Read Cibverano Cipsa Cisena Cid 6 Bible Online

Cid 6 - Cibverano Cipsa Cisena bible

Cid 6

¹Ine ndalang'anisa mukhafungula Mwana Bira cidhindo cakutoma pa pidhindo pinomwe. Na tenepo, pa nsoka wa pinthu pinai pya m'maso, ndabva cibodzi mbicilonga na fala ninga ya njazi kuti: “Bwera!”

²Ndalang'ana mbindiona patsogolo panga kavalo ibodzi yakucena. Akhaipakira akhali na uta ubodzi, pontho apaswa nthimba ibodzi mbakhafamba ninga munthu wakuwina, na cipapu ca kuwina.

³Mudafungula Mwana Bira cidhindo caciwiri, ndabva cinthu cam'maso caciwiri mbicilonga tenepa: “Bwera!”

⁴Penepo pabuluka kavalo inango yakufuira. Mwanaciro kavalo atambira mphambvu ya kubulusa ntendere pa dziko, mbacita kuti anthu aphane okha-okha. Iye apasiwa tarasada ikulu.

⁵Mudafungula Mwana Bira cidhindo cacitatu, ndabva cinthu cam'maso cacitatu mbicilonga tenepa: “Bwera!” Ndalang'ana, mbindiona patsogolo panga kavalo ibodzi yakuswipa. Munthu akhadaipakira akhali na n'dida m'manja mwace.

⁶Ndabva cinthu cakulandana ninga fala pakati pa pinthu pinai pya m'maso, mbicikhalonga tenepa: “Aphate basa ntsiku yamumphu toera kutambira nyamagongwe m'bodzi wa ufa wa tirigu, pontho aphate basa ntsiku yamumphu toera kutambira anyamagongwe atatu a sevadha.[13] Mbwenye leka kupungula mafuta na vinyu.”

⁷Mudafungula Mwana Bira cidhindo cacinai, ndabva fala ya cinthu cacinai pa nsoka wa pinthu pya m'maso mbicilonga tenepa: “Bwera!”

⁸Ndalang'ana mbindiona patsogolo panga kavalo ibodzi ya nsoswe. Ule akhadaipakira akhacemerwa Kufa, pontho dziko ya Anyakufa ikhantowera. Iye apaswa mphambvu za kupha phindi ya cinai ya anthu a padziko na tarasada, na njala, na muliri pontho na pinyama pya n'tsanga pya padziko.

⁹Mwana Bira pidafungula Iye cidhindo cacixanu, ndaona pantsi pa guwa ya ntsembe, mizimu ya ale adaphiwa na thangwi ya kulonga fala ya Mulungu, pontho na umboni wawo udalonga iwo.

¹⁰Iwo akhakhuwa na mphambvu kuti: “Mpaka lini Mbuya, imwe wakucena na wakunyindirika, munadikhira kutonga anthu a padziko mbumuaonesambo nyatwa thangwi ya ciropa cathu?”

¹¹Na tenepo, m'bodzi na m'bodzi wawo atambira nguwo zakucena zakulapha, pontho iwo apangwa kuti adikhire pang'ono mpaka kuti nsoka wa adzakazi andzawo, pontho mbakhala abale awo muna Kirixtu, anafuna kudza kaphiwambo ninga iwo, ukwane.

¹²Ndalag'anisa mukhafungula Mwana Bira cidhindo cacitanthatu. Kwaoneka citeke-teke cikulu. Dzuwa yaswipa ninga nguwo yakuswipa, mwezi onsene mbudza kafuira ninga ciropa.

¹³Pontho nyenyezi za kudzulu zagwa pantsi pano, ninga kugwa kunagwa masambvu mawisi pa kutekenyeswa na mphepo ikulu.

¹⁴Thambo yakununduka mbipoterezeka ninga mpfumba yakufunyiwa, pontho mapiri onsene na ntsuwa zonsene, zabuluswa pa mbuto zawo.

¹⁵Na tenepo, amambo a padziko, na atongi, na akulu anyankhondo, na anyakupfuma, na anyamphambvu, na onsene, adzakazi na atumbe, abisala n'dzimba na pakati pa myala ya m'mapiri.

¹⁶Iwo akhakhuwa kuna mapiri na kuna myala kuti: “Tigwereni pyathu mutibise, tikhonde kuoneka pa nkhope pa ule adakhala pa mpando wa umambo, pontho kuti tithawe kuipirwa kwa Mwana Bira!

¹⁷Thangwi yafika ntsiku ikulu ya kuchunyuswa kwawo.[14] Pontho mbani anafuna kwanisa kuwangisira?”