Read Cibverano Cipsa Cisena Mk. 7 Bible Online

Mk. 7 - Cibverano Cipsa Cisena bible

Mk. 7

¹Ntsiku inango, afarisi na anyakudziwisa a Mwambo anango akhabuluka ku Djerusalema, agumanyikana pabodzi pene na Yezu.

²Iwo aona anyakupfundza anango a Yezu mbakhadya na manja akuswipa. Uku nkhubveka, mbadzati kusamba manja.

³(Thangwi madjuda onsene na afarisi, nkhabe kudya mbadzati kusamba pyadidi manja, toera kutoweza mwambo udapfundziswa iwo na a mbuya awo.

⁴Na tenepo, angabuluka ku nsika nkhabe kudya mbadzati samba. Pontho asatoweza mitemo inango mizinji ninga, kutsukwa kwa makhomico, milinga, na pyombo pinango pya nkuwa na matalimba.)

⁵Na tenepo, afarisi na anyakudziwisa a Mwambo abvundzisa Yezu kuti: “Thangwi yanji anyakupfundza ako nkhabe kutoweza mitemo ya a mbuya athu, mbadya mbakhonda samba manja?”

⁶Yezu aatawira tenepa: “Ndimo mwene pidalonga mporofeta Izaya na thangwi ya imwe anyauthambi, mbalemba kuti: ‘Mbumba iyi isandisimba na mulomo wawo, mbwenye mitima yawo iri kutali na ine.

⁷ Iwo asandilambira pa pezi. Thangwi asapfundzisa mitemo yakucitwa na anthu.’

⁸Imwe musapwaza matongero a Mulungu mbamutoweza myambo ya anthu.”

⁹Yezu alonga pontho tenepa: “Imwe kazinji kene musakoza kusiya pang'ono matongero a Mulungu, toera kutoweza myambo yanu inapfundzisa imwe.

¹⁰ Thangwi Mozesi alonga tenepa: ‘Lemedza baba wako na mai wako,’ pontho ‘Ule anakhonda kulemedza baba wace peno mai wace, anatongwa kuphiwa. ’

¹¹Mbwenye imwe musalonga kuti munthu angalonga kuna mai wace peno baba wace kuti: ‘Pinthu pikhafuna imwe kutambira na ine mphya Korobhani,’ korobhani nkhubveka, ndi ntsembe ya Mulungu,

¹²munthu unowu imwe musan'khondesa kuti aleke kucitabve pinatongwa iye kucitira baba wace na mai wace.

¹³Tenepa, imwe musafudza fala ya Mulungu, mbamuicinja na mitemo yanu, idacita imwe. Pontho musacita pinthu pizinji pinango pyakulandana na penepyo.”

¹⁴Yezu aucemera pontho mwinji wa anthu mbaupanga tenepa: “Bveserani monsene mupiyikhe m'makutu pire pyonsene pinafuna kukupangani Ine kuti:

¹⁵Pyonsene pinabuluka kunja mbapipita muna munthu nkhabe ‘kunswipisa’. Mbwenye cire cinabuluka muntima, ceneco ndico ‘cinaswipisa’ munthu.

¹⁶Ana makutu a kubva, mbabve!”

¹⁷Yezu mudamwazana iye na mbumba, apita n'nyumba, anyakupfundza ace mbam'bvundza kuti usalongeranji nsanje unowu.

¹⁸Iye aapanga tenepa: “Na imwe ene mudapibvesesambo tayu? Kodi imwe nkhabe kupidziwa kuti pyonsene pinabuluka kunja mbapipita muna munthu nkhabe ‘kunswipisa’?”

¹⁹Thangwi penepyo nkhabe pita muntima, mbwenye pisaenda n'cifu pingamala mbapibuluka kunja. Na mafala awa, Yezu akhapangisa kuti pyakudya pyonsene pya ceneswa.

²⁰Iye athimiza pontho kulonga tenepa: “Cinabuluka muna munthu ndico ‘cinanswipisa’.

²¹Thangwi muntima mwa munthu ndimo munabuluka manyerezero a kuipa, ulukwali, umbava, upandu, upombo,

²²kusirira, kuipa ntima, uthambi, bibvu, pseda, kupikuza, kuzuda na kusoweka ndzeru.

²³Pyonsene ipi pyakuipa pisabuluka muntima mwa munthu. Penepyo ndipyo pinaswipisa munthu.”

²⁴Yezu abuluka, mbaenda m'pisa pya dhuzi na nzinda wa Tiru na wa Sidhoni. Iye hakhafuna tayu kuti anthu an'dziwe kuna Iye. Na tenepo, apita n'nyumba, mbwenye acimwana kubisala n'dzidzi ukulu ene.

²⁵Nkazi m'bodzi, akhali na mwana wace wankazi akhali na nzimu wa kuipa, na kubva mbiri ya Yezu, na mwansanga aenda kan'godamira pa myendo pace.

²⁶Nkazi akhali wa dzindza ya agerego, wa ku dziko ya Siro-Finisya. Akhaphemba kuna Yezu kuti aubuluse nzimu wa kuipa ukhali na mwana wace.

²⁷Mbwenye Yezu antawira tenepa: “Cakutoma siya ana adye akhute. Thangwi si pyadidi tayu kubulusa nkate wa ana, mbatiuponyera pinchinja pya anambwa.”

²⁸Nkazi atawira tenepa: “Ande Mbuya, mbwenye pinchinja pya anambwa, pa thando panadya a mbuya awo, pisalokoterambo umbwera-mbwera unagwisa ana.”

²⁹Na tenepo, Yezu ampanga kuti: “Na thangwi ya matawiriro adacita iwe, ndoko. Nzimu wa kuipa wabuluka muna mwana wako.”

³⁰Mudaenda nkazi ku nyumba kwace, agumana mwana wace ali lamba pa talimba, thangwi nzimu wa kuipa ukhadabuluka kale muna iye.

³¹Yezu abuluka pontho m'pisa pya padhuzi na nzinda wa Tiru, mbagwanda na pa nzinda wa Sidhoni mpaka ku nyandza ya Galileya na cisa ca Dhekapoli.

³²Kweneko anthu an'dzesera mamuna m'bodzi wakukhonda kubva, pontho iye akhali na cibubu. Iwo am'phemba kuti amuikhe djanja toera amuwangise.

³³Yezu am'bulusa mamuna pakati pa mbumba mbamuikha pyala m'makutu mwace. Buluka penepo, aphula mata mbaaikha pa lirimi ya mamuna.

³⁴Na tenepo, alang'ana kudzulu, mbapuma na mphambvu, mbalonga tenepa: “Efata!” Ndiko kubveka: “Funguka!”

³⁵Makutu a mamuna ule afunguka, pa n'dzidzi ubodzi-bodzi lirimi yace yasudzuka, mbatoma kulonga mwadidi mwene.

³⁶Penepo Yezu akhondesa anthu onsene kumwaza mphangwa zenezi. Mbwenye pikhaakhondesa Iye, anthu akhalongeratu kakamwe.

³⁷Na tenepo, onsene akhabva akhadzumatirwa napyo mbalonga tenepa: “Onani, asacita pyonsene mwadidi kakamwe! Anakhonda kubva, asabva, anakhonda kulonga, asalonga!”