Read Cibverano Cipsa Cisena Cid 20 Bible Online

Cid 20 - Cibverano Cipsa Cisena bible

Cid 20

¹Ndaona anju m'bodzi mbakhachita kudzulu, mbakhadza na cavi ca djenje yakuzika kakamwe m'manja mwace, na unyolo ubodzi ukulu.

²Iye am'manga nyangumi, nyoka ya kale, Dyabu, Sathani, mbam'manga na unyolo pa pyaka cikwi[42] cibodzi.

³Buluka penepo, anju amponya n'djenje yakuzika kakamwe mbanfungira, pontho mbaikha cidhindo toera akhonde kunyengeza madziko a pantsi pano, mpaka kumala pyaka cikwi cibodzi. Pakumala penepyo, pisafunika kuti iye asudzulwe pa n'dzidzi ung'ono.

⁴Penepo ndaona mipando ya utongi ikhadakhalira ale akhadapaswa mphambvu za kutonga. Ndaona mizimu ya anthu adagwandwa misolo na thangwi yakucitira umboni Yezu, pontho na thangwi ya fala ya Mulungu. Iwo akhadakhonda kucilambira cinyama cakugopsa, na dzimunthu yace ene. Pontho iwo akhadakhonda kutambira cidzindikiro pa nkhope peno m'manja. Na tenepo, iwo alamuka pa kufa mbatonga pabodzi na Kirixtu pa pyaka cikwi cibodzi.

⁵Anyakufa anango acimwana kulamuka pa kufa, mpaka kukwana pyaka cikwi cibodzi. Uku ndi kulamuka pa kufa kwakutoma.

⁶Akutsandzaya na akucena ndi ale ali na anthu pa kulamuka pa kufa kwakutoma! Kufa kwaciwiri nkhabe mphambvu kuna iwo. Pontho iwo anati akhale anyantsembe a Mulungu na a Kirixtu, mbatonga pabodzi na Iye pa pyaka cikwi cibodzi.

⁷Pingamala pyaka cikwi cibodzi, Sathani anasudzulwa mbabuluswa n'kaidi.

⁸[43]Pontho anabuluka toera kunyengerera madziko anagumanika m'makhundu manai a pantsi, anacemerwa Gogi na Magogi, kuti aagumanye amenye nkhondo. Mwinji wawo ndi ninga checa ya m'bara.

⁹Mwinji unowu wamwazika pantsi pano ponsene, pontho mbuzungulira nsasa wa mbumba ya Mulungu, nzinda wakufunika. Mbwenye wabwera moto wa kudzulu mbupha mwinji onsene.

¹⁰Dyabu, ule akhaanyengerera, aponyiwa n'thawala ya moto unagaka na inxofiri, mule mukhadaponyiwa cinyama cakugopsa na mporofeta wa uthambi. Mwenemu iwo anati athabuswe masiku na masikati, kwenda na kwenda.

¹¹Pakumala, ndaona mpando ubodzi ukulu wakucena wa umambo, na Ule akhaukhalira. Mataka na thambo pyamala kun'thawa pamaso pace, mbapikhonda kugumana mbuto.

¹²Ndaonambo pontho anthu a kufa akulu na ang'ono, mbadalimira patsogolo pa mpando wa umambo. Penepo mabukhu afungulwa. Bukhu inango ya Upulumuki yafungulwambo. Anyakufa atoma kutongwa na pire pikhadacita iwo, ninga mudalemberwa ipyo m'mabukhu.

¹³Bara yapereka anyakufa akhali na iye mwenemu. Kufa na dziko ya anyakufa apereka anyakufa akhali na iwo mwenemu, m'bodzi na m'bodzi mbatongwa na pire pikhadacita iye.

¹⁴Na tenepo, kufa na dziko ya anyakufa pyaponyiwa n'thawala ya moto. N'thawala ya moto ndiko kufa kwaciwiri.

¹⁵Ale adakhonda kulembwa madzina awo m'Bukhu ya Upulumuki, aponyiwa n'thawala ya moto.