Read Cibverano Cipsa Cisena 1Jw 2 Bible Online

1Jw 2 - Cibverano Cipsa Cisena bible

1Jw 2

¹Ananga, ndisakulemberani pinthu ipi toera mukhonde kugwa n'kudawa. Mbwenye munthu m'bodzi angadawa, tinaye munthu wa kutibvunulira patsogolo pana Baba, ndiye Yezu Kirixtu Wakulungama.

²Iye ndi ntsembe inafudza madawi athu. Pontho si yakufudza madawi athu basi tayu, mbwenye pontho na madawi a anthu onsene.

³Tingabvera matongero ace, tisapangisa kuti tisan'dziwadi Mulungu.

⁴Ule analonga kuti: “Ine ndisan'dziwa,” mbwenye mbakhonda kubvera matongero ace, unowu ndi nyauthambi. Pontho nkhabemo pya ndimo mwene muna iye.

⁵Mbwenye munthu anabvera fala yace, kufuna kwa Mulungu kwadzala muna iye. Na tenepo, tisadziwa kuti tiri muna Iye.

⁶Ule analonga kuti ali kukhala muna Iye, asatongwa kuti afambe ninga Iye.

⁷Anyakufunika, matongero awa anakulemberani ine, si mapsa tayu, mbwenye ndi matongero akale ali na imwe kutomera pakutoma. Ndizo Mphangwa zidabva imwe.

⁸Mbwenye ipi pinakulemberani ine, ndi matongero mapsa. Matongero enewa mba ndimo mwene muna Iye na muna imwe. Thangwi cidima ciri kumala, cieza ca ndimo mwene ciri kuyetimira.

⁹Munthu analonga kuti ali kukhala mu cieza, mbwenye mbaida m'bale wace, unowu adzati kubuluka n'cidima.

¹⁰Mphapo ule anafuna m'bale wace, unowu ali mu cieza. Na tenepo, muna iye nkhabe cinthu ca kun'gwegwedusa.

¹¹Mbwenye ule anakhala mbaida m'bale wace, ali n'cidima, pontho asafamba n'cidima. Na tenepo, nkhabe dziwako kunaenda iye, thangwi cidima campasa uboli-boli.

¹²Ananga, ndisakulemberani ipi thangwi madawi anu alekererwa, na thangwi ya dzina ya Yezu.

¹³Ababa, ndisakulemberani ipi thangwi imwe musan'dziwa Ule akhalipo kale dziko mbidzati kucitwa. Imwe aphale, ndisakulemberani thangwi mwankunda Wakuipa.

¹⁴Ananga, ndakulemberani thangwi musan'dziwa Baba. Ndakulemberani imwe ababa, thangwi imwe musan'dziwa ule akhalipo kale ene dziko mbidzati kucitwa. Ndakulemberani imwe aphale thangwi imwe ndimwe a mphambvu. Na tenepo, fala ya Mulungu iri muna imwe, pontho mwankunda Wakuipa.

¹⁵Lekani kufuna dziko, pontho na pinthu piri n'dziko. Thangwi munthu anafuna dziko, kufuna kwa Mulungu Baba nkhabemo muna iye.

¹⁶Thangwi pyonsene piri pa dziko, ninga pinasirira nyama, pinasirira maso, pontho na kupikuza thangwi ya mpfuma, penepi pidabuluka kuna Baba tayu, mbwenye pyabuluka pa dziko.

¹⁷Dziko, na pyonsene pire pinasirira iyo, pinamala. Mbwenye ule anacita kufuna kwa Mulungu, anakhala kwenda na kwenda.

¹⁸Ananga, uno ndi n'dzidzi wakumalisa. Pontho ninga mwapibva kuti nyamalwa wa Kirixtu ali kubwera, apo lero dziwani kuti ali kuoneka azinji anyamalwa a Kirixtu. Na thangwi eneyo, tisadziwa kuti uno ndi n'dzidzi wakumalisa.

¹⁹Iwo abuluka muna ife, mbwenye akhali andzathudi tayu. Thangwi mbadakhala andzathu, mbadakhala na ife. Mbwenye na thangwi ya kubuluka kwawo, pisapangisa kuti onsene akhali andzathu tayu.

²⁰Mbwenye imwe mwadzobza na Mulungu Wakucena, pontho monsene musadziwa.

²¹Siri kukulemberani na thangwi yakukhonda dziwa kwanu pinthu pya ndimo mwene tayu, mbwenye thangwi musapidziwa, pontho thangwi musadziwa kuti pinthu pyonsene pya ndimo mwene nkhabe kubala uthambi.

²²Mbani nyauthambi? Ndi ule anakhonda kuti Yezu si Kirixtu tayu. Unowu ndiye nyamalwa wa Kirixtu, ule anakhonda Baba na Mwana ene.

²³Onsene anakhonda Mwana, unowu nkhabembo Baba. Mbwenye ule anamulonga pakweca, unowu ana Baba.

²⁴Imwembo koyani m'mitima mwanu pyonsene pidabva imwe kutomera pakutoma. Pire pyonsene pidabva imwe kutomera pakutoma mungakhala napyo m'mitima mwanu, imwe munati mukhalembo pabodzi na Mwana pontho na Baba.

²⁵Pidatipikirira Iye ndi ipi: Upulumuki wakukhonda kumala.

²⁶Ine ndisakulemberani pinthu ipi, na thangwi ya ale anafuna kukunyengererani.

²⁷Pa thangwi yanu, kudzobza kudatambira imwe kuna iye kuli muna imwe, pontho nkhabe funika munthu akupfundziseni. Mbwenye ninga kudzobza kwace kudatambira imwe muna Iye nkhwa ndimo mwene si kwa uthambi tayu, kunakupfundzisani pa thangwi ya pinthu pyonsene. Khalani muna Iye ninga mudakupfundzisirani Iye.

²⁸Ananga, cincino khalani muna Kirixtu, toera Iye angapangizika tin'nyindire, tikhonde kupasika manyadzo pamaso pace, pakubwera kwace.

²⁹Ngakhala imwe musadziwa kuti Yezu ndi wakulungama, dziwanimbo kuti onsene ale anacita pyakulungama abalwa na Mulungu.