Read Cibverano Cipsa Cisena Mt. 3 Bible Online

Mt. 3 - Cibverano Cipsa Cisena bible

Mt. 3

¹Pa midzidzi eneyo, abulukira Juwau Bhatixta mbakhamwaza mphangwa n'thando mu dziko ya Djudeya, mbakhalonga tenepa:

²“Chunyukani kudawa kwanu, thangwi Umambo wa kudzulu uli dhuzi.”

³ Uyu ndiye akhalongwa na mporofeta Izaya kuti: “Fala iri kukhuwa n'thando mbilonga kuti: Sasanyirani njira ya Mbuya mbamundendemeza mipsalu yace.”

⁴Juwau akhabvala nguwo zakucitwa na uweya wa pinyama pinacemerwa kamelo, mbakhamanga bhande ya nthembe n'cunu mwace, mbakhadya nthete na uci wa n'tsanga.

⁵Na tenepo, anthu onsene a ku Djerusalema na anthu onsene akhagumanika m'pisa mwa dziko ya Djudeya, na anango anthu akhagumanika n'khundu-n'khundu mwa nyandza ya Djorodani, onsene akhaenda kuna iye.

⁶Akhadambula kudawa kwawo, Juwau mbakhaatambirisa batixmu mu nyandza ya Djorodani.

⁷Akhalipo madjuda anango anacemerwa afarisi na asadhusi, akhadza katambirambo batixmu. Pikhadza iwo, Juwau aapanga tenepa: “Dzindza ya m'bobo! Mbani akupangani kuthawa nyatwa zinafuna kudza?

⁸Citani pinthu pinapangisa kuti imwe mwachunyukadi.

⁹Lekani kunyerezera mwekha ene mbamulonga tenepa: ‘Tina baba wathu Abharaamu,’ thangwi ine ndisakupangani kuti Mulungu ana mphambvu za kusanduza myala iyi, mbikhalambo dzindza ya Abharaamu.

¹⁰Pontho ndisakupangani kuti mbadzo yamala kusasanyirwa toera kugwanda miti na michici ene. Na tenepo, miti yonsene inakhonda kubala misapu yadidi, inatemiwa mbiponyiwa pa moto.

¹¹Ine ndisakutambirisani batixmu na madzi kuti muchunyuke kudawa kwanu. Mbwenye munthu unango anadza n'nduli mwanga, unowu ndiye ana mphambvu za kupiringana ine. Pontho ine sine cinthu pamaso pace kuti ndinakwanisa kukwata ntsapato zace. Unowu ndiye anadza kakutambirisani batixmu na Nzimu Wakucena na moto.

¹²Iye ana foxolo m'manja mwace toera kucenesa mbuwa yace. Pontho anakoya mapira n'cikwa, mbakwata dzungu yace mbaipisa pa moto wakukhonda kuthima.”

¹³Ntsiku ibodzi, Yezu abuluka ku dziko ya Galileya, mbaenda ku nyandza ya Djorodani, toera atambiriswembo batixmu na Juwau Bhatixta.

¹⁴Mbwenye Juwau akhafuna kun'khondera mbalonga tenepa: “Ine ndine anafuna kutambiriswa batixmu na imwe. Mphapo lero imwe ndimwe munadza kuna ine?”

¹⁵Mbwenye Yezu antawira tenepa: “Pa n'dzidzi uno siya tenepo. Thangwi mphyadidi ticite tenepa, toera pisimbiswe pinafuna Mulungu.” Mphapo Juwau na kubva tenepo, am'bvera mbantambirisa batixmu.

¹⁶Yezu pakumala kwace kutambira batixmu, abuluka m'madzi. Pa n'dzidzi unowu thambo yafunguka. Iye aona Nzimu wa Mulungu mbuchita ninga nkhangaiwa, mbum'phamira.

¹⁷Penepo yabveka fala kubulukira kudzulu mbilonga tenepa: “Uyu ndi mwana wanga wakufunika kakamwe, ananditsandzaisa.”