Read Cibverano Cipsa Cisena 2Pd 3 Bible Online

2Pd 3 - Cibverano Cipsa Cisena bible

2Pd 3

¹Abale akufunika, iyi ndi tsamba yaciwiri inakulemberani ine cincino. Pa matsamba mawiri awa, ndisasaka kuti ndikukumbuseni toera kulamusira ndzeru zanu zadidi,

²toera imwe mukumbuke mafala adalongwa kale ene na maporofeta a Mulungu, pontho toera mukumbuke matongero a Mbuya, Mpulumusi wathu, ale adakupfundzisani apoxtolo anu.

³Pakutoma dziwani kuti ntsiku zakumalisa, anabulukira anyakusingirira mbakusingirirani, pontho mbatowerera kucita pinafuna iwo,

⁴mbalonga tenepa: “Ciri kupi cipikiriro cidacita Iye kuti anabwera pontho? Thangwi kutomera pa kufa kwa ambuya athu, pyonsene piri sawa-sawa ninga pakutoma kwa dziko.”

⁵Mbwenye iwo asaduwala cakhomu kuti na fala ya Mulungu, kutomera kale na kale, kudzulu na pantsi kukhalipo. Mataka apambulwa pa madzi mbacitwa kubulukira pa madzi.

⁶Pontho dziko eneyo ya kale yamala kudyiwa na madzi makulu, mbifudzika.

⁷Na fala ibodzi-bodzi, kudzulu na pantsi kunaona ife cincino kwakoyerwa moto, kwakoyiwa mpaka ntsiku ya kutongwa na ya kufubza kwa anyakuipa mitima.

⁸Mbwenye abale anga akufunika, lekani kuduwala ici: Kuti ntsiku ibodzi kuna Mbuya, ndi ninga pyaka cikwi cibodzi, pontho pyaka cikwi cibodzi, ndi ninga ntsiku ibodzi.

⁹Mbuya nkhabe kudembuka na kucita pire pidapikirira Iye, ninga munanyerezera anthu anango. Mbwenye Iye ana ntsisi na imwe, thangwi nkhabe funa kuti munthu m'bodzi ataike, mbwenye asafuna kuti onsene afikire n'dzidzi wakuchunyuka.

¹⁰Mphapo Ntsiku ya Mbuya inabwera ninga mbava. Kudzulu kunafudzika na kutitimira kukulu. Pinthu pyonsene pya kudzulu pinamala kufudziwa na kupisa, pontho pantsi pano na pyonsene piri pano, pinapiswa.[12]

¹¹Thangwi kufubza kweneku kunafuna kucitwa pinthu pyonsene, imwembo musafunika mukhale tani? Makhaliro anu mbakhale akulungama na akuperekeka kuna Mulungu,

¹²mbamudikhira na kulang'anira Ntsiku ya Mulungu, pontho mbamucita kuti ifike na mwansanga. Ntsiku eneyo, kudzulu kunafudziwa na moto, pontho na pinthu pyonsene piri kudzulu pinamala kunyunguluka na kupisa.

¹³Mbwenye ninga mudapikirira Iye, tisadikhira kudzulu kupsa na pantsi papsa, kule kunagumanika kulungama.

¹⁴Na tenepo, abale anga akufunika, pa n'dzidzi unadikhira imwe penepi, wangisirani toera mugumaniwe na Iye mu ntendere, mbamusowa madawi na mathangwi.

¹⁵Dziwani kuti kupirira kwa Mbuya wathu ndi upulumuki kwa anthu, ninga mudakulemberanimbo m'bale wathu wakufunika, Paulu, na udziwisi udampasa Mulungu.

¹⁶Iye asalemba sawa-sawa m'matsamba ace onsene, mbalonga pinthu penepi. Matsamba ace ana pinthu pinango pyakunentsa kupibvesesa, pinacita kuti anthu akukhonda kudziwa pinthu na akufewa pa kukhulupira asadodomesa, ninga pinacita iwombo na malemba anango a m'Bukhu ya Mulungu, mbataika napyo.

¹⁷Na tenepo, abale anga akufunika, ninga musadziwa kale, citani mphole gopa munanyengezwa mbamukwekwetwa na pya uthambi pya anthu akusowa ntemo, mbamusiya kunyindira kwanu, mbamugwa.

¹⁸Mbwenye kulani mwa kukoma ntima kwa Mulungu pa kudziwa Mbuya wathu na Mpulumusi wathu Yezu Kirixtu. Mbiri mbikhale na Iye, cincino na kwenda na kwenda. Ameni!