Read Cibverano Cipsa Cisena Cid 15 Bible Online

Cid 15 - Cibverano Cipsa Cisena bible

Cid 15

¹Ndaona kudzulu cidzindikiro cinango cikulu cakudzumisa. Cikhali anju zinomwe, pabodzi na nyatwa zinomwe zakumalisira. Thangwi na nyatwa zenezi ndiko kuipirwa kwakumalisira kwa Mulungu.

²Ndaona pontho cinthu cinango cakulandana na bara ya vidhuru yakubvungazika na moto. N'khundu-n'khundu mwa bara, ndaonambo mbadalimira dzololo, ale akhadakunda cinyama cakugopsa na dzimunthu yace, na malengesero a malemba a dzina yace. Iwo anyakukunda akhakhala na mabhangwe, akhadapaswa iwo na Mulungu,

³pontho iwo akhaimba nyimbo ya Mozesi, n'dzakazi wa Mulungu, na nyimbo ya Mwana Bira tenepa: “Mabasa anu ndi makulu pontho ndi akudzumisa, Mbuya, Mulungu wa mphambvu zonsene. Njira zanu ndi zakulungama na za ndimo mwene, Imwe Mambo wa madziko.[34]

⁴Mbani anakhonda kukugopani Imwe Mbuya? Mbani anakhonda kupasa mbiri dzina yanu? Thangwi ndimwe basi wakulungama. Madziko onsene anabwera patsogolo panu mbakulambirani, thangwi mabasa anu akulungama apangizika.”

⁵Pakumala penepyo, ndalang'ana mbandiona mbuto yakucena ya nyumba ya ntsembe ya Mulungu ikhacita umboni, yafunguka kudzulu.

⁶Zabuluka mu nyumba ya ntsembe ya Mulungu, anju zinomwe zikhakhala na nyatwa zinomwe. Izo zikhadabvala nguwo zakucena mbiziyetimira. Pontho akhadabvala mabhande a oro ncifuwa mwawo.

⁷Na tenepo, pa pinthu pinai pya m'maso, cibodzi cabulusa ndiko zinomwe za oro zakudzala na kuipirwa kwa Mulungu wa m'maso kwenda na kwenda, mbazipasa anju zinomwe.

⁸[35]Mbuto yakucena ya Nyumba ya Mulungu, yadzala na uchi wa mbiri ya Mulungu na wa mphambvu zace. Pontho nkhabe munthu akhakwanisa kupita mwenemu, mpaka kumala nyatwa zinomwe zikhakhala na anju zinomwe.