Read Cibverano Cipsa Cisena Cid 22 Bible Online

Cid 22 - Cibverano Cipsa Cisena bible

Cid 22

¹Na tenepo, anju andipangisa nyandza ya madzi a upulumuki akuphenekera ninga vidhuru, mbakhawewa buluka ku mpando wa Umambo wa Mulungu na wa Mwana Bira,

²pakati pa nseu ukulu wa mu nzinda. Ntunda na ntunda wa nyandza, kukhali na muti wa upulumuki, ukhabala misapu khumi na kawiri pa caka, kabodzi pa nthanda. Masamba ace ana basa ya kukondza mbumba.

³Nkhabe kudza kaonekabve dzedze. Mpando wa Umambo wa Mulungu na wa Mwana Bira unati ukhale mu nzinda, pontho anyabasa ace anam'phatira.

⁴Iwo anadza kamuona nkhope yace, pontho dzina yace inadza kalembwa pa nkhope pawo.

⁵Nkhabe kudza kaonekabve masiku. Cieza ca nyale peno ca dzuwa iwo nkhabe kudza kacifuna pontho, thangwi Mulungu Mbuya anaamwinika, pontho iwo anadza katonga kwenda na kwenda.

⁶Anju andipanga tenepa: “Mafala awa mba ndimo mwene pontho mbakunyindirika. Mbuya, Mulungu wa mizimu ya maporofeta, atuma anju wace toera kupangisa kuna anyabasa ace pinthu pinafuna kucitika cincino.”

⁷“Lang'anani! Ine ndinabwera cincino! Mbatsandzaye ule anakoya mafala awa akuoneswa mu Nzimu a m'bukhu iyi.”

⁸Ine Juwau, ndine adabva pinthu penepi, pontho adapyona. Mudapibva ine mbindipyona, ndagwa pa myendo ya anju adandipangisa pyonsene pire, toera kumulambira.

⁹Mbwenye iye andipanga tenepa: “Leka cita penepi! Ndine nyabasa ninga iwe na abale ako, ninga maporofeta pontho ninga ale anakoya mafala a m'bukhu iyi. Lambira Mulungu!”

¹⁰Na tenepo, iye andipanga tenepa: “Leka kuabisa mafala a ciporofeta ali m'bukhu iyi, thangwi n'dzidzi uli dhuzi.

¹¹Nyakukhonda kulungama, mbanyanye kucita pyakukhonda kulungama. Ule anacita pinthu pyakuipa, mbanyanye na kupicita. Wakulungama, mbanyanye na kucita kulungama kwace. Ule wakucena, mbanyanye kupicenesa.”

¹²“Lang'anani! Ine ndinabwera cincino! Pontho ndinabwera na m'bairo wanga kudza kapasa m'bodzi na m'bodzi, pire pinakwanirana na pidacita iye.

¹³Ine ndine Alufa na Omega, Wakutoma na Wakumalisa, Wapatsogolo na Wan'nduli.

¹⁴“Mbatsandzaye ale anafula nguwo zawo [mu ciropa ca Mwana Bira,] toera iwo atawirirwe kudya muti wa upulumuki, pontho akwanise kupita mu nzinda na pa nsuwo.

¹⁵Anafuna sala kunja ndi anambwa, analodza, anacita pyalukwali, mapanga, analambira alungu a pezi, na onsene anafuna pontho mbacita pyauthambi.

¹⁶“Ine Yezu, ndatuma anju wanga kuti adze kalonge umboni kuna imwe pa thangwi ya magereja. Ine ndine N'chici pontho ndine wa Dzindza ya Dhavidhi, Nyenyezi Yakuyetimira ya Macibese.”

¹⁷Nzimu na mwali wankazi asalonga tenepa: “Bwera!” Na munthu onsene anabva mbalonge tenepa: “Bwera!” Ana nyota, mbabwere. Pontho ule anafuna, mbamwe madzi a pezi a upulumuki.

¹⁸Ndisacenjeza kuna onsene anabva mafala a ciporofeta ali mu bukhu iyi kuti: “Munthu angathimizira cinthu mu bukhu iyi, Mulungu anan'thimizirambo nyatwa zidalembwa mu bukhu eneyi.

¹⁹Ule anabulusa fala ya ciporofeta ya m'bukhu iyi, Mulungu anam'bulusambo phindi yace ya muti wa upulumuki, na mu Nzinda wa Mulungu udalembwa mu bukhu iyi.”

²⁰Ule anacita umboni wa pinthu penepi, asalonga tenepa: “Ande, ndinabwera cincino!” Ameni. Bwerani Mbuya Yezu!

²¹Kukoma ntima kwa Mbuya Yezu mbakukhale na onsene.[49]