Read Cibverano Cipsa Cisena Cid 10 Bible Online

Cid 10 - Cibverano Cipsa Cisena bible

Cid 10

¹Na tenepo, ndaona anju unango wa mphambvu, mbakhachita buluka kudzulu. Iye akhadafinikizwa na khole, pontho padzulu pa nsolo wace pakhali na utazimu. Nkhope yace ikhali ninga dzuwa, myendo yace ikhali ninga mizati ya moto.

²Iye akhadaphata bukhu ing'ono m'manja mwace, yakufungulwa. Aikha mwendo wace wa madyo padzulu pa bara, mwendo wace wa bzere kuntunda.

³Penepo, akhuwa pikulu ninga kulira kwa nkhalamu. Pidakhuwa iye, njazi zinomwe zatoma kulonga.

⁴Pa n'dzidzi ubodzi ene ukhalonga njazi zinomwe, ine ndikhadasasanyira kuti ndilembe. Mbwenye ndabva fala ya kudzulu mbikhalonga tenepa: “Koya[23] muntima mwako pidalonga njazi zinomwe. Leka kupilemba.”

⁵Na tenepo, anju akhadaona ine mbalimira padzulu pa bara na kuntunda, athukula kudzulu nkono wace wa madyo.

⁶Penepo, iye adumbira na dzina ya Mulungu ule ali m'maso kwenda na kwenda, adacita kudzulu na pantsi, na bara, na pyonsene pinagumanika mwenemu, mbalonga tenepa: “Nkhabe kudza kadembukabve.

⁷Mbwenye pa ntsiku zinafuna kuimba anju wacinomwe kaluta yace, pyakubisala pya Mulungu pinadza kasimbiswa, ninga mudapilongera Iye kuna maporofeta, anyabasa ace.”

⁸Buluka penepo, fala ikhadabva ine mbilonga kudzulu, yalonga pontho na ine tenepa: “Ndoko, kwata bukhu ya Mulungu idafungulwa, iri m'manja mwa anju anagumanika dzololo padzulu pa bara na kuntunda.”

⁹Na tenepo, ndafendedzera anju mbandimphemba kuti andipase bukhu ing'ono ya Mulungu. Penepo, iye andipanga tenepa: “Kwata, uidye! Iyo inawawa m'mimba mwako, mbwenye n'kanwa mwako inatapira ninga uci.”

¹⁰Ine ndakwata bukhu ing'ono ya Mulungu ikhali m'manja mwa anju, mbandiidya. Iyo ikhanditapirira n'kanwa mwanga ninga uci, mbwenye pakuidya, ndabva kuti m'mimba mwanga muli kuwawa.

¹¹Na tenepo, ndapangwa kuti: “Pisafunika kuti iwe ulonge ciporofeta, pa thangwi ya mbumba zizinji, madziko mazinji, malongero mazinji, na amambo azinji.”