho misapu yawo.

¹⁹Abale anga, m'bodzi wanu angasiya pya ndimo mwene unango mbam'bweza pontho,

²⁰dziwani kuti: Anakwanisa kubweza nyakudawa ku njira yakutaika, anapulumusa munthu unowu pa kufa, pontho penepi, pisacita kuti madawi mazinji alekererwe.