Read Cibverano Cipsa Cisena Mt. 10 Bible Online

Mt. 10 - Cibverano Cipsa Cisena bible

Mt. 10

¹Yezu acemera anyakupfundza ace khumi na awiri, aapasa mphambvu za kuthamangisa mizimu ya kuipa, na kuwangisa nthenda za kusiyana-siyana.

²Madzina a apoxtolo khumi na awiri mbawa: Wakutoma ndi Simau, anacemerwa Pedhru, na Andereya, m'bale wace Pedhru, Tiyago na Juwau, ana a Zebhedheu,

³Filipi na Bhatolomeu, Tomasi na Mateu, nyakukumbusa misonkho, Tiyago, mwana wa Alufeu, na Tadheu,

⁴Simau, nyakukakamira mwambo wa Mulungu, na Djuda Xikariyoti, ule adasandukira Yezu.

⁵Yezu atuma khumi na awiri awa, na mafala awa: “Lekani kwenda kuna anthu anango adakhonda kukhala madjuda, peno kupita m'mizinda ya ku Samariya.

⁶Mbwenye pakutoma ndokoni kuna mabira a kutaika a dzindza ya Izarayeli.

⁷Kunaenda imwe ndokoni mbamulonga kuti Umambo wa kudzulu uli dhuzi.

⁸Wangisani atenda, lamusani anyakufa, wangisani anyamatanya, thamangisani madimonyo. Mwapasiwa pezi, apasenimbo pezi.

⁹Lekani kukwata oro, parata peno nkuwa n'cunu mwanu.

¹⁰Lekani kukwata malikofa pa ulendo, peno kukwata nguwo ziwiri, peno ntsapato, peno mpsimbo, thangwi nyabasa asatongwa kupaswa cakudya.

¹¹Mungafika mu nzinda peno n'cisa, sakani munthu wakunyindirika mbamukhala pa nyumba pace mpaka kubuluka kwanu.

¹²Pakupita n'nyumba, amwanyikeni.

¹³Mungaona kuti anthu mbadidi, siyani ntendere wanu muna iwo. Mbwenye pezi, khalani na ntendere wanu.

¹⁴Mungapita mu nzinda peno n'nyumba ya munthu mbamukhonda kutambirwa peno kubverwa mafala anu, mungabuluka mwenemu, gubudzani pfumbi ya manyalo anu.

¹⁵Ndimo mwene, ndisakupangani kuti n'dzidzi wa kutongwa ungafika, nyatwa za dziko ya Sodhoma na Gomora zinacepa kupiringana nzinda unowu.”

¹⁶“Lang'anani, Ine ndisakutumani ninga mabira pakati pa mibindzi. Na tenepo, cenjerani ninga nyoka, pontho cepesekani ninga nkhangaiwa.”

¹⁷“Citani mphole na anthu, thangwi iwo anati akuperekeni m'manyumba a kutongera miseru, pontho mbakukwaxamulani n'kati mwa nyumba zawo za kuphemberera.

¹⁸Na thangwi yanga, munati muperekwe pamaso pa atongi na pa amambo ninga amboni kuna iwo, na kuna ale adakhonda kukhala madjuda.

¹⁹Mbwenye mungaperekwa, lekani kunentseka na kunyerezera kuti ‘Tinalonganji peno tinalonga tani?’ Thangwi pa n'dzidzi unowu Mulungu anakupangisani pinafuna imwe kulonga.

²⁰Thangwi simwe anafuna kulonga tayu, mbwenye ndi Nzimu Wakucena wa Baba wanu, unafuna kukupfundzisani kulonga.”

²¹“Azinji anadza kaphesa abale awo ene. Ababa na amai anadza kaphesa anawo. Anambo anadza kasandukira ababa awo na amai awo, mbaapha.

²²Anthu onsene anati akuideni na thangwi ya dzina yanga. Mbwenye ule anapirira mpaka pakumalisa, anapulumuswa.

²³Mungaidiwa pa cisa cibodzi, thawirani cisa cinango. Thangwi ndimo mwene, ndisakupangani kuti mbamudzati kumala kuifamba mizinda yonsene ya Izarayeli, Ine, Mwana wa Munthu, ndinabwera.”

²⁴“Nkhabe nyakupfundza anapita mpfundzisi wace, peno nyabasa anapita mbuya wace.

²⁵Male nyakupfundza angakhala ninga mpfundzisi wace, pontho nyabasa akhale ninga mbuya wace. Ngakhala mwanacinthu nyumba acemerwa Bhelizebhu, ndiye tani imwembo anthu anango a pa nyumba!”

²⁶“Na tenepo, imwe lekani kuagopa. Thangwi nkhabe cinthu cidabiswa cinakhonda kudza kapangizika, peno cidabisala mbacikhonda kudza kadziwika.

²⁷Cire cinakupangani Ine n'cibiso-biso, cilongeni pakweca. Pontho na cire cinabva imwe n'ciwerewere, cilongeni pa ntsoyi.

²⁸Lekani kugopa ale anapha manungo, mbacimwana kupha nzimu. Mbwenye gopani Mulungu, anapha nzimu na manungo ene mu infernu.

²⁹Kodi nkhabe guliswa mbalame ziwiri na kobiri ibodzi? Mphapo nkhabe ibodzi inagwa pantsi Baba wanu mbakhonda kupifuna.

³⁰Na tsisi yanu ene ya munsolo, yonsene yamala kulengeswa.

³¹Na tenepo, lekani kugopa. Imwe musafunika pikulu kakamwe kupiringana mbalame zizinji.”

³²“Na tenepo, onsene ale anandicitira umboni pamaso pa anthu, Ine ndinaacitirambo pibodzi-bodzi pamaso pa Baba wanga ali kudzulu.

³³Mbwenye ule anandikhonda pamaso pa anthu, Ine ndinadza kan'khondambo pamaso pa Baba wanga ali kudzulu.”

³⁴“Lekani kunyerezera kuti ndabweresa ntendere pa dziko. Sidabweresa ntendere tayu, mbwenye ndabweresa nkhondo.

³⁵Ndimo mwene, ndadzesadi kumwazana pakati pa “ ‘mwana-mamuna na baba wace, mwana-nkazi na mai wace, pontho nkwenya na mebzala wace.

³⁶ Na tenepo, anyamalwa a munthu anati akhale abale ace ene.’

³⁷“Ule anafuna baba wace peno mai wace kupita Ine, nkhabe cibverano na Ine. Ule anafuna mwana wace wa mamuna peno wa nkazi kupita Ine, unowu nkhabe cibverano na Ine.

³⁸Ule anakhonda kukwata ntanda wace mbanditowera, nkhabe cibverano na Ine.

³⁹Ule anasaka kukoya moyo wace, anauluza. Mbwenye ule analuza moyo wace na thangwi yanga, anaugumana.”

⁴⁰“Ule anakutambirani, asatambira Ine. Ule ananditambira, asatambira ule adandituma.

⁴¹Ule anatambira mporofeta na kun'dziwa kuti ndi mporofeta, Mulungu anantambirisa muwoni ninga wa mporofeta. Pontho, ule anatambira munthu wakulungama na kun'dziwa kuti ndi wakulungama, anatambira muwoni ninga wa munthu wakulungama.

⁴²Na ulembo anapasa ndiko ibodzi basi ya madzi a kutonthola m'bodzi wa ana awa na thangwi ya kukhala nyakupfundza wanga, ndimo mwene ndisakupangani kuti iye nkhabe kudza kaluza m'bairo wace.”