Read Cibverano Cipsa Cisena Cid 1 Bible Online

Cid 1 - Cibverano Cipsa Cisena bible

Cid 1

¹Cidziwiso ca Yezu Kirixtu[1], cidapaswa Iye na Mulungu toera adziwise adzakazi ace pire pinafuna kucitika cincino. Iye atuma anju wace toera apidziwise kuna Juwau, n'dzakazi wace,

²adacita umboni wa pyonsene pidaona iye, kweneku ndi kubveka kuti: Fala ya Mulungu, na umboni wa Yezu Kirixtu.

³Mbatsandzaye ule anaona na ale anabva mafala awa a ciporofeta, pontho mbakoya pinthu pidalembwa mwenemu, thangwi n'dzidzi uli dhuzi.

⁴Ine Juwau, ndiri kulembera magereja manomwe a ku dziko ya Azya. Kukoma ntima kwa Mulungu na ntendere mbapikhale kuna imwe, ku khundu kwa Ule alipo, Ule akhalipo, na Ule anafuna kudza, na kuna mizimu minomwe inagumanika patsogolo pa mpando wace wa umambo,

⁵pontho na ku khundu kwa Yezu Kirixtu, nyamaso wakunyindirika, wakutoma kulamuka pa akufa, pontho nkulu wa amambo a pantsi. Iye asatifuna, pontho atiombola m'madawi mwathu na ciropa cace,

⁶mbaticita umambo na anyantsembe, toera tiphatire basa Mulungu wace na Baba wace. Unowu, mbapaswe mbiri na mphambvu za kwenda na kwenda! Ameni.

⁷[2]Lang'anani, Iye ali kudza m'makole. Anthu onsene anamuona, na ale ene adamulasa. Madzindza onsene a pantsi anati alire na thangwi yace. Tenepa pinacitika! Ameni.

⁸Mulungu Mbuya alonga tenepa: “Ine ndine Alufa na Omega,[3]” Iye alipo, Iye akhalipo, Iye ndiye anafuna kudza, Ule ana mphambvu zonsene.

⁹Ine Juwau m'bale wanu, pontho ndzanu pa nyatwa mu Umambo na pakupirira muna Yezu, ndikhali pa ntsuwa ya Patimosi, na thangwi ya fala ya Mulungu, pontho na kucitira umboni Yezu.

¹⁰Pa Ntsiku ya Mbuya, ine ndaphatiwa na Nzimu Wakucena. Ndabva n'nduli mwanga fala ya mphambvu ninga kaluta,

¹¹mbikhalonga kuti: “Pinaona iwe pilembe mu bukhu ibodzi, upitumize kuna magereja manomwe a ku Azya: Efesu, Ejimirina, Perigamu, Tiyatira, Saridhi, Filadhelifya na a ku Laudhiseya.”

¹²Ndazungunuka toera ndione ndi ani akhalonga na ine. Mudazungunuka ine, ndaona nyale zinomwe za oro.

¹³Pakati pa nyale zenezo, pakhali m'bodzi “adalandana na mwana wa munthu,” akhadabvala nguwo zace zikhadafika mpaka m'manyalo, mbazimanga na bhande ya oro ncifuwa mwace.

¹⁴Nsolo wace, na tsisi yace, ikhadacena kakamwe ninga thonje. Maso ace, akhali ninga malirimi a moto.

¹⁵Myendo yace ikhali ninga nkuwa wakupukutwa, wakusungulwa pa moto wakugaka. Fala yace ikhatitimira ninga madzi makulu.

¹⁶N'djanja yace ya madyo, akhali na nyenyezi zinomwe. N'kanwa mwace mukhabuluka tarasada yakunozwa khundu na khundu. Nkhope yace ikhagaka ninga dzuwa yakugaka na mphambvu.

¹⁷Mudamuona ine, ndagwa pa myendo pace ninga munthu wa kufa. Mbwenye iye andisandzika djanja yace ya madyo, mbalonga kuti: “Leka gopa. Ine ndine Wakutoma na Wakumalisa.

¹⁸Ine ndine ule ali m'maso. Ndikhadafa, mbwenye lang'anani, cincino ndiri m'maso kwenda na kwenda! Pontho ndina pyavi pya kufa na pya dziko ya anyakufa.”

¹⁹“Lemba mphapo pinthu pidaona iwe, pire pinacitika cincino, na pire pinafuna kudza kacitika kutsogolo.

²⁰Nyenyezi zinomwe zire zidaona iwe n'djanja yanga ya madyo, na nyale zinomwe zire za oro, pisalongera ipi: ‘Nyenyezi zinomwe, ndi anju za magereja manomwe, pontho nyale zinomwe, ndi magereja manomwe.’ ”