Read Cibverano Cipsa Cisena Mk. 1 Bible Online

Mk. 1 - Cibverano Cipsa Cisena bible

Mk. 1

¹Kutoma kwa Mphangwa Zadidi za Yezu Kirixtu, Mwana wa Mulungu.

²Ninga mudazilembera mporofeta Izaya kuti: “Ndinatuma ntumwi wanga patsogolo pako, toera akusasanyire njira.”

³“Fala iri kukhuwa n'thando mbilonga kuti: ‘Sasanyirani njira ya Mbuya mbamundendemeza mipsalu yace.’ ”

⁴Ndi tenepa kubulukira kudacita Juwau Bhatixta n'thando, mbakhamwaza mphangwa za kutambira batixmu ya kuchunyuka toera kulekererwa madawi.

⁵Anthu onsene a ku cisa ca ku Djudeya na a ku nzinda wa Djerusalema akhaenda kuna Juwau Bhatixta, mbakhadambula madawi awo, iye mbakhaatambirisa batixmu n'nyandza ya Djorodani.

⁶Juwau akhabvala nguwo zakucitwa na uweya wa pinyama pinacemerwa kamelo, mbakhamanga bhande ya nthembe n'cunu mwace, mbakhadya nthete na uci wa n'tsanga.

⁷Mbakhalonga kuna mbumba kuti: “N'nduli mwanga anabwera munthu unango na mphambvu zikulu za utongi za kupiringana ine. Pontho ine sine munthu wakukwanisa kunsudzula mithambo ya ntsapato zace.

⁸Ine ndisakutambirisani batixmu na madzi. Mbwenye Iye anakutambirisani batixmu na Nzimu Wakucena.”

⁹Pa ntsiku zenezo, Yezu akhabuluka ku nzinda wa Nazareti, ku dziko ya Galileya, mbaenda katambiriswa batixmu na Juwau Bhatixta mu nyandza ya Djorodani.

¹⁰Pa n'dzidzi ukhabuluka Yezu m'madzi, iye aona thambo yafunguka, penepo Nzimu Wakucena mbukhachita ninga nkhangaiwa, mbum'phamira.

¹¹Na tenepo, kudzulu kwabveka n'khuwo mbulonga kuti: “Iwe ndiwe mwana wanga wakufunika, ananditsandzaisa.”

¹²Buluka penepo, na mwansanga Yezu aendeswa n'thando na Nzimu Wakucena.

¹³Mwenemu Yezu akhala ntsiku makumanai mbakhanyengererwa na Sathani. Iye akhakhala na pinyama pya n'tsanga, anju za Mulungu mbizikhamphatira basa.

¹⁴Pakumala kupitiswa Juwau Bhatixta n'kaidi, Yezu abwerera ku Galileya kalonga Mphangwa Zadidi za Mulungu.

¹⁵Iye akhalonga tenepa: “N'dzidzi wakwana. Umambo wa Mulungu uli dhuzi, chunyukani kudawa kwanu, mutawire Mphangwa Zadidi.”

¹⁶Yezu mukhapita Iye na mu mbale mwa nyandza ya Galileya, aona anyakokota awiri muubale mwawo mbakhagwisira kokota yawo n'nyandza. Iwo madzina awo ndi Simau Pedhru na Andereya.

¹⁷Yezu aapanga tenepa: “Nditowereni, Ine ndinakucitani anyakokota a anthu.”

¹⁸Iwo pa n'dzidzi ubodzi ene asiya makokota awo mbantowera.

¹⁹Pakufamba pang'ono patsogolo, Yezu aona amuna anango awiri muubale mwawo. Akhali Tiyago na Juwau, ana a Zebhedheu, mbakhasona makokota awo m'bote.

²⁰Penepo pene Yezu aacemera. Iwo asiya baba wawo Zebhedheu na anyabasa ace m'bote, mbaenda mbatowera Yezu.

²¹Buluka penepo, Yezu na anyakupfundza ace aenda ku nzinda wa Kafaranaumi. Nsabudu mwace, apita n'nyumba ya kuphemberera, mbatoma kupfundzisa.

