Read Cibverano Cipsa Cisena 1Pd 4 Bible Online

1Pd 4 - Cibverano Cipsa Cisena bible

1Pd 4

¹Na tenepo, ninga Kirixtu aona nyatwa pa nyama, na imwembo khalani dzololo na manyerezero mabodzi ene a Kirixtu, thangwi ule adaona nyatwa pa nyama amwazana na kudawa,

²toera pa ntsiku zanu zidasala pa nyama, mukhonde kukhala pontho sawa-sawa ninga munafunira anthu, mbwenye mukhale ninga munafunira Mulungu.

³Kale ene, imwe mwamala midzidzi mizinji mbamucita pire pinatsandzaisa ale anakhonda kutawira Yezu. Pa midzidzi eneyo, imwe mukhacita pyakuzuda, pyalukwali, pyakuledzeresa, maphwandu akunyanyasa, maphwandu akuledzeresa, na pyakulambira alungu apezi kwakupasa manyadzo.

⁴Iwo asadzuma, thangwi imwe nkhabebve kufamba pabodzi na iwo mu njira zawo za lukwali ikulu, na thangwi eneyo, iwo asakutiKhanani.

⁵Mbwenye iwo anati apitawire okha kuna Ule adamala kusasanyira kuti atonge ali m'maso na akufa.

⁶Na thangwi eneyo, Mphangwa Zadidi zamwazwambo kuli anyakufa, toera iwo atongwe pa nyama ninga munatongerwa anthu, apulumuswembo mu nzimu ninga munafunira Mulungu.

⁷Kumala kwa pinthu pyonsene kuli dhuzi. Na tenepo, khalani na ndzeru pontho mukhale akucenjera, toera mukwanise kuphembera.

⁸[17]Maka-maka funanani mwakukwana m'bodzi na m'bodzi, thangwi kufunana kusalekerera madawi mazinji.

⁹Tambiranani m'manyumba mwanu m'bodzi na m'bodzi, mbamukhonda kudungunya.

¹⁰M'bodzi na m'bodzi mbaphatise basa muwoni udatambira iye toera kuphedza na iwo andzace, mbaonerera mwadidi basa ya kukoma ntima kwa Mulungu kwakusiyana-siyana.

¹¹Ngakhala munthu ali kulonga, mbalonge ninga ali kumwaza fala ya Mulungu. Ngakhala munthu ali kuphata basa, mbaphate na mphambvu zinampasa Mulungu, toera pa pinthu pyonsene Mulungu apaswe mbiri na thangwi ya Yezu Kirixtu, Ule anapaswa mbiri na mphambvu kwenda na kwenda. Ameni.

¹²Abale akufunika, lekani kudzumatirwa na moto unaoneka pakati panu toera kukuleserani, ninga ndi cinthu cakukhonda kudziwika cinacitika pakati panu.

¹³Mbwenye tsandzayani pa n'dzidzi unakhala imwe nanthu pa nyatwa za Kirixtu, toera kuti mbiri yace ingapangizika, imwe mukhalembo na kutsandzaya kukulu.

¹⁴Ngakhala imwe musaxoliwa na thangwi ya dzina ya Kirixtu, tsandzayani, thangwi Nzimu wa mbiri, Iwo Nzimu Wakucena, uli na imwe.

¹⁵Mphapo mbaleke kuona nyatwa m'bodzi wanu ninga phanga, peno mbava, peno mphandu, peno ninga munthu anapitira mathangwi a munthu unango.

¹⁶Mbwenye ngakhala munthu asaona nyatwa na thangwi ya kukhala nyakutawira Yezu, mbaleke kukhala na manyadzo, mbwenye mbapase mbiri Mulungu na thangwi ya kucemerwa nyakutawira Yezu.

¹⁷Thangwi wafika n'dzidzi wa ana Mulungu atome kutongwa. Lang'anani, ngakhala watoma kuna ife, ndiye tani kuna ale anakhonda kubvera Mphangwa Zadidi za Mulungu?

¹⁸[18]Pontho, “ngakhala kuna nyakulungama pisanentsa kupulumuswa, ndiye tani kuna nyakuipa ntima na nyakudawa?”

¹⁹Na thangwi eneyo, ale anaona nyatwa ninga munafunira Mulungu, asatongwa anyindire nzimu wawo kuna N'citi wawo wakunyindirika pontho mbacita udidi.