Read Cibverano Cipsa Cisena Mt. 16 Bible Online

Mt. 16 - Cibverano Cipsa Cisena bible

Mt. 16

¹Afarisi na asadhusi anango, abwera kuna Yezu kudza kamulesera, mbam'phemba kuti aapangize cirengo ca kudzulu.

²Mbwenye Yezu aatawira na mafala awa: “Na maulo munacita dzuwa sandza, mungaona kudzulu kwafuira, imwe musalonga kuti: ‘Mangwana kunacerwa mwadidi.’

³Mangwana mwace na macibese, mungaona mitambo kudzulu, musalonga tenepa: ‘Lero kunja kwaipa.’ Musadziwa kuchulula pidzindikiro pya kudzulu, mbwenye musacimwana kuchulula pidzindikiro pya midzidzi ino![8]

⁴Anthu a midzidzi ino mbakuipa pontho mbakukhonda kunyindirika! Asaphemba cidzindikiro ca cirengo, mbwenye nkhabe cidzindikiro cinango cinafuna kudza kaona iwo, kupiringana cidzindikiro ca mporofeta Djona!” Buluka penepo, Yezu aasiya mbabuluka pyace.

⁵Pa kuwambuka kwenda ntunda unango wa nyandza, anyakupfundza a Yezu aduwala kukwata mikate.

⁶Penepo Yezu aapanga kuti: “Cenjerani pontho mucite mphole na ntombwe wa kutupisa mikate wa afarisi na wa asadhusi.”

⁷Mbwenye iwo akhaketesana okha-okha mbakhalonga kuti: “Iye asalonga penepi thangwi ife tidabweresa mikate tayu.”

⁸Yezu na kubva kuketesana kukhacita iwo, aabvundza tenepa: “Imwe anthu akukhulupira pang'ono! Thangwi yanji musaketesana mwekha-mwekha na thangwi ya kusowa mikate?

⁹Kodi mudzati kupibvesesa tayu? Imwe nkhabe kukumbuka mikate mixanu idadyesa ife nayo pikwi pixanu (5.000) pya anthu? Ndi pitundu pingasi pidadzaza imwe na mapindi akusala a mikate?

¹⁰Pontho imwe nkhabe kukumbuka mikate ire minomwe idadyesa ife nayo pikwi pinai (4.000) pya anthu? Ndi pitundu pingasi pidadzala na mapindi a kusala?

¹¹Mwakhonda tani mphapo kupibvesa kuti Ine sidalongera na thangwi ya mikate? Mbwenye ndalonga kuti mucenjere na ntombwe wa kutupisa mikate wa afarisi na asadhusi.”

¹²Na tenepo, anyakupfundza ace adza kapibvesa kuti Yezu hakhalongera ntombwe wa kutupisa mikate tayu, mbwenye akhalongera na thangwi ya mapfundzisiro a afarisi na asadhusi.

¹³Yezu pa kufika dhuzi na nzinda wa Sezareya ya Filipi, abvundzisa anyakupfundza ace na mafala awa: “Kodi mbumba isalonga kuti Ine, Mwana wa Munthu, ndine ani?”

¹⁴Iwo atawira tenepa: “Anango asalonga kuti ndimwe Juwau Bhatixta. Anango, asalonga kuti ndimwe Eliya. Anangombo asalonga kuti ndimwe Jeremiya peno m'bodzi wa maporofeta.”

¹⁵Yezu aabvundza pontho kuti: “Kodi imwembo musalonga kuti Ine ndine ani?”

¹⁶Simau Pedhru atawira tenepa: “Imwe ndimwe Kirixtu, Mwana wa Mulungu wa m'maso.”

¹⁷Yezu antawira tenepa: “Lang'ana, Simau mwana wa Djona, kutsandzaya mbakukhale muna iwe. Thangwi penepyo hudachululirwa na munthu tayu, mbwenye na Baba wanga ali kudzulu.

¹⁸Pontho Ine ndinakupanga kuti: Iwe ndiwe Pedhru.[9] Padzulu pa mwala unowu ndinamanga gereja yanga. Na tenepo, kufa nkhabe mphambvu za kukunda gereja yanga.

¹⁹Ine ndinakupasa cavi ca Umambo wa kudzulu. Pire pinamanga iwe pantsi pano, pinamangwambo kudzulu. Mbwenye pinasudzula iwe pantsi pano, pinasudzulwambo kudzulu.”

²⁰Na tenepo, Yezu acenjeza anyakupfundza ace kuti aleke kupanga munthu unango kuti Iye ndi Kirixtu.

²¹Kubulukira n'dzidzi unowu, Yezu atoma kupangisa kuna anyakupfundza ace, kuti Iye asafunika aende ku Djerusalema, aone nyatwa zizinji na mathubu, na akulu aanyantsembe, na anyakudziwisa a Mwambo, pontho aphiwe. Mbwenye pakupita ntsiku zitatu, anadza kalamuka pa kufa.

²²Penepo Pedhru acemera Yezu pa khundu, mbatoma kunsandika tenepa: “Mbuya, penepyo na lini pinadza kacitika kuna imwe!”

²³Mbwenye Yezu azungunuka kuna Pedhru mbampanga kuti: “Buluka Sathani pamaso panga! Kwa Ine, iwe ndiwe mwala wa kundigwegwedusa. Thangwi pinanyerezera iwe si pya Mulungu tayu, mbwenye ndi pya anthu.”

²⁴Buluka penepo, Yezu alonga kuna anyakupfundza ace mafala awa: “Ule anafuna kunditowera asatongwa akhondeke ekha ene, akwate ntanda wace anditowere.

²⁵Thangwi ule anafuna kukoya moyo wace, anauluza. Mbwenye ule analuza moyo wace na thangwi yanga, anaugumana.

²⁶Thangwi pinaphedzeranji kuna munthu kuwina dziko yonsene ya pantsi mbaluza nzimu wace? Peno ndi ninji cinanakwanisa kupereka munthu toera acinje na nzimu wace?

²⁷Thangwi Ine, Mwana wa Munthu, ndinabwera na mbiri ya Baba wanga, pabodzi na anju zanga. Penepo ndinapasa m'bodzi na m'bodzi sawa-sawa na basa yace idacita iye.

²⁸Ndimo mwene ndisakupangani kuti, anango ali pano, nkhabe kufa mbadzati kuona kubwera kwa Ine Mwana wa Munthu mu Umambo wanga.”