²²Anthu onsene akhadzumatirwa na mapfundzisiro ace, thangwi akhalonga ninga anyakudziwisa a Mwambo tayu, mbwenye na mphambvu za utongi.

²³Pa n'dzidzi unowu, aoneka mu nyumba ya kuphemberera mamuna m'bodzi akhali na nzimu wa kuipa, iye mbakhuwa kuti:

²⁴“Yezu wa ku Nazareti, musafunanji na ife? Mwabwera kudza katifudza? Ine ndisakudziwani kuti ndimwe ani. Ndimwe Wakucena wa Mulungu!”

²⁵Yezu aupwekera nzimu wa kuipa mbaupanga kuti: “Matama, pontho buluka muna munthu uyu!”

²⁶Penepo nzimu wa kuipa wabhoma mamuna na mphambvu zonsene, mbukhuwa mbubuluka muna iye.

²⁷Anthu onsene adzumatirwa napyo, mbabvundzana okha-okha kuti: “Ninji penepi? Cipfundzo cipsa? Lang'anani Iye ana mphambvu za kutonga na mizimu ene ya kuipa, iyo mbim'bvera.”

²⁸Na thangwi eneyo mbiri yace Yezu yafika na mwansanga mu dziko yonsene ya Galileya.

²⁹Na mwansanga, Yezu abuluka mu nyumba ya kuphemberera mbaenda pabodzi na Tiyago na Juwau, mpaka ku nyumba kwa Simau Pedhru na Andereya.

³⁰Pidafika Yezu, iwo ampangiratu kuti mebzala wace Pedhru ali kugona thangwi aferuka.

³¹Yezu aenda pakhakhala iye mbam'phata nkono wace mbamulamusa. Penepo nthenda yawanga, iye mbatoma kuaphatira basa.

³²Na maulo, mukhadoka dzuwa, mbumba ikhadzesa atenda azinji na anango akhakhala na mizimu ya kuipa.

³³Mbumba yonsene ya mu nzinda yagumanyikana pa nsuwo wa nyumba.

³⁴Iye awangisa anthu azinji akhali na nthenda zakusiyana-siyana, pontho na kuthamangisa madimonyo mazinji. Iwo madimonyo akhan'dziwa mbani Yezu. Ndi thangwi eneyo Iye akhaakhondesa kuti alonge.

³⁵Na macibese, m'bambakuca, Yezu alamuka mbaenda kutali na anthu, pace ekha, kaphembera.

³⁶Simau Pedhru aenda na andzace kasaka Yezu.

³⁷Na tenepo, pidan'gumana iwo alonga tenepa: “Anthu onsene asakusakani.”

³⁸Yezu aapanga tenepa: “Tendeni m'pisa pinango pya dhuzi-dhuzi, toera ndiapangembo Mphangwa Zadidi. Thangwi ndadzera penepyo.”

³⁹Yezu akhaenda mbuto zonsene za Galileya, mbakhalonga Mphangwa Zadidi m'manyumba a kuphemberera, na kubulusa madimonyo.

⁴⁰Penepo abwera mamuna m'bodzi nyamatanya kuna Yezu, an'godamira mbam'phemba tenepa: “Mbuya, mungafuna munandiwangisa.”

⁴¹Yezu am'bvera ntsisi zikulu, an'khuya na manja ace mbalonga tenepa: “Ndisafuna, iwe waceneswa.”

⁴²Pa n'dzidzi ubodzi ene matanya amala, mamuna awanga.

⁴³Buluka penepo, Yezu amuendesa mbampanga na mphambvu zonsene kuti:

⁴⁴“Lang'ana leka kupanga munthu penepi. Ndoko kuna nyantsembe toera akudinkhe. Ungamala upereke ntsembe ninga mudapilongera Mozesi, toera anthu adziwe kuti iwe wawangadi.”

⁴⁵Mbwenye mamuna uyu pidabuluka iye penepo, atoma kulonga pakweca pinthu pizinji, mbakhamwaza mphangwa za pyonsene pikhadacitika. Na thangwi eneyo, Yezu akhacimwana kupita m'mizinda na kutsandzaya. Mbwenye akhakhala kunja m'mbuto za kubisala. Anthu akhabuluka m'mbuto zonsene mbakhaenda kuna Iye.