Read Cibverano Cipsa Cisena Mt. 4 Bible Online

Mt. 4 - Cibverano Cipsa Cisena bible

Mt. 4

¹Buluka penepo, Yezu akwatiwa na Nzimu Wakucena mbaenda n'thando, kuti aende kanyengererwe na Dyabu.

²Pidamala iye kupimana cakudya ntsiku makumanai, masiku na masikati, Yezu abva njala.

³Penepo, Dyabu nyakunyengerera, afendedzera Yezu dhuzi mbampanga tenepa: “Ngakhala iwe ndiwedi Mwana wa Mulungu sanduza myala iyi idze mikate.”

⁴Mbwenye Yezu antawira tenepa: “Pyalembwa m'Bukhu ya Mulungu kuti: ‘Si cakudya basi tayu cinapulumusa munthu, mbwenye na mafala onsene anabuluka pa mulomo wa Mulungu’”

⁵Buluka penepo, Dyabu ankwata mbaenda na iye ku nzinda wakucena, ankwiza padzulu kakamwe pa Nyumba ya Mulungu,

⁶mbampanga tenepa: “Ngakhala iwe ndiwe Mwana wa Mulungu, numpha padzulu pano ugwe pantsi, thangwi pyalembwa kuti: “ ‘Mulungu anadza kapanga anju zace pa thangwi yako, pontho iwo anakugampha na manja awo, toera ukhonde kuphekeka na myala.’”

⁷Mbwenye Yezu antawira tenepa: “Pyalembwambo n'kati mwa Bukhu kuti: ‘Leka kunyengerera Mbuya Mulungu wako.’”

⁸Penepo Dyabu akwata Yezu mbaenda na iye pa phiri yakulapha kakamwe, mbampangisa umambo onsene wa pantsi pano na mbiri zawo,

⁹mbampanga kuti: “Pyonsene ipi ndinakupasa, male ungandigodamira mbundilambira.”

¹⁰Yezu ampanga kuti: “Buluka, Sathani! Thangwi pyalembwa m'Bukhu ya Mulungu kuti: ‘Lambira Mbuya, Mulungu wako, pontho phatira basa iye ekha basi’”

¹¹Penepo Dyabu ansiya, mbabwera maanju kudza kaphatira basa Yezu.

¹²Yezu na kupibva kuti Juwau Bhatixta afungirwa n'kaidi, abwerera mbaenda ku Galileya.

¹³Yezu abuluka ku Nazareti kukhakhala iye, mbaenda kakhala ku nzinda wa Kafaranaumi, ukhagumanika n'khundu-n'khundu mwa nyandza ya Galileya, ku dziko ya Zebhuloni na ya ku Nafitali,

¹⁴toera pisimbiswe pikhadalongwa na mporofeta Izaya kuti:

¹⁵Iwe dziko ya Zebhuloni na ya Nafitali, dziko inagumanika mu mbale mwa nyandza ya Galileya na ntunda unango wa nyandza ya Djorodani, iwe Galileya ya anthu adakhonda kukhala madjuda!

¹⁶ Mbumba ikhakhala n'cidima, yaona cieza cikulu. Pontho kuna ale akhakhala mu mbuto ya cidima ca kufa, amwanikirwa na cieza.

¹⁷Kutomera n'dzidzi unowu kwenda kutsogolo, Yezu atoma kupfundzisa Mphangwa Zadidi mbakhalonga tenepa: “Chunyukani kudawa kwanu, thangwi Umambo wa kudzulu uli dhuzi.”

¹⁸Yezu pikhafamba iye dhuzi na nyandza ya Galileya, aona anyakokota awiri muubale mwawo, mbakhagwisira makokota awo n'nyandza. M'bodzi ndi Simau, anadziwika pontho na dzina ya Pedhru. Unango ndi Andereya.

¹⁹Yezu aapanga kuti: “Nditowereni, Ine ndinakucitani anyakokota a anthu.”

²⁰Na tenepo, iwo pa n'dzidzi ubodzi-bodzi, asiya makokota awo mbantowera.

²¹Yezu pakufamba pang'ono kutsogolo, aona pontho anthu awiri muubale mwawo. Akhali Tiyago na Juwau, ana a Zebhedheu. Iwo akhali pabodzi na baba wawo m'bote mbakhasona makokota awo, Yezu mbaacemera.

²²Penepo pene, iwo asiyiratu bote na baba wawo ene, mbaenda na Yezu.

²³Na tenepo, Yezu akhafamba dziko yonsene ya Galileya, mbakhapfundzisa n'kati mwa nyumba za kuphemberera, mbakhalonga Mphangwa Zadidi za Umambo wa kudzulu, pontho mbakhawangisa nthenda zonsene na ale akhaduwala pakati pa mbumba.

²⁴Mbiri yace yamwazika dziko yonsene ya Sirya. Na tenepo, anthu onsene akhaenda kuna Yezu na atenda awo akhathabuka na nthenda zakusiyana-siyana, ninga za mizimu yakuipa, za njiri, na za mpfutete. Zonsene izi Yezu akhaziwangisa.

²⁵Na tenepo, mwinji ukulu wa anthu ukhantowera, kubulukira ku dziko ya Galileya, na ya Dhekapoli, na anthu a ku nzinda wa Djerusalema, na a ku Djudeya, pontho na anthu a ntunda unango wa nyandza ya Djorodani.