Read Cibverano Cipsa Cisena Cid 16 Bible Online

Cid 16 - Cibverano Cipsa Cisena bible

Cid 16

¹Na tenepo, ndabva fala ikhabuluka mu Nyumba ya Mulungu mbilonga na mphambvu kuna anju zinomwe kuti: “Ndokoni mukhakhutule pantsi kuipirwa kwa Mulungu kuli n'ndiko zinomwe za oro.”

²Anju wakutoma aenda, akhutula ndiko yace ya oro pa dziko, ale akhali na cidzindikiro ca cinyama cakugopsa pontho mbalambira dzimunthu yace, aphatwa na pironda pya diro pya kupha pikulu pyene.

³Anju waciwiri akhutula ndiko yace m'bara, madzi mbasanduzika kudza ciropa ninga ca munthu wakuphiwa, pinyama pyonsene pikhakhala m'bara mbipimala kufa.

⁴Anju wacitatu akhutula ndiko yace mu nyandza na m'mphuno za madzi, madzi mbasanduzika kudza ciropa.

⁵Na tenepo, ine ndabva anju akhali na mphambvu za kukunda madzi, mbalonga tenepa: “Imwe ndimwe wakulungama, Imwe Wakucena, mulipo cincino pontho mukhalipo na kale ene, thangwi mwapitonga pinthu ipi.

⁶Thangwi iwo amwaza ciropa ca mbumba ya Mulungu na ca maporofeta ako. Na thangwi eneyo, Imwembo mwaapasa ciropa toera amwe, Iwo asatambira pire pidaakwanira.”

⁷Ndabva pontho fala ikhabuluka pa guwa ya ntsembe mbikhalonga tenepa: “Ande Mbuya Mulungu wa mphambvu zonsene, kutonga kwanu ndi kwa ndimo mwene pontho ndi kwakulungama.”

⁸Anju wacinai akhutula ndiko yace pa dzuwa, na tenepo dzuwa yapaswa mphambvu za kupisa anthu.

⁹Anthu apya na kupisa kukulu, mbaxola dzina ya Mulungu ana mphambvu za kukunda muliri unowu, mbwenye iwo akhonda kuchunyuka, pontho akhonda kupasa mbiri Mulungu.

¹⁰Anju wacixanu, ndiko yace aikhutulira pa mpando wa umambo wa cinyama cakugopsa, umambo wace mbukhala n'cidima, mbakhaluma malirimi awo na thangwi ya kubva kupha kukhabva iwo.

¹¹Iwo akhaxola Mulungu wa kudzulu na thangwi ya kubva kupha kwawo, pontho na thangwi ya pironda pyawo, mbwenye akhonda kuchunyuka mabasa awo akhacita iwo.

¹²Anju wacitanthatu akhutulira ndiko yace mu nyandza ikulu inacemerwa Eufarati, madzi a nyandza mbauma, toera kusasanyira njira ya amambo a kumabulukira dzuwa.

¹³Na tenepo, ndaona pa mulomo pa nyangumi, na pa mulomo wa cinyama cakugopsa, na pa mulomo wa mporofeta wa uthambi, mbapakhabuluka mizimu mitatu ya kuipa idalandana na mathesi.

¹⁴Ndi mizimu ya kuipa inacita pirengo. Iyo isaenda muna amambo a dziko yonsene toera aagumanye pa nkhondo ya ntsiku ikulu ya Mulungu wa mphambvu zonsene.

¹⁵“Lang'anani. Ine ndinabwera ninga mbava! Mbatsandzaye ule analang'anira, mbakoya nguwo zace toera akhonde kufamba cipezi-pezi, mbapasika manyadzo pamaso pa anthu.”

¹⁶Na tenepo, iyo yagumanya amambo pa mbuto inacemerwa Arimadjedoni nciebhereu.

¹⁷Anju wacinomwe akhutula ndiko yace cidzulu-dzulu. Na tenepo, mu Nyumba ya Mulungu mwabveka fala ikhabuluka ku mpando wa umambo mbikhalonga na mphambvu kuti: “Pyamala!”

¹⁸Penepo paoneka kucetuma, kudhima, njazi na citeke-teke cikulu. Kutomera pa n'dzidzi udaikhwa anthu pantsi pano, cipo cidzati kuoneka citeke-teke cikulu ninga ceneci.

¹⁹Nzinda ukulu wagawika mapindi matatu, pontho mizinda ya m'madziko yamala kugomoka. Mulungu akumbukira Bhabhilonya wa nkulu, mbampasa ndiko ya vinyu ya kuipirwa kwace kukulu.

²⁰Ntsuwa zonsene zasoweka, pontho mapiri onsene asoweka.

²¹Myala mikulu ya matalala akulemera makilu.[36] makumanai mwala ubodzi, yagwa buluka kudzulu gwera anthu. Iwo axola Mulungu na thangwi ya nyatwa ya matalala, thangwi nyatwa yace ikhali yakugopsa pikulu kakamwe.