Read Cibverano Cipsa Cisena Mt. 19 Bible Online

Mt. 19 - Cibverano Cipsa Cisena bible

Mt. 19

¹Yezu pidamala iye kulonga pinthu penepyo, abuluka ku Galileya mbaenda ku cisa ca Djudeya, ntunda unango wa nyandza ya Djorodani.

²Anthu azinji akhantowera, penepo Iye mbakhaawangisa.

³Afarisi anango afendedzera Yezu toera kun'dida, mbam'bvundza kuti: “Pisatawirirwa mamuna kumwalana na nkazi wace na mathangwi a kusiyana-siyana?”

⁴Yezu aatawira, mbaapanga tenepa: “Cipo imwe mudzati kuona pidalembwa m'Bukhu ya Mulungu, kuti pakutoma kwa pantsi, Mulungu ‘aacita mamuna na nkazi,’

⁵pontho alonga kuti: ‘Na thangwi eneyo, mamuna anasiya baba wace na mai wace, mbadza kaphatana na nkazi wace, pontho mu uwiri mwawo anadza kakhala nyama ibodzi basi?’

⁶Na tenepo, iwo si anthu awiribve tayu, mbwenye ndi nyama ibodzi basi. Mphapo pidaphataniza Mulungu, munthu mbaleke kupimwaza.”

⁷Afarisi abvundzisa kuti: “Na tenepo, thangwi yanji mphapo Mozesi abulusa ntemo wa kuti mamuna anafuna kumwalana na nkazi wace, asatongwa alembe tsamba ya kumwalana nayo?”

⁸Yezu aatawira kuti: “Mozesi akusiyani mbamucita penepyo, ndi thangwi ya kuuma kwanu mitima. Mbwenye pakutoma kwa pantsi pikhakhala tenepa tayu.

⁹Na tenepo, ndisakupangani kuti mamuna anamwalana na nkazi wace, mbapikhonda kukhala na thangwi ya upombo, mbakwatana na unango mbacita na iye banja, asacita upombo.”

¹⁰Anyakupfundza a Yezu ampanga tenepa: “Mphapo, ngakhala ndi tenepa makhaliro a mamuna na nkazi, ndi pyadidi kukhonda kucita banja.”

¹¹Mbwenye Yezu aatawira tenepa: “Si onsene tayu anacibvesesa cipfundzo ici, mbwenye ndi ale basi adapaswa ucenjeri unowu na Mulungu.

¹²Thangwi alipo anacimwana kucita banja na thangwi abaliwa tenepo. Anango acitiwa tenepo na anthu. Anangombo asakhonda pyawo na thangwi ya Umambo wa kudzulu. Ule anakwanisa tambira fala iyi, mbaitambire.”

¹³Pakumala penepo, abwera anthu anango na ana ang'ono kuna Yezu, toera iye aasandzikire manja na kuaphemberera. Mbwenye anyakupfundza ace akhaasandika.

¹⁴Yezu aapanga tenepa: “Asiyeni ana abwere kuna Ine, lekani kuakhondesa. Thangwi Umambo wa kudzulu ndi wa ale adalandana iwo.”

¹⁵Buluka penepo aasandzika ana manja, mbabuluka mbaenda.

¹⁶M'phale m'bodzi afendedzera Yezu mbam'bvundza kuti: “Mpfundzisi, ndisafuna ndicitenji pya udidi, toera ndikhale na upulumuki wakukhonda kumala?”

¹⁷Yezu antawira tenepa: “Thangwi yanji usandibvundza na thangwi ya pya udidi? Wadidi alipo m'bodzi basi. Ungafuna kukhala na upulumuki wakukhonda kumala, koya matongero.”

¹⁸Na tenepo, iye abvundzisa kuti: “Ndi matongero api?” Yezu atawira tenepa: “ ‘Leka kupha munthu, leka kucita upombo, leka kuba, leka kukhala nyamaso wa uthambi.

¹⁹Lemedza baba wako na mai wako,’ pontho ‘Funa ndzako ninga iwe ene. ’ ”

²⁰Mphapo m'phale antawira tenepa: “Penepi pyonsene ine ndisapicita. Ndi ninji pontho cidasala?”

²¹Yezu ampanga tenepa: “Ungafuna kuti ukhale wakulungama, ndoko, gulisa pyonsene pina iwe, kobiri yace upase anyakucherenga. Tenepa unakhala na mpfuma kudzulu. Ungamala, bwera unditowere.”

²²Mbwenye m'phale na kubva penepyo, abuluka mbatsukwala, thangwi akhali na mpfuma zizinji.

²³Na tenepo, Yezu apanga anyakupfundza ace kuti: “Ndimo mwene ndisakupangani kuti, pisanentsa pikulu kakamwe kuti m'pfumi apite mu Umambo wa kudzulu.

²⁴Pontho ndisakupangani kuti: Pisanentsa pikulu kakamwe kupitisa m'pfumi mu Umambo wa Mulungu, kupiringana kupitisa cinyama cinacemerwa kamelo mu benga ya ntsingano.”

²⁵Anyakupfundza a Yezu na kubva penepyo adzumatirwa napyo, mbalonga kuti: “Pingakhala ndi tenepa, mbani anakwanisa kupulumuka?”

²⁶Yezu aalang'anisa mbaapanga kuti: “Penepi pisacimwanika kuna anthu, mbwenye kuna Mulungu pyonsene pisakwanisika.”

²⁷Penepo Pedhru ampanga kuti: “Lang'anani, ife tasiya pyonsene, mbatikutowerani. Tinakhala tani?”

²⁸Yezu aatawira kuti: “Ndimo mwene Ine ndisakupangani kuti pa dziko ipsa inafuna kubwera, Ine Mwana wa Munthu, ndingadza kakhala pa mpando wanga wa mbiri, imwe mudanditowera munadza kakhalambo pa mipando ya umambo khumi na miwiri, kuti mutonge madzindza khumi na mawiri a Izarayeli.

²⁹Na tenepo, onsene ale adasiya nyumba zawo, abale awo aamuna, abale awo aakazi, baba, mai,[15] ana, peno minda, na thangwi ya dzina yanga, enewa anadza katambira pontho pinthu dzana padzulu pa pinthu pyawo. Pontho mbadza kapasiwa unthaka wakupulumuka kwenda na kwenda.

³⁰Mbwenye azinji akutoma anadza kakhala akumalisira. Pontho akumalisira, anadza kakhala akutoma.”