Read Cibverano Cipsa Cisena 1Jw 5 Bible Online

1Jw 5 - Cibverano Cipsa Cisena bible

1Jw 5

¹Munthu onsene anatawira kuti Yezu ndi Kirixtu, unowu abalwa na Mulungu. Pontho munthu onsene anafuna Baba, mbafunembo Mwana wace.

²Tingafuna Mulungu mbatibvera matongero ace, penepi ndipyo pinapangisa kuti tisaafuna ana a Mulungu.

³Thangwi kufuna Mulungu nkhubvera matongero ace, pontho matongero ace nkhabe lemera.

⁴Thangwi ule anabalwa na Mulungu asakunda dziko. Tisakwanisa kukunda dziko na kukhulupira kwathu.

⁵Ndi ani anakwanisa kukunda dziko? Ndi ule basi anatawira kuti Yezu ndi Mwana wa Mulungu.

⁶Yezu Kirixtu ndi unowu adabwera na madzi na ciropa. Si na madzi basi tayu, mbwenye ndi na madzi na ciropa. Pontho Nzimu Wakucena ndiwo unacita umboni, thangwi Nzimu Wakucena ndi wa ndimo mwene.

⁷Piripo pinthu pitatu pinacita umboni [kudzulu. Baba, Fala na Nzimu Wakucena. Pitatu ipi, pisabverana.

⁸Pontho pitatu ipi, ndipyo pinacita umboni pa dziko.[6]] Nzimu Wakucena, madzi na ciropa. Pitatu ipi, ndi cinthu cibodzi basi.

⁹Ife tisatawira umboni wa anthu, mbwenye umboni wa Mulungu ndiwo ukulu, thangwi ndi umboni unacitira iye Mwana wace.

¹⁰Munthu anatawira Mwana wa Mulungu, anawo umboni unowu muntima mwace. Mbwenye ule anakhonda kutawira Mulungu, asacita Mulungu ninga ndi nyauthambi. Thangwi asakhonda umboni udatipasa Mulungu na thangwi ya Mwana wace.

¹¹Umboni wa Mulungu ndi uyu: Kuti Mulungu atipasa upulumuki wakukhonda kumala. Upulumuki unowu uli muna Mwana wace.

¹²Ule ana Mwana wa Mulungu, anawo upulumuki. Mbwenye anasowa Mwana wa Mulungu, nkhabe upulumuki.

¹³Ine ndakulemberani pyonsene ipi, toera imwe mudatawira dzina ya Mwana wa Mulungu, mudziwe kuti munawo upulumuki wakukhonda kumala.

¹⁴Cinyindiro cina ife muna Iye ndi ici: Kuti tingam'phemba cinthu ninga munafunira Iye, Iye asatibva.

¹⁵Pontho tingadziwa kuti Iye asatibva pa pyonsene pinam'phemba ife, tisadziwa kuti tapasiwa pyonsene pidam'phemba ife.

¹⁶Munthu anaona m'bale wace mbacita kudawa kunakhonda kubala kufa, mbam'phemberere, Mulungu anampulumusa. Penepi ndisalongera kuna ale kuti kudawa kwawo nkhabe kubala kufa. Thangwi kulipo kudawa kunabala kufa. Siri kulonga enewa tayu. Kuna anthu enewa, lekani kuaphemberera.

¹⁷Pinthu pyonsene pyakukhonda kulungama ndi kudawa. Mbwenye kulipo kudawa kunakhonda kubala kufa.

¹⁸Tisadziwa kuti onsene adabalwa na Mulungu nkhabe kukhala n'kudawa, thangwi Mwana wa Mulungu anaakoya. Na tenepo, Sathani nkhabe kuacita kuipa.

¹⁹Tisadziwa kuti ife ndife a Mulungu, pontho dziko yonsene isatongwa na Sathani.

²⁰Tisadziwambo kuti Mwana wa Mulungu abwera, mbatipasa ndzeru toera tidziwe Mulungu wa ndimo mwene. Pontho ife tiri muna Mulungu wa ndimo mwene, muna Mwana wace Yezu Kirixtu. Yezu Kirixtu unowu, ndiyedi Mulungu na upulumuki wakukhonda kumala.

²¹Ananga, citani mphole na alungu apezi.